Di Mulakata 22

Baki’ Abraham dakilalai

1Maminna dinen, Alatala to’ mangilalai atena baki’ Abraham. Jaji mangalong lo’a, “O Abraham,” ingka kenang.

“Indi’angak,” ingka kenang manyautina baki’ Abraham.

2“Daiko di’en awa anaku i Isak yang seseraan dinen, yang ikasaangen iko. Awa lo’a daerah Moria lo’a ukit to’ kujarumangen lo’u. Inang barik ona’ isembelina iko, itutungina itiang pamindaranu lo’ku’,” ingka kenang jaruma dinen Alatala lo’a baki’ Abraham.

3Jaji malam-malam barik asadinga baki’ Abraham, dakamasang dinen keledaina. Jaji barik daawa dinen suro’anna duaan, daawa bea baki’ Isak. Dabala’ bea kayu apiin datiang panuntungi pamindara itutungen dinen. Maminna barik sukup kayu apiin, tarangkat barik ira manuju lo’a kosan dinen yang dajarumangen kole’a Alatala.

4Jaji barik lamba’ ira, talung aso lamba’a, dabeleang matana dari bajao’, andian dakita dinen kosan yang datujuangen kole’a Alatala. 5Jaji manjarum barik lo’a suro’anna dinen duaan; “Arantangkin indi’angen, daikin nanna kaledaien. Ikam poang dua panak lamba’en. To’ lo’a dinenkampi sambayang. Maminnam ona’ sambayang, mole’kam bua lo’a di’en,” ingka kenang jaruma baki’ Abraham lo’a suro’anna duaan dinen.

6Jaji barik kayuun dinen dapanyanang lo’a baki’ Isak. Basi dinen nanna apiin daawa kole’a baki’ Abraham. 7Lamba’ barik ira duaan, manjarum barik anaka, “Ama’,” ingka.

“Asi anake,” ingka kenang baki’ Abraham.

“Andian kayuka’, andian apika’. Poangsi isasi dinen dombaan itiang pamindaraka’ lo’a Alatala,” ingka kenang manjaruma dinen baki’ Isak lo’a baki’ Abraham.

8“O dinen, Alatala tetap pandian anak dombaan yang to’ isambeliin, anake,” ingka kenang jaruma baki’ Abraham lo’a anaka. Jaji lamba’pi ira.

9Mondok rabarik ira lo’a kosan dajarumangen kole’a Alatala lo’a baki’ Abraham, jaji dabangkulungang dinen gulungan batuun. Darugu’ang mamola kosan panutung pamindaraan. Kenang bea dinen ambata kayu apiin darugu’ang inang. Laloang dajarat dinen baki’ Isak inang, dajalaang inang ibona kayu apiin. 10Laloang dajaput dinen basina, to’ dasembeli lalo anaka. 11Jaji barik mangalong malaikata i Yahuwe dari suanen, “Abraham, O Abraham!” ingka kenang.

“Ai,” ingka kenang baki’ Abraham.

12“Ada’ uno’a dinen anaku. Ada’ iai-aina kole’a kutamu mamin isi’ atenu, atakutu lo’a Alatala,” ingka kenang. “Kole’a anaku yang jangka’a seseraan dinen na’an ipase’ang iko lo’a,” ingka kenang malaikata i Yahuwe lo’a baki’ Abraham.

13Jaji barik maminna dinen, baki’ Abraham dakoengang lindo’a dabeleang lo’a balakanga, andian inang domba lakiin yang takaiten tunjanga lo’a akat jaluun. Dinen barik dalaan datiang pamindaraan lo’a Alatala, panyurang lo’a baki’ Isak. Jaji datutung barik dombaan inang. 14Barik daasan kosan dinen kole’a baki’ Abraham, “I Yahuwe Pandian.” Kole’a dinen ialalo sampai aso di’en andian idalingaan jarum dinen, “Inang di ukita i Yahuwe, to’ dapandian,” ingka’en dinen.

15Jaji barik mangalong malaikata i Yahuwe dari suanen kaduang kalina, manjarum lo’a baki’ Abraham, 16“Na, andian jaruma i Yahuwe lo’u. Daia, ingka, mamaya lo’u atas asan diri’a. Daia to’ pamaam lo’u kole’a de’i jalu ianuun iko malola’aniin panamuna. Na’an ipase’ang iko anaku. 17Jaji bayana lo’u, daiko ona’ to’ dapamaam. Dapabayu’ kanturunannu awan lalo ambata bintangen di suanen, awan bua kasiken di biring jawaan bayu’a. Ambata anak kanturunannu dinen ona’ to’ manuduki banuana pangayona padari ira ampunaan. 18Yang kanturunan tau inyaunga galung suanen, bauntung ona’ kausana. Samuana to’ mandua’ang jalu maamen malaloi anak kanturunannu. Kole’a mainya’u lalo malola’ani jaruma Alatala,” ingka kenang jaruma i Yahuwe dapamondokangen kole’a malaikata.

19Maminna dinen baki’ Abraham mole’ lo’a suro’anna duaan dinen, laloang mole’ kausa ira ampaten lo’a Berseba. Inang barik lalako’a.

20Jaji barik maminna dinen, andian tau mawa dongo lo’a baki’ Abraham, “I Milka, bainyena kakanu i Nahor dinen, mamin bayu’ anaka babakaan. 21Yang atoaan dinen i Us asanna. Maminna dinen asanna arina, i Bus. Maminna dinen bapi i Kemuel. Andian anaka i Kemuel, i Aram asanna. 22Maminna i Kemuel dinen arina bapi i Kesed, i Haso, i Pildas, i Yidlap nanna i Betuel. 23I Betuel andian anak babainyeen, i Ribka asanna. Jaji lapan mamin anaka i Nahor nanna i Milka. 24Andian bapi anaka i Nahor nanna i Teuma, madu’a i Milka dinen, i Teba, i Gaham, i Tahas, i Maaka,” ingka kenang dongoon yang daawaan lo’a baki’ Abraham.

Currently Selected:

Di Mulakata 22: EBE

Highlight

Copy

Compare