Di Mulakata 17

Baki’ Abram dameang tanda bayana Alatala

1Jaji maminna sumilan pulo’ sumilan taun umura baki’ Abram dinen, i Yahuwepi paitang bapi kalena lo’a. Jaji barik manjarum, “Daiak di’en lalo Alatala yang Palin Bakuasaan. Daiko arung parandam lapoang lo’ku’, arung tio’ barese di jolona aroku’. 2Daiakpi kupadari bea bayaku’ lo’u. Kupabayu’ ona’ kanturunannu sampai nyangka’ tapat,” ingka kenang i Yahuwe lo’a baki’ Abram.

3Jaji barik baki’ Abram laloang paraba’ kalena di arona, sunsumang kalena manyembana lo’a Alatala. 4Jaji barik manjarum Alatala lo’a, “Na bayaka’ duaan, yang tanggung jawapku’, daiko ona’ to’ manurunang bayu’ jaji bangsa,” ingka kenang. 5“Jaji okan lagi’ Abram asannu. Asannu barik Abraham kole’a bayu’ ona’ bangsa mantuariin to’ pabaki’ lo’u.#17:5 Ratina jarum abram ilalam jarum Ibraniin, ama’ yang ipaduliin. Jarum Abraham dinen ratina, amana tau bayu’en. 6Daiko kanturunannu ona’ bayu’ bangsana, bayu’ rajaan,” ingka kenang. 7“Jaji sibayaka’ di’en okan poang antaraka’ duaan, antaraka’ nanna gulungan anak kanturunannu turun-manurun sampai mondok lo’a anak ituntung, lo’a anak ipuit. Iak yang to’ padari Alatalanin nanna anak kanturunannu,” ingka kenang. 8“Daiko awandi’en manumpang poangko indi’angen di Kana’an. Poangsi ona’ tana’ di’en kumeang lo’in nanna ambata anak kanturunannu. Iak ona’ yang padariin Alatalada’,” ingka kenang jaruma Alatala lo’a baki’ Abraham.

9Jaji manjarum bapi Alatala lo’a baki’ Abraham, “Na bayaka’ di’en, andian bea tanggung jawapu. Bayaka’ di’en arung ipakai ikin turun-manurun. 10-11Jaji kenang baya antaraka’ nanna anak kanturunannu, arung ipakai adat sunaten. Arung isunat kausana kira babakaan itiang tanda bayaka’ duaan. 12Tarangkat awandi’en kira babakaan yang maminen umur lapan aso arung isunat. Maam tau iparanakangen ilalam kuasanin, kenang bea tau ibaliin ikin lo’a tau bokanen, samuana arung isunat. 13Gulungan pangkamen yang iparanakangen ilalam kuasanin, arung isunat. Gulungan pangkam ibaliinpi arung isunat. Dinen barik padariin tanda di kulitin itiang tanda bayaka’ di’en sampai salaun-launna. 14Ti’en de’i andian di antaranin babakaan yang na’anen isunat, ratina daia na’an manampungi bayaka’ di’en. Daia dinen ona’ ilaanang lo’a tau banuana. Na’an lagi’ ianggap anak kanturunannu,” ingka kenang jaruma Alatala lo’a baki’ Abraham.#17:14 Ataupun pande bea kenang salinna, “Daia dinen arung itampusi.”

15Jaji manjarum bapi Alatala lo’a baki’ Abraham, “Ti’ awan bainyenu dinen, ada’ barik iasanna i Sarai. Arung iasan i Sara barik.#17:15 Dalam jarum Ibraniin, ratina sara dinen, anak raja babainyeen. 16Kole’a kenanga kupalinang asanna, daia ona’ to’ kupamaam, to’ kunoangkin anak nanna i Sara dinen. Kupamaam sampai bayu’ ona’ bangsa mantuariin papiangen lo’a bainyenu. Andian ona’ rajaan antarana kanturunanna,” ingka kenang jaruma Alatala lo’a baki’ Abraham.

17Jaji maminna dadalinga jaruma Alatala kole’a baki’ Abraham, laloang paraba’ kalena, sunsumang kalena lo’a tana’en. Ilalam sunsumanga kalena dinen, tatawa ilalam batak nyawana sarta manjarum di atena, “Isa bisana tau saratus taun umura dapat mandua’ang anak? Kenang bea bainyeku’ yang sumilan pulo’ taun umura, isa bisana aranak?” ingka kenang nyawana. 18Jaji manjarum barik lo’a Alatala, “Muda-muda i Ismael dinen tio’ maam di jolona aronu,” ingka kenang jaruma baki’ Abraham lo’a Alatala.

19Jaji manyauti barik Alatala, “Kenang lalo. Poangsi ilalam bayaku’ di’en, bainyenu i Sara dinen yang to’ paranakang anaku babakaan. Arung iasan barik iko i Isak. Bayaku’ di’en kupadari nanna anak kanturunanna sampai mondok lo’a anak ituntung, lo’a anak ipuit. 20Kenang bea awan dinen jarumu yang mamitangen lo’a anaku i Ismael dinen, jaji daiapi dinen to’ kuberkati. Kupabayu’ kanturunanna. Kumeang anaka babakaan dua belas yang to’ mangkamen. Kanturunanna kupadari bangsa baraa’en. 21Poangsi dalam bayaka’ duaan, okan lo’a i Ismael. Kupadari iak nanna anaku i Isak dinen yang to’ daparanakangen kole’a i Sara musim di’en taun sera,” ingka kenang jaruma Alatala lo’a baki’ Abraham. 22Maminna akaus dinen sijarumanna nanna baki’ Abraham, Alatalapi dinen mole’ inait, marantang lo’a baki’ Abraham.

23Jaji barik di aso dinen bua baki’ Abraham malola’ani kausa jaruma Alatala. Baki’ Ismael dinen dasunat. Sarata samuana ambata tau nanna, yang babakaan dasunat kausana. Maam yang daparanakangen ilalam kuasana, kenang bea yang dabaliin, samuana dasunat. 24Jaji nanga dasunata dinen baki’ Abraham, mamin sumilan pulo’ sumilan taun umura. 25Baki’ Ismaelpi dinen mamin tiga belas taun umura. 26Jaji baki’ Abraham dinen dasunat. Di nanga aso dinen sama dasunat baki’ Abraham nanna baki’ Ismael anaka. 27Kenang bea samuana babakaan yang nannaan. Maam yang daparanakangen ilalam kuasana, kenang bea yang dabaliin lo’a tau bokanen, dasunat kausa di aso dinen.

Currently Selected:

Di Mulakata 17: EBE

Highlight

Copy

Compare