Di Mulakata 20

Baki’ Abraham panganung-nganung, piang Sara daasan poang arina

1Jaji baki’ Abraham mamalin barik lo’a daerah Negeb laloang lalako’ indinang antarana banua Kades nanna banua Sur. Launna inanga andian baki’ Abraham lalako’ sikadang di banua Gerar. 2Jaji di banua Gerar inang barik baki’ Abraham masan lo’a piang Sara dinen arina. Jaji dadalinga awan dinen kole’a Raja Abimelek, daia manyuro’ tau itiang mala lo’a piang Sara.

3Maminna dala dinen, manjarum Alatala lo’a Raja Abimelek ilalam muina, “Mateko di’en kole’a babainye yang ialaan iko dinen. Kole’a andian mamin lakina babainye dinen,” ingka kenang Alatala lo’a raja dinen.

4Jaji kosanpi jalu adariin. Nampi dainso’i dinen piang Sara. Jaji manjarum rajaan lo’a Alatala, “Ado Paraampuane, ai lo’a tau kosanen kasala’anna pande iduno’ iko?” ingka kenang. 5“Babainye dinen okan kupo. Kole’a ate maamku’ lo’a, ate bareseku’. Daia dinen daasan kole’a i Abraham arina. Diri’api masan kakana,” ingka kenang jaruma rajaan lo’a Alatala.

6Jaji manjarum barik Alatala ilalam muina, “Kutamu maama atenu. Ialalo na’annu kupalaloang badosa. Na’anko adari mainso’i lo’a,” ingka kenang. 7“Na, awandi’en barik, babainye dinen pole’ lo’a lakina. Kole’a daiapi dinen panjarumku’ bea. Ona’ dinen dado’aangko bua mainto’ na’annu mate. Poangsi ti’en na’an ipole’ iko, kudukum mateko sarata nanna ambata gulungannu dinen. Arung itamu iko,” ingka kenang jaruma Alatala lo’a Raja Abimelek.

8Jaji malam-malam barik asadinga, dakalong ambata suro’anna kole’a Raja Abimelek, dajarumang lo’da’. Sampai atakuta tauen mandalingana. 9Jaji dasuro’ mondok bea dinen baki’ Abraham. Maminna mondok baki’ Abraham, “Asi kenang maam-maama karajanu lo’ku’? Ai sala’ku’ lo’u to’ manyuro’ lo’am nanna umatku’ daukum kole’a dosaan. Saja na’an patut basa awan dinen. 10Ai ratina awan dinenen?” ingka kenang rajaan lo’a baki’ Abraham.

11Jaji barik, “Asi na’anku’ kenang. Kenangak lalo. Kole’a de’i bapikirak, tauen indi’angen kosanpi atakuten lo’a Alatala. Ungka’enak dauno’ kole’a tauen ati’en tau baingin lo’a bainyeku’, ingka kenang nyawaku’. 12Kenang bea dinen, daia sairunku’ memen. Sarilao’ amanam, silaan indunam. Dapasialaang barik nanku’. 13Kenang bea dinen di tanga’ dalanen di maminna Alatala manyuro’ lo’ku’ marantang saona ama’ku, manjarumku’ memen lo’a bainyeku’, Ati’en andian tau matoanang kapi disa-isa lamba’ka’, asanak sairunnu. Mase’ak di’en, uka’ kenang lo’a,” ingka kenang manjaruma baki’ Abraham lo’a Raja Abimelek.

14Barik raja dinen dala gulungan ambata dombana, ambata sapina, ambata gulungan pangkam babaka babainyeen, daunjukang lo’a baki’ Abraham. Bainyena dapole’ bea. 15Jaji manjarum barik, “Bele poang kadakuun kosan lalako’u di negeriku’ di’en,” ingka kenang. 16Jaji manjarum bua dinen Raja Abimelek lo’a piang Sara, “Na, maminak dinen mamayar lo’a kakanu duit saribu papaka,” ingka. “Duit dinen pameang kasopannu kole’a kosanna kasala’annu,” ingka kenang dinen Raja Abimelek lo’a piang Sara.

17-18Jaji bado’a barik baki’ Abraham mando’aang dinen lo’a Raja Abimelek. Kole’a de’i, launna andianna piang Sara di saona rajaan, kosan babainye inang dapat araunting. Tamanang kausa barik. Jaji maminna barik dado’aang lo’a Alatala, dapamaam padisa i Abimelek. Inyap bea padisa samuana dinen babainyeen, dapat aranak barik.

Currently Selected:

Di Mulakata 20: EBE

Highlight

Copy

Compare