Di Mulakata 26

Baki’ Isak lalako’ di banua Gerar

1Jaji dinen di negeri Kana’an timbul bapi karaparanen. Laan bapi lo’a karaparanen nanga tio’a baki’ Abraham. Jaji barik kole’a karaparanen dinen, baki’ Isak dinen lamba’ lo’a banua Gerar, lo’a Raja Abimelek, rajana urang Pilistinen.

2Jaji barik i Yahuwe paitang kalena lo’a baki’ Isak, manjarum, “Ada’ko lamba’en lo’a negeri Mesir. Lalako’ko poang di negeri yang kujarumangen lo’u. 3Indi’ang poang di negeri tauen lalako’u mainto’ kuberkatinu. Sarataak bua nannu, kole’a di’ lalo ambata tana’ kumeangen lo’a anak kanturunannu. Kupadari baya kujarumangen lo’a amanu mamaya atas asan diri’ku’. 4Kupabayu’ anak kanturunannu awan lalo bintangen di suanen bayu’a. Samuana ambata tana’ di’en kutawa’i lo’a anak kanturunannu. Ona’ samua kanturunan tau inyaunga galung suanen to’ mandua’ang jalu maamen malaloi anak kanturunannu. 5Kole’a awan ama’ Abraham dinen, mainya’ tapat malola’ani lo’a jarumku’, lo’a paba’iku’, lo’a ambata parintaku’ nanna ukumku’,” ingka kenang jaruma i Yahuwe lo’a baki’ Isak. 6Jaji baki’ Isak lalako’ di banua Gerar.

7Jaji launna lalako’a di banua Gerar, ti’ andian dinen babakaan mangatoani bainyena baki’ Isak, “O dinen ariku’,” ingka kenang manyautina. Jaji kenanga dinen jaruma, kole’a atakut masan bainyena. “Ungka’en tauen ona’ mauno’ lo’ku’ kole’a tau bainginen to’ mala lo’a i Ribka, kole’a bainye maama,” ingka kenang nyawana.

8Jaji balaun barik lalako’a baki’ Isak inang, Raja Abimelek mamele indor dari palawaken dinen, dakitana baki’ Isak nanna bainyena sidai’ sijaput-japut. 9Jaji barik maminna dinen dasuro’ madap kole’a Raja Abimelek dinen baki’ Isaken. “Asi kenang maam-maamu? Bainyenu pan yang awan dinen. Asi bainyenu iasanna iko arinu?” ingka kenang Raja Abimelek lo’a baki’ Isak.

Jaji manjarum baki’ Isak dinen manyauti jaruma Raja Abimelek, “Kenangku’, kole’a ingka nyawaku’, ada’ak mate kole’a bainyeku’, kole’a bainye maama,” ingka kenang.

10Jaji barik dasauti kole’a Raja Abimelek, “Asi kenang maam-maama basanu lo’am,” ingka kenang. “Ungka’en andian barik ambata gulungannam yang sitindo’anen nanna bainyenu, manyuro’ sala’ kausa lo’am samuanam kole’u,” ingka kenang Raja Abimelek lo’a baki’ Isak.

11Jaji Raja Abimelek mameang parinta lo’a ambata gulunganna inang, “Intain yang mangaruun lo’a i Isak atau bainyena, pasti kuduno’. Kudukum mate,” ingka kenang Raja Abimelek lo’a ambata gulunganna.

12Jaji barik aruma baki’ Isak inang, asel umanna dinen bayu’ tapat, sampai dinen saratus kali lipat mole’a. Kole’a i Yahuwe pamaam lapoang lo’a. 13Dapadari tau maam barik baki’ Isak dinen. Insang kaya kamaamanna sampai bayu’ tapat hartana. 14Domba sapina bayu’. Suro’annapi bayu’. Jaji kapiayo barik gulungan urang Pilistinen dinen. 15Jaji barik ambata loang kali palanan danum yang dapolaan kole’a suro’anen di tio’ajo amana, dasansangi barik nanna tana’en kole’a urang Pilistinen, kole’a kapiayona dinen.

16Jaji manjarum Raja Abimelek lo’a baki’ Isak, “Mamalinkin barik. Loloto bakuasanin, atalokam kole’in,” ingka kenang.

17Jaji mamalin barik dinen baki’ Isak lo’a tana’ rataan di Gerar. 18Jaji barik dakali baru dinen ambata loang kali palanan danum yang dakaliinjo di tio’a baki’ Abraham. Kole’a samuana dasansangi nanna tana’en kole’a urang Pilistinen di maminna mate baki’ Abraham. Dameang asanna gulungan loang kaliin awan bua asan jolona yang daasanen kole’a amana.

