Di Mulakata 27

Baki’ Yakub dado’aang mandua’ang berkat yang lo’aan anak atoaan

1Jaji barik di atoana baki’ Isak, mamin dinen akabur matana, dakalong dinen anaka yang atoaan, “Anake,” ingka.

“Ai ama’?” ingka kenang manyautina baki’ Esau.

2Jaji manjarum baki’ Isak lo’a anaka, “Daiak di’en, atoaak mamin. Mainso’ mamin ijoloku’. Na’an poang itamu asona,” ingka kenang. 3“Jaji kenang, alajo dinen alat panyari inatangen, gulungan pana nanna matana. Anyapko manyari inatang ilalam jaluun,” ingka kenang. 4“Ati’enko kule’, awa mole’en barik, riko isina ipola jalu banyanyamen awan kadaku’en. Di maminku’ angkaan ona’, inang lalo daiko kudo’aangu pamondokang jalu maamen lo’u. Kutiang pangamasang mateku’,” ingka kenang baki’ Isak lo’a anaka, baki’ Esau.

5Jaji jaruma ira dua paanaken dinen dadalinga de’i kole’a piang Ribka. Jaji maminna barik talalo dinen baki’ Esau manyari inatang, 6manjarum piang Ribka lo’a baki’ Yakub, “Jaji anake, andian jaruma ama’ kudalingaan lo’a kaka’. Suba taantalinga. 7Dasuro’ dinen manyari inatang ilalam jaluun. Dasuro’ dinen riko mamola jalu banyanyamen. Di maminna dakaan, to’ dado’aang dinen kaka’ kole’a ama’ pamondokang jalu maamen lo’a. To’ datiang mangamasang matena. 8Na, jaji barik lola’ani poang jarumku’ di’en. 9Lamba’ijo gulungan inatangka’ mala anak kambing dua yang palin maamen awa lo’a di’en. To’ kuriko mamola jalu banyanyamen yang kakadakaan kole’a ama’. 10Iawa iko barik lo’a dinen suro’ kaan lo’a ama’. Mainto’ ikona yang dado’aangen kole’a ama’ pamondokang jalu maamen lo’u,” ingka kenang jaruma piang Ribka dinen lo’a baki’ Yakub.

11-12Jaji manjarum barik baki’ Yakub dinen lo’a induna, “Asi lo’a iaka arungen kenang. Dasasar ona’ kulitku’. Kole’a kaka’ku’ dinen balangke buluna, daiak apondok. Atapis daiak kulitku’” ingka kenang. “Jao’-jao’ ona’ yang to’ pamaamen lo’ku’, manyuro’ iak alit dakutukiin kole’a dinen makalku’ lo’a kalo’a,” ingka kenang dinen jaruma baki’ Yakub lo’a induna.

13“Ada’ pasilaloananga nanku’. Ala poang dinen anak kambingka’. Di’ tanggung jawabku’,” ingka kenang dinen jaruma induna lo’a baki’ Yakub.

14Jaji tarangkat barik baki’ Yakub, dala dinen kambinga. Mamin dala anak kambinga, daunjukang lo’a induna. Jaji dauno’ anak kambinga, dariko barik kole’a induna. Mamola jalu banyanyamen awan kakadakaan kole’a amana. 15Jaji andian pakaianna baki’ Esau inang di saona induna, anu palin maamen. Dinen barik dalaan. Dapamakaiang lo’a anaka imundiin. 16Laloang dala dinen kulit kambingen. Dalulunang lo’a takiara. Dalulunang lo’a akat kalonga yang atapisen dinen, mainto’ balangkena buluna dinen yang baki’ Yakuben. 17Rabarik jalu kaan nanna rotiin yang dapolaan dinen dasuro’ awa lo’a baki’ Yakub.

18Jaji maminna dinen barik, tarangkat baki’ Yakub lo’a amana. Mondok lo’a amana inang, dasading barik amana, “Ama’e,” ingka.

“O’,” ingka, “Intainko anake,” ingka kenang amana lo’a baki’ Yakub.

19“Iak lalo di’en anaku atoaan, i Esau. Kulola’ani barik jarumu dinen. Adudukko ama’e. Angkaanko pakule’anku’ mainto’ dinen ido’aangku’ iko pamondokang jalu maamen lo’ku’,” ingka kenang jaruma baki’ Yakub lo’a amana.

