Di Mulakata 28

Baki’ Yakub dasuro’ lamba’ lo’a banuana kamo amana

1Jaji barik baki’ Isakenpi dinen mangalong anaka yang imundiin dinen, baki’ Yakub, dapamase’. “Na daiko, ada’ko arainyeen lo’a babainye indi’angen di Kana’an,” ingka kenang. 2“Arungko lamba’ lo’a Mesopotamia. Manyariko lo’a ampuna baki’ Betuel, lo’a saparanak diri’ka’. Manyariko babainye anaka kakana indu’, anaka ama’ Laban dinen,” ingka kenang jaruma baki’ Isak lo’a anaka.

3Jaji barik dinen amana baki’ Yakub, baki’ Isaken mando’aang lo’a anaka pamondokang jalu maamen lo’a, “Arung Alatala yang Tau Palin Bakuasaan pamaam lo’u mainto’ dapabayu’a anak kanturunannu padari bangsa baraa’en. 4Awan bayana lo’a baki’ Abraham. Mainto’ alao’a kausa lo’u mondok lo’a ambata anak kanturunannu. Sampai ona’ tana’ itumpangiin indi’angen daduduki barik kole’a anak kanturunannu padari daikin ampunaan,” ingka kenang ilalam do’ana baki’ Isak lo’a baki’ Yakub.

5Jaji kenang lalo barik, baki’ Yakub tarangkat malola’ani jaruma amana. Lamba’ lo’a baki’ Laban dinen, kakana induna, anaka baki’ Betuel urang Aram dinen di Mesopotamia.

6Jaji baki’ Esauenpi dinen mamikirang. Dabele awan dinen baki’ Yakuben dado’aanga laloang dasuro’ lamba’ lo’a Mesopotamia manyari babainye inang. Datamu bea jaruma amana nanga dado’aanga dinen mamase’ang arainye lo’a babainye Kana’an. 7Datamu bea de’i lamba’a arina malola’ani jaruma amana. 8Jaji dapikir dinen de’i, datamu bua barik kole’a alibaka dinen amana lo’a babainye di Kana’an, tamasok awan bainyena. 9Jaji daiapi lamba’ barik manyari bainye lo’a anaka kamo amana, baki’ Ismael. Jaji datambai bapi bainyena, i Mahalat asanna. I Mahalat dinen ampuna baki’ Abraham, anaka baki’ Ismael, arina i Nebayot.

Baki’ Yakub mamui

10Jaji barik baki’ Yakub tarangkat dari Berseba manuju lo’a banua Haran. 11Barik lamba’ mondok di kosan seraan dinen, daia dinen laloang lenga’. Dala barik batuun datiang kalang uluna, kole’a tasulupa bea matasoon. To’ samalam. 12Jaji barik daia tindo’ inang, ilalam muina dinen, andian tangka. Tangka dinen papasana tatutuk lo’a suanen. Andian malaikata Alatala inait indor inang. 13Inang lalo dakitana i Yahuwe akadeng di ulu tangkaan. Jaji barik manjarum i Yahuwe lo’a baki’ Yakub, “Iak lalo di’en Alatala Yahuwe yang dasembaan kole’a baki’ Abraham nanna ama’ Isak,” ingka kenang. “Di’en lalo tana’ ilenga’iin iko yang kudunjukangen lo’in nanna anak kanturunannu,” ingka kenang manjaruma. 14“Daiko ona’ kupabayu’ anak kanturunannu. Awan lalo ambata kutu tana’en dinen bayu’a. Sampai bayu’a ona’, apano’ tana’en kole’a, maro timur, maro barat, maro salatan, maro utara,” ingka kenang. “Ona’ samuana ambata kanturunan tau inyaunga galung suanen to’ mandua’ang jalu maamen malaloi kanturunannu. 15Kapiko isa-isa inyapen kosan jalu manu lo’u. Tetapko kuawa mole’ lo’a tana’ kubayaangen di’en. Na’anko kutantang unjang,” ingka kenang, “sampai akaus adari gulungan bayaku’ lo’u,” ingka kenang manjaruma i Yahuwe lo’a baki’ Yakub.

16Jaji barik asading baki’ Yakub, “Adu, indi’angen pan kosanna i Yahuwe. Baru’ di’ kutamuna,” ingka kenang. 17Jaji atakut barik, “Manyuro’ atakut lo’ku’. Indi’angen pan saona Alatala. Di’ lalo mambangan yang lo’aan Surga,” ingka kenang jarumina kalena ilalam batak nyawana.

18Jaji maminna dinen, malam-malam barik asadinga baki’ Yakub. Jaji batu yang datiang kalang uluun dinen dapakadeng barik datiang tanda. Mamin dinen daolongi nanna inyaken. 19Jaji kosan dinen daasan barik Betel.#28:19 Dalam jarum Ibraniin ratina bet dinen sao. Ati’en el, ratina Alatala. Jaji ratina Betel* ialalo saona Alatala. Ijolona dinen daasan Lus.

20Maminna dinen barik baki’ Yakub basumpa, “Ati’en Alatala tapat manggulungi lo’ku’ ilalam palamba’anku’ di’en, ti’ mameang lo’ku’ jalu kaan nanna kainku’, 21sampai daiak mole’ lo’a saona ama’ku’ nanna ka’ada’an maamen, inang andianna putusanku’. Ti’ mamin adari awan dinen, tetap i Yahuwe kusemba padari Alatalaku’,” ingka kenang. 22“Kenang bea awan lalo batu kupakadengen itiang tandana, tetap di’en padari saona Alatala, padari sao sambayangen,” ingka kenang. “Kenang bea lo’a pameanga lo’ku’, tetap dinen kumeang iak. Kupole’ lo’a ilalam sapulo’ paresen,” ingka kenang jaruma ilalam janjina lo’a i Yahuwe.

Currently Selected:

Di Mulakata 28: EBE

Highlight

Copy

Compare