Di Mulakata 21

Baki’ Isak daparanakang

1-2Jaji barik i Yahuwe dinen mamberkati lo’a piang Sara manyuro’ araunting awan bua bayana lo’a. Arauntinga dinen, daparanakang anaka baki’ Abraham babakaan di atoana. Aso daparanakangapi dinen pas jaji awan bua bayana Alatala. 3Jaji dameang asanna barik kole’a baki’ Abraham lo’a anak daparanakangen kole’a piang Sara, i Isak.#21:3 Ratina isak ilalam jarum Ibraniin, tatawa. 4Jaji barik maminna mondok lapan aso umura nangkanak dinen, dasunat barik kole’a baki’ Abraham awan bua parintana Alatala lo’a. 5Umura baki’ Abraham nanga daparanakanga baki’ Isak, mamin mondok saratus taun.

6“Jaji Alatala,” ingka piang Sara, “manyuro’ lo’ku’ tatawa lasana sasauna nyawaku’. Tauenpi, samuana yang manaantalingaan dongoku’ di’en to’ tamba nanku’ tatawa,” ingka kenang. 7“Kosan tau manjarumen lo’a i Abraham yang barani masan lo’ku’ pande mandua’ang anak. Poangsi maminak barik di’en paranakang anaka lakiku’ di atoana,” ingka kenang jaruma piang Sara.

Piang Hagar nanna baki’ Ismael dasuro’ mamalin

8Jaji insang mainsit nangkanak dinen, insang baraa, tadang barik manusu’a lo’a induna. Jaji di aso tadanga manusu’a, dapola dinen rami-rami kole’a baki’ Abraham. 9Patanga’an rami-ramina, dabele kole’a piang Sara, anak jolona baki’ Abraham nanna piang Hagar urang Mesiren dinen manu lo’a baki’ Isak, mala paradai’an lo’a. 10Jaji maminna dakita dinen, manjarum piang Sara lo’a baki’ Abraham, “Arung iduser dinen pangkamku’ nanna anaka. Kole’a na’an patut anaka pangkamku’ dinen sama mala bagian lo’a tikanu nanna anakku’,” ingka kenang jaruma piang Sara lo’a baki’ Abraham.

11Jaji mandalinga dinen, baki’ Abraham susa tapat nyawana mamikir lo’a anaka dinen. 12Jaji barik dalam susana pikiranna dinen, Alatala barik manjarum lo’a, “Ada’ susaan mamikirang babainye dinen nanna anaka, Abrahame. Lola’ani poang panamuna i Sara. Kole’a okan i Ismael yang manurunangen tau yang kubayaangen. I Isak manurunangen,” ingka kenang. 13“Poangsi anaka pangkamenpi dinen kupabayu’ bea kanturunanna padari banua baraa’en kole’a ia bea dinen anaku,” ingka kenang jaruma Alatala lo’a baki’ Abraham.

14Jaji barik asading malam-malam dinen baki’ Abraham. Dala dinen jalu kaanen, dala dinen danumen. Daunjukang lo’a piang Hagar, dapanyanang lo’a. Mamin dinen dasuro’ mamalin ira dua panaken. Jaji barik lamba’ piang Hagar dinen, lamba’ tadaya-daya poang di daerah Berseba, inang di kosan ateengen.

15Jaji lamba’ barik dinen piang Hagar, akaus barik ambata anak danuma. Jaji barik anaka dinen dapalenga’ di kaungan akat jaluun. 16Jaji panjao’ barik kalena lo’a anaka dinen, awan sapanimbakan panaan. Aduduk inang anangis. Ada’ sampai dakitana kalo’a dinen bangkayoanna anaka ti’ mate.

17Jaji barik maminna anangis dinen anaka, dadalinga kole’a Alatala. Mangalong barik malaikata Alatala dari suanen, manjarum lo’a piang Hagar, “O Hagar, mai susanu? Ada’ko atakuten. Alatala mamin mandalinga lo’a anangisa anaku inang di kosanna. 18Se’ lamba’i anaku. Paduduk, japut di tanganna,” ingka kenang. “Kole’a daia dinen ona’ kupabayu’ kanturunanna. Kupola banua baraa’en,” ingka kenang jaruma malaikaten lo’a piang Hagar.

19Maminna dinen baru’ dabae’ barik matana kole’a Alatala. Jaji dabeleang matana barik piang Hagar dinen, jalu pan andian loang kali palanan danum. Jaji dalapang barik danuma lo’a dinen, dapainyumang lo’a anaka.

20Jaji nangkanak dinen de’i baraa insang baraa, dagulungi lapoang kole’a Alatala. Mamin baraa barik, lalako’ inang di kosan ateengen. Daia padari tau pande, tau datamu mamana. 21Barik nanga lalako’a di kasik Paran asanna, induna dinen manyariang babainye Mesir dinen itiang bainyena anaka.

Baki’ Abraham sibaya nanna Raja Abimelek

22Jaji andian dinen Raja Abimelek nanna panguluan tentarana, i Pikol asanna. Jaji mondok ira lo’a baki’ Abraham manjarum lo’a, “Daiko di’en dapamaamko tapat kole’a Alatala. Ai poang yang ikarajaan barasel kausana,” ingka kenang. 23“Jaji daiko, bajanjiko lo’ku’ di arona Alatala daiko ada’ko makalen lo’ku’ dari diri’ku’ mondok lo’a anak kanturunanku’ ona’. Awan daiak bua maamku’ lo’u arungko sabangon bua maamu lo’ku’ kenang bea lo’a negeri kosannu manamoeen di’en,” ingka kenang Raja Abimelek lo’a baki’ Abraham.

24Jaji barik dasauti kole’a baki’ Abraham, “O’, basumpa’ak mainya’,” ingka kenang.

25Jaji baki’ Abraham dinen manjarum lo’a Raja Abimelek manjarumang dinen loang kali palanan danum yang dalaan, darampas kole’a suro’anna rajaan.

26Jaji barik dasauti kole’a Raja Abimelek, “Taua, intain te’ manuun. Na’anak manamu, ambatupi manjarum lo’ku’,” ingka kenang.

27Jaji dameang barik ambata gulungan sapi, ambata gulungan domba dinen lo’a Raja Abimelek. Mamin dinen sibaya ira duaan.

28Jaji barik maminna akaus sibayana, andian bapi dinen tuju anak domba yang dapasilaanangen nanna inatang bokanen. 29Jaji dabele awan dinen, dakatoanang barik kole’a Raja Abimelek, “Ai ratina dinen anak domba tujuun ipasilaananga nanna yang bokanen,” ingka kenang.

30“Jaji ratina anak domba tujuun di’en kumeang lo’u, tandana iaka ampunaan loang kali palanan danum di’en. Iak yang mamolaan,” ingka kenang jaruma baki’ Abraham lo’a Raja Abimelek. 31Ialalo daasan loang kali dinen Berseba, kole’a sibayada’ dinen inangen.#21:31 Ratina berseba ilalam jarum Ibraniin antara dua. Pande ratina tuju, atau ratina loang kali sibayaan.

32Jaji kenang tutulanna. Sibaya ira duaan dinen inang, laloang mole’ dinen Raja Abimelek nanna i Pikol lo’a negeri urang Pilistinen. 33Jaji barik maminna dinen, baki’ Abrahampi mananam kayu tamariska inang di Berseba. Inang barik mangalonga lo’a asanna i Yahuwe yang tio’ salaun-launaan. 34Maminna dinen de’i, balaun bua baki’ Abraham manamoena di negeri urang Pilistinen.

Currently Selected:

Di Mulakata 21: EBE

Highlight

Copy

Compare