Di Mulakata 18
18
Andian tau mondok lo’a baki’ Abraham
1Jaji di waktu baki’ Abraham lagi’pi lalako’ mainso’ lo’a akat kayuna i Mamre, i Yahuwe paitang kalena lo’a. Mamin sisiak asoon. Jaji baki’ Abraham dinen aduduk di kakalang palamba’a di baba’ mambanganen. 2Jaji aduduk inang, dabeleang barik matana, dakita andian inang mantuari talu akadeng tumbalianen nanna. Jaji karuru barik lamba’a lo’da’ indinang pasidua’ang kalena nanda’. Maminna dinen tundukang kalena lo’a ira taluun dinen tanda hormata lo’da’.
3Jaji barik manjarum baki’ Abraham, “O Pa’, sengka’kin sikadang. Ada’ poang ilaloiku’ suro’annin di’en, ti’enkin saja mangamainya’i lo’ku’,” ingka kenang. 4“Mala danumakpi ijolo itiang pangusuk kakinin. Sangariankin poang di kaunganen. 5Mala anak jalu kaanakpi kakapit lo’in itiang patio’ anak uratin, pamaam lolo’ tolangin. Baru’kin pande lamba’ maminnin sengka’ nanku’,” ingka kenang baki’ Abraham lo’da’ taluun.
Jaji manjarum barik ira taluun lo’a baki’ Abraham, “Kenang mainya’,” ingka kenang.
6Baki’ Abrahampi dinen barik pakaruru kalena lamba’ lo’a kakalang palamba’a dinen terus manyuro’ lo’a piang Sara dinen, “Se’ babariar. Ile’i dinen tepung sakarung yang palin maamen. Ipola itiang roti,” ingka kenang manjaruma dinen baki’ Abraham lo’a piang Sara.
7Jaji maminna dinen barik, baki’ Abrahampi dinen arari lo’a gulungan inatangen. Mondok inang barik daile’i anak sapi sera yang maamen, yang babago’en. Laloang dasuro’ sembeli lo’a suro’anna. Suro’annapi dinen pakaruru to’ mangamasang isi’ inatangen. 8Kenang bea dinen baki’ Abraham mole’ lo’da’ mawa susu’ sapi yang baru dapara’angen. Daawa bea dinen susu’ jalu dapolaan dinen nanna isi’ sapi yang dakamasangen de’i. Samuana dinen barik dasorongang lo’da’. Baki’ Abrahampi dinen akadeng mamele lo’da’ yang angkaanen di akat kayuun inang.
9Jaji manjarum ira dinen lo’a baki’ Abraham, matoanang dinen lo’a bainyena, “Isasi bainyenu?” ingka kenang jaruma ira dinen lo’a baki’ Abraham.
“Andian bua di kakalang palamba’en,” ingka kenang baki’ Abraham lo’da’.
10Jaji barik, “Daiak taun sera,” ingka, “pasti mole’ lo’a di’en nannin. Nanga dinen ona’ bainyenu aranaka, mandua’ang anak babakaan,” ingka kenang sera dinen lo’a baki’ Abraham.
Jaji tutulan ira inang de’i, piang Sara dinen manaan talingana di mambangan kakalangen ibalakangda’ dinen yang angkaanen. 11Jaji baki’ Abraham nanna piang Sara dinen mamin atoa. Mamin laloan umura piang Sara. Na’an pande lagi’ aranak. 12Ialalo barik maminna dadalinga jarumda’ dinen tatawa dinen piang Sara ilalam atena, “Di maminku’ atoa di’en isasi lagi’ to’ manyari anak sarilao’ nanna lakiku’. Lakiku’pi dinen atoa bea,” ingka kenang jaruma piang Sara ilalam atena.
13Maminna dinen manjarum i Yahuwe lo’a baki’ Abraham, “Maisi tatawana bainyenu dinen i Sara, na’an patut ingka aranak kole’a maminna atoa. 14Ti’ lo’a Alatala kosan jalu na’an patut. Kosan jalu badidit,” ingka kenang jaruma i Yahuwe lo’a baki’ Abraham. “Awan bua bayaku’ lo’in dinen, kosan jalu na’an adari,” ingka kenang. “Mondok bulanna ona’ taun sera, mole’ak lo’a di’en. Daiapi ona’ dinen paranakang anak babakaan,” ingka kenang.
15Jaji barik dadalinga jaruma i Yahuwe kole’a piang Sara dinen, “Na’anak tatawa,” ingka kenang.
“Na’an,” ingka, “Tatawako lalo,” ingka kenang i Yahuwe. Kole’a na’anna mangaku’ dinen piang Sara, kole’a atakuta.
