Di Mulakata 19

Banua Sodom nanna banua Gomora datampusi

1Jaji di pamamalamen barik ira dua malaikaten yang lamba’en de’i mondok lo’a akata banua Sodom inang. Baki’ Lot dinen aduduk di baba’ mambanganen yang di pakar tagap banuaan. Jaji dakita dinen malaikaten, akadeng barik baki’ Lot laloang sunsumang kalena lo’a tana’en manyialoina lo’da’. 2“O Pa’, sengka’kin poang. Samalamkin di saoku’. Kusuk kakinin inang. Maminna dinen, mina’ baru’ laloang kalenin lamba’ bapi,” ingka kenang jaruma baki’ Lot.

Jaji dasauti kole’da’ duaan dinen, “Na’an. Indi’angkam poang samalamen di tana’ rawang banuaan,” ingka kenang ira duaan lo’a baki’ Lot.

3Jaji barik maminna dinen dapamiya’ ira duaan kole’a baki’ Lot. Kapanjang dapamiya’a, mainya’ bua ira duaan tamba nanna baki’ Lot. Inait ira lo’a saona baki’ Lot. Laloang barik ira inang mangamasang jalu kaan bayu’-bayu’. Dapolaang roti dinen kosanen ragina. Jaji angkaan ira duaan inang.

4Malam asoon rabarik, nampina ira mamparang ale’, mondok dinen gulungan babakaan kukuliling lo’a saona baki’ Lot. Mondok kausa maira tatak sao. Andian yang atoaan andian bea dinen gulungan anak bakasen. 5Jaji mangalong barik, “Disa tamoeen dinen yang mondoken lo’a saonu,” ingka kenang. “Awa insaluanjo, to’ dinen idinjami ikam,” ingka kenang, to’ mamola basa na’anen baguna babaka sama babakaan.

6Jaji mandalinga dinen, baki’ Lot laloang minsaluan lo’da’. Dakaputi mambanganen ibalakanga. 7Maminna dinen manjarum marada’i lo’da’, “Ada’ kawane. Kupita jaji lo’in ada’ ipakai basa na’anen baguna awan dinen,” ingka. 8“Andian anakku’ babainyeen dua, yang babainye bungasen. Na’anen kala’ dakaru babakaan. Dinen poang kupainsaluanen lo’in. Bele poang ikarajana ikin. Ai poang to’ kadakinen,” ingka kenang. “Poangsi ira yang mondoken lo’ku’, ada’ bayu’ basa aina. Kole’a ialalo mondoka lo’ku’, manyari palindungan lo’ku’,” ingka kenang jaruma baki’ Lot lo’a ira babaka bayu’en dinen. Hak. 19—21.

9Jaji maminna dadalinga jaruma baki’ Lot dinen, “Ada’ mangaruun,” ingka kenang lo’a baki’ Lot.

Mamin dinen sijaruman sama diri’a, “Na, i Lot dinen to’ mamutusi lo’ka’ kakaru’, padahal panumpang poang indi’angen,” ingka kenang.

Laloang manjarum bapi lo’a baki’ Lot, “Se’, lo’di’ko. Ira di’en to’ ipase’ang iko, labi ajau’ barik karajanam lo’u,” ingka kenang ira babakaan. Insang-insang dinen sansang-sansangang kalena lo’a baki’ Lot dinen dajuluang mambanganen. To’ dararak.

10Jaji barik ira babaka duaan, laloang dala dinen baki’ Lot. Datarik ilalam laloang dakaput mambanganen. 11Jaji barik ira babakaan dinen maam akeke’en kenang bea baraa’en, samuana ira dasuro’ bauta. Jaji na’an dadua’ang barik mambanganen, manasar poang dinen ira gulungan babaka insaluanen.

12Jaji barik manjarum ira babaka duaan, “Intain poang ambatin yang indi’angen? Ati’en andian inantunin yang babakaan ataupun araanakin, awa insaluan dari banua di’en. 13Daikam di’en dasuro’kam kole’a i Yahuwe itiang manampusi lo’a banua di’en,” ingka kenang. “Kole’a kajau’an banua di’en mamuko-muko dadalingana kole’a i Yahuwe. Ialalo to’ datampusina banua di’en,” ingka kenang ira babaka duaan lo’a baki’ Lot.

14Jaji lamba’ barik baki’ Lot lo’a taju’a anaka duaan dinen, “Na, daiki’ arariki’ dari banua di’en. Kole’a banua di’en to’ datampusi kole’a i Yahuwe,” ingka kenang. Jaji barik dinen taju’a anaka duaan dinen na’an parasaya’. Daasan poang baki’ Lot de’i aradai’ poang lo’da’ duaan.

15Jaji malam-malam barik, manjarum malaikaten lo’a baki’ Lot, manjuluang manyuro’ arari, “Ararikin. Awa bainyenu nanna anaku duaan di’en. Tarangkatkin. Kapi’ang kalenin mainto’ na’annin tamba idukum nanna banua di’en,” ingka kenang.

16Jaji baki’ Lot dinen bapikir, dua-talupi pikiranna. Jaji dinen dabele kole’a ira babaka duaan, datarik jaji di tanganna ira ampat panaken dinen, dabibit insaluanna banuaan. Kole’a dinen i Yahuwe mangamase’i lo’da’, dapase’ang mate. 17Mondok insaluan, manjarum dinen babaka seraan, “Ararikin, rariang kalenin mainto’ na’annin mate. Ada’ mamele baliken. Ada’ dinen manaaten indi’angen di tana’ rataan. Manyarikin ukit. Inang kosannin mainto’ na’annin tamba idukum,” ingka kenang babaka seraan lo’da’.