20Jaji barik manjarum dinen amana, “Riarusi mandua’angen,” ingka kenang.

“Bariar lalo kole’a dinen i Yahuwe yang isembaan iko manyuro’ bariar kule’ku’,” ingka kenang.

21Jaji barik, “Lo’di’kojo. To’ kusasariko ati’enko tapat dinen anakku’ i Esau,” ingka kenang.

22Barik dainso’i kole’a baki’ Yakub, dasasari dinen, “Unyinu di’en balu’ unyina i Yakub. Poangsi takiaru dinen takiara i Esau. Arabulu,” ingka kenang. 23Jaji na’an dakilala kole’a amana kole’a arabuluna takiara dinen. Ialalo sampai mainya’ mando’aang barik baki’ Yakub dinen pamondokang berkat.

24Jaji to’ dado’aang dinen, manjarum bapi baki’ Isak, “Iko tapatsi dinen anakku’, i Esau?” ingka kenang.

“Iak lalo,” ingka kenang.

25Jaji dabalas bapi, “Na, ati’en iko bea, awa dinen pakule’annu lo’ku’, patamannu. To’ kukaan. Mamin kukaan ona’, inang lalo kudo’aangu pamondokang jalu maamen lo’u,” ingka kenang jaruma lo’a. Jaji barik daawa dinen patamaan lo’a amana. Dakaan. Laloang daawa bea dinen angguren. Dainyum bua. 26Mamin dinen, “Mainso’ko lo’ku’. Manyumko lo’ku’,” ingka kenang dinen manjaruma amana lo’a anaka.

27Jaji barik baki’ Yakub mainso’i dinen lo’a amana. Manyum dinen lo’a amana. Jaji dabau barik bauna kaina anaka dinen, dado’aang barik, “Na, bauna anakku’ di’en sabangon nanna tana’ yang dapamaamen kole’a i Yahuwe. 28Kudo’aangko lo’a Alatala, arung daia manawa’i lo’u ambunen malao’i jalu itanamen manyuro’ subur. Arungko datawa’i tana’ bainyaken manyuro’ bayu’ jaji mole’a uman, bayu’ jaji mole’a kobon angguren. 29Tauenpi dinen, ambata gulungan bangsa yang bokanen tunduk kausa lo’u. Malola’ kausa lo’a panamunu. Kenang bea lo’a ambata gulungan sairunnu, kanturunan dari nanna indu’, iko mauluangen. Iko dalola’en. Kenang yang tau mando’aangen lo’u pamondokang jalu maamen lo’u to’ dabalas. Dapamaam bea daia kole’a Alatala. Tau mangutukiin lo’upi dabalas. Dakutuki bea kole’a Alatala,” ingka kenang dinen ilalam do’ana baki’ Isak pamaama lo’a anaka.

30Jaji maminna dinen, talapas poang dado’aanga dinen kole’a baki’ Isak baki’ Yakuben, baki’ Yakubpi dinen lamba’. Talalona poang lamba’ baki’ Yakub dinen, baki’ Esaupi mole’ manyari inatangen dinen. 31Laloang mariko isi’ inatang pakule’anna dinen. Mamola bea daia jalu banyanyamen. Mamin dariko, mamin sasak, daawa barik lo’a amana. “Adudukko ama’e. Angkaanko pakule’anku’ mainto’ dinen ido’aangku’ iko pamondokang jalu maamen lo’ku’,” ingka kenang.

32Jaji barik dasauti kole’a amana, “Intainko dinen?” ingka kenang.

Dasauti, “Iak lalo anaku yang atoaan, Esau,” ingka kenang.

33Jaji kikirik barik tolanga amana. Sakayu-kayu mantuarina. “Intain yang manyariin inatangen dinen, yang mawaan pakule’anna lo’ku’ yang kukaanen, yang ambatapi talapas ijolonu di’en? Daia dinen mamin kudo’aang. Do’aan dinen yang kudo’aangen tajolo tetap adari lo’a,” ingka kenang manjaruma amana dinen baki’ Isak lo’a anaka, baki’ Esau.