Alatala manjarumang ukum yang to’ dapamondokangen lo’a banua Sodom nanna banua Gomora
16Jaji tarangkat barik ira taluun dinen lamba’ manuju lo’a banua Sodom. Baki’ Abraham mantat lo’da’ mauluang di dalanen. 17-18Jaji barik bapikir i Yahuwe dinen ilalam atena, “I Abraham di’en ona’ pasti padari banua baraa’en. Kira tatak banuaan inyaunga galung suanen to’ mandua’ang jalu maamen malaloi lo’a. Jaji na’an patut kulamun lo’a i Abraham di’en jalu to’ kuanuun lo’a banua Sodom nanna banua Gomora. 19Kole’a daia dinen tau mamin kudile’i di antarana tau bayu’en itiang mamarinta lo’a araanaka, lo’a araampuna turun-manurun. Arung dasuro’ mawa basa tapaten, basa mandua’en itiang malola’ani panamuku’. Mainto’ maminna daajar dinen kupadari barik ambata bayaku’ lo’a,” ingka kenang jaruma i Yahuwe ilalam atena.
20Jaji manjarum i Yahuwe dinen lo’a baki’ Abraham, “Andian lapoang unyi kudalingaan di banua Sodom nanna banua Gomora. Awan lalo dinen jalu mamukoon lasana kajau’anna. Saja lolo to aborata kajau’anda’,” ingka kenang. 21“Jaji mamaraksaakpi lo’a dinen mainto’ kukitana jaji iak ti’ tapat awan dinen kajau’anda’,” ingka kenang. “Ati’en de’i na’an tapat, inang kutamuna. Ati’en de’i tapat inang bea kutamuna,” ingka kenang jaruma i Yahuwe lo’a baki’ Abraham.
22Jaji barik maminna akadeng ira inang, yang duaan dinen laloang koengang kalena lamba’ lo’a banua Sodom. Baki’ Abrahampi dinen akadengpi inang di arona i Yahuwe. 23Dainso’i barik dinen i Yahuwe kole’a baki’ Abraham. “Ai dinen tau banua Sodom nanna banua Gomora, tapat to’ itampusi kausa? Ipasiamang tau tapaten nanna tau ajau’en?” ingka kenang. 24“Ai kirana andian lima pulo’ poang tau yang tapaten, itampusiaka banua dinen? Na’anko to’ mangamase’i lo’a banua dinen kole’a tau lima pulo’en dinen? 25Na’an patut tau tapaten ipasiamang uno’a nanna tau ajau’en. Kutamuko Paraampuane, bajao’ko to’ awan dinenen. Tentu adelko yang mamutusiin ibona mantuariin kausana,” ingka kenang jaruma baki’ Abraham lo’a i Yahuwe.
26Jaji manyauti barik dinen i Yahuwe lo’a baki’ Abraham, “Ona’ kusaripi ijolo. Ati’enak ona’ mandua’ang mantuari lima pulo’ ambata yang tapaten di banua dinen de’i, na’an kutampusi kole’a andianna tau lima pulo’en dinen,” ingka kenang jaruma i Yahuwe lo’a baki’ Abraham.
27Jaji manjarum bapi baki’ Abraham lo’a i Yahuwe, “Baraniak kakaru’ manjarum lo’u, Paraampuane, kapisi kosan dampe ratiku’ di’en. 28Jaji ai dinen ati’en kurang lima tau tapaten, andian ampat pulo’ lima poang, to’ itampusi iko?” ingka kenang manjaruma baki’ Abraham lo’a i Yahuwe.
Jaji dasauti dinen baki’ Abraham kole’a i Yahuwe, “Ati’en de’i andian tau tapaten ampat pulo’ lima, banua dinen na’an kutampusi,” ingka kenang i Yahuwe lo’a baki’ Abraham.
29Jaji manjarum bapi dinen baki’ Abraham lo’a i Yahuwe, “Ai lo’a ati’en andian poang ampat pulo’, itampusiaka banua dinen?” ingka kenang jaruma baki’ Abraham lo’a i Yahuwe.
Jaji dasauti barik kole’a i Yahuwe, “Ati’en andian ampat pulo’ yang tapaten, banua dinen na’an kutampusi kole’a ampat pulo’en dinen,” ingka kenang manyautina i Yahuwe lo’a baki’ Abraham.
30Jaji manjarum bapi baki’ Abraham, “Ada’ko arasiin Paraampuane, manjarumakpi lo’u. Ai lo’a ti’en andian tiga pulo’, itampusiaka banua dinen, na’anaka?” ingka kenang jaruma baki’ Abraham.
Jaji manjarum bapi i Yahuwe, “Ati’en andian tiga pulo’ yang tapaten, na’an kutampusi banua dinen,” ingka kenang.
31Jaji manjarum bapi baki’ Abraham, “Baraniakpi manjarum lo’u Paraampuane. Ai lo’a ati’en andian dua pulo’?” ingka kenang.
“Ati’en andian dua pulo’, na’an kutampusi,” ingka kenang.
32Jaji manjarum bapi, “Ada’ko arasiin Paraampuane, manjarumakpi sakali. Ai lo’a ati’en andian sapulo’?” ingka kenang.
“Ati’en andian sapulo’ na’an kutampusi,” ingka kenang manjaruma i Yahuwe.
33Jaji mamin akaus sijarumanda’ dinen, i Yahuwe dinen laloang lamba’. Baki’ Abrahampi mole’.
Currently Selected:
Di Mulakata 18: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