18-20Poangsi baki’ Lot na’an dakule’. Jaji manjarum lo’da’, “Ado Paraampuane, na’anak parambit lo’a dinen. Mateak ona’ darambit kole’a jalu bahayaan,” ingka kenang. “Bele inang banua akeke’en yang mainso’en dinen. Parambitak ti’ lo’a dinen. Na’an bea baraa, paruarang poang lo’ku’ arari lo’a dinen mainto’ tio’ku. Kole’a launna di’en bayu’ mamin pangamase’inin lo’ku’ sampai ikatio’ak ikin dari jalu bahayaan. Ikamainya’iak pan ikin,” ingka kenang jaruma baki’ Lot lo’a babaka duaan dinen.

21Jaji barik dasauti kole’a babaka seraan, “Kenang mainya’. Banua akeke’en dinen na’an kutampusi. 22Poangsi arariko babariar. Kole’a launna nampinin mondok lo’a dinen, kosan jalu dapaten kuanu. Ti’kin mamin mondok lo’a dinen baru’ itampusi banuaan,” ingka kenang. Ialalo ratina banua dinen iasan barik Soar,#19:22 Ilalam jarum Ibraniin soar dinen, ratina akeke’. kole’a akeke’a.

23Jaji barik mondok baki’ Lot lo’a banua Soar, mamin imbar asoon. 24Maminna dinen barik, baru’ dalao’ uran apiin diaset, uran melerangen kole’a i Yahuwe. 25Jaji banua duaan dinen datampusi kole’a i Yahuwe. Ambata umata, ambata gulungan akat jalu tio’en, datampusi kausa yang di tana’ rataan daerah inang. 26Poangsi de’i bainyena baki’ Lot yang malola’ imundiin inang, na’an dapaduli jaruma malaikaten. Mamele balik ibalakanga. Jaji mate bea bainyena baki’ Lot padari pakayu sia’en.

27Jaji makapen barik baki’ Abraham asading babariar nampina tabae’ matasoon, lamba’ lo’a kosan sijarumanna nanna i Yahuwe. 28Jaji barik dabeleang matana lo’a tana’ rataan inang, maro lo’aan banua Sodom nanna banua Gomora, andian rimbu yang bakayaan, awan lalo uma yang akarumpangen atutunga.

29Ialalo tutulanna i Yahuwe de’i manyautina lo’a do’ana baki’ Abraham. Nampina datampusi banua yang di tana’ rataan dinen yang dalalako’iin kole’a baki’ Lot, dapainsaluan tajolo dinen baki’ Lot.

Baki’ Lot nanna anaka mamola salaka

30Jaji baki’ Lot, to’ lalako’ di banua Soar, atakut. Jaji lamba’ ira talu panaken manyari ukit, manyari loang batu. Inang barik kosanna nanna anaka. 31Jaji manjarum anaka yang atoaan lo’a arina, “Jaji daiki’ di’en kosan babakaan itiang sarilao’ tindo’en nanka’ awan kabiasa’anen di duniaan. Kenang bea ama’ka’ mamin atoa,” ingka kenang. 32“Labi maam ipainyumi iki’ ama’ka’ nanna angguren mainto’ dinen mangalona uluna. Sitindo’anki’ barik nanna mainto’ andianna kanturunanka’ nanna ama’ka’,” ingka kenang sijarumanna ira dua pariin.

33Jaji malamen dinen dapainyumang dinen angguren kole’a anaka lo’a baki’ Lot. Jaji barik di malam dinen mole’ dinen anaka atoaan lo’a amana. Tindo’ lapoang amana. Ai poang dapolaan di malamen dinen na’an datamu amana kole’a mangalona uluna. Na’an datamu alenga’a, na’an datamu aduduka anaka dinen.

34Jaji barik aso seraan, manjarum bapi anaka atoaan, “Daiak maminak sitindo’an nanna ama’ka’,” ingka kenang. “Jaji malam di’en ipainyumi bapi ama’ka’ nanna angguren. Ikopi sitindo’anen nanna mainto’ andianna kanturunanka’ nanna ama’ka’,” ingka kenang manjaruma anaka atoaan lo’a anaka imundiin. 35Jaji malam dinen dapainyumang bapi angguren lo’a amana manyuro’ mangalo bapi uluna. Anaka yang imundiin barik mole’en lo’a amana sitindo’anen nanna. Na’an bapi datamu kole’a amana. Na’an datamu alenga’a, na’an datamu aduduka anaka dinen.

36Jaji barik araanaka duaan dinen araunting duana kole’a amana. 37Jaji aranak anaka yang atoaan, babaka. I Moap asanna. Ialalo dinen manurunangen lo’a gulungan urang Moap yang andianen sampai aso di’en. 38Jaji anaka imundiin dinen aranak bea, babaka bapi. Anaka dinen i Ben-ami asanna. Ialalo dinen yang manurunangen lo’a gulungan urang Amon yang andianenpi sampai aso di’en.

Currently Selected:

Di Mulakata 19: EBE

Highlight

Copy

Compare