34Jaji maminna dadalinga dinen barik kole’a baki’ Esau, laloang anangis dinen baki’ Esau. Mamuko-muko dinen anangisa lasana ajau’a nyawana. “Meangak bea daiak, ama’e,” ingka kenang jaruma dinen lo’a amana.

35Jaji barik dasauti kole’a amana dinen, kole’a baki’ Isak, “Mamin talalo kausana. Samuana jalu to’ kudo’aangen lo’u akaus mamin dala kole’a adi’. Kudo’aang iak lo’a kole’a daakalku’,” ingka kenang jaruma amana lo’a baki’ Esau.

36Jaji manjarum barik baki’ Esau lo’a amana, “Patut bea iasan Yakub,”#27:36 Ratina yakub ilalam jarum Ibraniin, pakal-akal. ingka kenang. “Duang kalina di’en daia makala lo’ku’,” ingka kenang. “Ambata tawa’ku’ awan anak atoaan maminjo daakal sakali. Mamin dinen yang to’ ido’aangen iko lo’ku’ pamondokang jalu maamen lo’ku’ dala bapi. Ai, kosanpi bokanen arantangen yang pandeen ido’aang lo’ku’?” ingka kenang manjaruma.

37Jaji dasauti barik kole’a amana, “Kosan. Yang maminen kudo’aang, ia kausa yang mangkamen lo’u, yang mangkamen lo’a ambata sairunna. Ambata asel umaan, ambata asel angguren, ia kausa ampunaan,” ingka kenang. “Ai lagi’ yang kudo’aangen lo’u yang akausen mamin kudo’aang lo’a?” ingka kenang manjaruma amana, baki’ Isak dinen lo’a anaka.

38Jaji barik maminna dinen, “Ungka’ andianpi, ama’e. Na’an patut jangka’a seraan yang pandeen ido’aangen iko,” ingka kenang manjaruma nanna unyi baraana dinen, anangisa lo’a amana.

39Jaji barik manjarum amana, “Daiko di’en bajao’ko lo’a tana’ bainyaken. Bajao’ko lo’a ambun malao’iin lo’a jalu itanamen manyuro’ subur. 40Katio’annu ona’, tumbas sikayoko nanna tauen, marampasko. Daiko ona’ di’en padari suro’anna arinuko. Poangsi ona’ maminnu malawan lo’a, tapasutko bua lo’a kuasana arinu. Na’anko barik daangkam kole’a,” ingka kenang jaruma amana lo’a dinen baki’ Esau.

41Jaji dendam atena baki’ Esau. Jarumi kalena kole’a dinen akausa dakalit jalu to’ dado’aangen dinen kole’a amana lo’a, “Ona’ko. Na’anpi balaun ama’ku’ tio’a. Ati’en mamin mate ama’ka’, mamin mararak tata’a, kuduno’ko,” ingka kenang jarumina kalena.

42Jaji barik jaruma baki’ Esau dinen dadalinga kole’a piang Ribka. Jaji dakalong dinen anaka yang imundiin, “Na, belejo kakanu to’ mauno’ ona’ lo’u. Dapanaata poang ajau’a nyawana marungi lele’an,” ingka kenang manjaruma. 43“Jaji taantalinga jarumku’ di’en. Arariko poang lo’a kaka’ku’, ama’ Labanen dinen. 44Inang poang lalako’u marungi maama nyawana kakanu,” ingka kenang. 45“Bele poang kupaawaang jarum lo’u manyuro’ mole’ ti’ mamin maam barik nyawana kaka’, ti’ mamin dalilu’,” ingka kenang, “Arugiak tapat ti’ inyap anakku’ duaan dalam saso,” ingka kenang manjaruma dinen induna, piang Ribka lo’a anaka.

46Jaji manjarum dinen bapi yang piang Ribkaan lo’a baki’ Isak, “Bapu’ tio’ku’ kole’a arabainyena i Esau, lo’a urang Heten. Na’anak jaji sikule’ nanna urang Heten. Ungka’ ona’ i Yakub bapi malaan urang Het, lo’a tau indi’angen, kosan lagi’ guna tio’ku’,” ingka kenang jaruma piang Ribka lo’a baki’ Isak.

Currently Selected:

Di Mulakata 27: EBE

Highlight

Copy

Compare