19Jaji launna lalako’a di Gerar, baki’ Isak mangali loang danum, mandua’ang danum yang bayu’ tapat maruapa. 20Poangsi ambata tau panuntuani inatangen di Gerar inang sipadu nanna suro’anna baki’ Isak, ambata panuntuani inatanga baki’ Isak dinen. “Di’ loang danumam,” ingka kenang ira, dapasikoloang. Jaji dameang asan loang danum dinen, Esek, kole’a sipaduda’ dinen.#26:20 Ratina esek ilalam jarum Ibraniin, sipadu. 21Mamin dinen mangali bapi, sipadu bapi. Daasan barik loang danum dinen, Sitna.#26:21 Ratina sitna ilalam jarum Ibraniin, malawa. 22Jaji mamalin bapi, mangali bapi. Baru’ barik kosan tau sipadu. Jaji daasan barik loang danum dinen, Rehobot.#26:22 Ratina rehobot ilalam jarum Ibraniin, sumaka’. Kole’a ingka baki’ Isak, “Baru’ki’ dameang kosan kole’a i Yahuwe. Tentuki’ barasel barik di tana’ di’en,” ingka kenang baki’ Isak.

23Maminna dinen, lamba’ barik baki’ Isak lo’a Berseba. 24Jaji mondok inang barik, malam dinen bua i Yahuwe paitanga kalena lo’a baki’ Isak. Jaji manjarum, “Iak lalo di’en Alatala yang dasembaan kole’a ama’ Abraham. Jaji daiko, ada’ko atakuten, ada’ko kalangganganen. Na’anko kurantang unjang. Andianak bua. Daiko kupamaamko. Kupabayu’ ambata anak kanturunannu. Kupadari bayaku’ nanna ama’ Abraham,” ingka kenang jaruma i Yahuwe lo’a baki’ Isak.

25Jaji barik dapola inang kosan panutung pamindaraan laloang mangalong lo’a asanna i Yahuwe. Inang bea dapakadeng kakalang palamba’a. Gulungan suro’anapi mangali bapi mamola loang palanan danum.

Baki’ Isak sibaya nanna Raja Abimelek

26Jaji barik maminna dinen, mondok Raja Abimelek nanna manterina, i Ahusat asanna nanna panguluan tentarana, i Pikol asanna. 27Jaji manjarum baki’ Isak lo’da’, “Ai mondokin lo’ku’ maminnin mangalibakang lo’ku’, isuro’ak mamalin?” ingka kenang.

28Jaji manjarum ira, “Jaji mondokam di’en, mamin ikita ikam i Yahuwe dinen manggulungi lapoang lo’u. Jaji sipakatkam barik inang, irasa labi maam ti’ki’ basumpa 29na’annu pande papadisi lo’am. Kole’a daikampijo dinen na’ankam papadisi lo’u. Isuro’ lamba’ nanna maamen. Sampaiko rabarik mamin dapamaam kole’a i Yahuwe,” ingka kenang jaruma Raja Abimelek nanna gulunganna lo’a baki’ Isak.

30Jaji maminna dinen rabarik ira dinen dapangkaan, daawaang jalu kaan bayu’-bayu’ kole’a baki’ Isak. Jaji angkaan ira inang, mainyum nanna maamen. 31Makap-makap barik sibaya ira duaan laloang basumpa. Maminna dinen daparuarang ira lamba’, tarangkat ira nanna maamen.

32Jaji di aso dinen bua andian suro’anna baki’ Isak mondok lo’a, mawa dongo dari loang danum yang dakaliangen dinen. “Maminkam mandua’ang danum!” ingka kenang dongona. 33Jaji daasan barik kosan dinen.#26:33 Ratina seba dalam jarumda’, loang kali sumpaan atau loang kali katujuun. Ialalo barik banua dinen daasan Berseba mondok aso di’en.

34Jaji anaka baki’ Isak, baki’ Esau dinen, nanga umura mamin mondok ampat pulo’ taun arainye barik lo’a tau negeri Kana’an, lo’a anaka i Beeri, urang Het. I Yudit asanna. Mamin dinen arainye bapi lo’a anaka i Elon urang Het bua. I Basimat asanna. 35Jaji ajau’ nyawana baki’ Isak nanna piang Ribka kole’a bainyena baki’ Esau dinen.

Currently Selected:

Di Mulakata 26: EBE

Highlight

Copy

Compare