Di Mulakata 16

Andian anaka baki’ Abram nanna pangkama piang Sarai

1Jaji piang Sarai dinen, bainyena baki’ Abram, tamanang daia. Kosan anaka. Jaji andian pangkama bainyena, i Hagar asanna, urang Mesir. 2Jaji manjarum piang Sarai dinen lo’a baki’ Abram, “I Yahuwe di’en mamase’ang lo’ku’ aranak. Ati’enko mainya’ mainto’ kudua’ang anak, sialako poang nanna pangkamku’, i Hagar dinen. Ungka’en ona’ pande kudua’ang anak malaloi lo’a,” ingka kenang i Sarai.

Jaji baki’ Abram satuju bua nanna jaruma bainyena. 3Jaji di maminna barik sapulo’ taun lalako’a baki’ Abram di negeri Kana’an, adari barik. Daawa dinen pangkama kole’a bainyena lo’a lakina, dapasialaang nanna baki’ Abram. 4Maminna barik sarilao’ tindo’da’, araunting barik piang Hagar dinen.

Jaji barik piang Hagar dinen datamu diri’a araunting, jaji barik patoa-toa kalena lo’a paraampuanna, lo’a piang Sarai dinen. 5Jaji barik tarasa lo’a piang Sarai jalu dinen, jaji manjarum lo’a baki’ Abram, “Iko tanggung jawapen. Maminko kumeang bainye nanna pangkamku’. Rabarik dinen kole’a datamu diri’a mamin araunting, patoa kalena lo’ku’. Muda-muda i Yahuwe mamutusi panakaraka’ di’en,” ingka kenang dinen bainyena lo’a baki’ Abram.

6Jaji barik manjarum baki’ Abram lo’a piang Sarai dinen, “Bele iko. Ai poang mandua’a kole’u. Haku lalo dinen,” ingka kenang. Jaji piang Saraipi barik bakaras lo’a pangkama. Laloang rariang kalena dinen pangkama.

7Jaji piang Hagar barik dinen mamin rariang kalena, to’ mondok mamin lo’a kosan ateengen, lo’a mata danumen inang. Mata danum dinen di biring dalanen yang lo’aan Sur. Jaji mondok inang, dadua’ang barik kole’a malaikata i Yahuwe. 8Jaji barik dakatoani, “O Hagar pangkama i Sarai, dari sako de’i? To’ disako bea polana kalenu awan di’en?” ingka kenang manjaruma lo’a piang Hagar.

Jaji barik manyauti dinen piang Hagar lo’a, “Daiak di’en rariang kaleku’ lo’a paraampuanku’, i Sarai dinen,” ingka kenang.

9Jaji manjarum bapi malaikata i Yahuwe, “Daiko di’en mole’ko poang lo’a paraampuannu. Lola’ani poang panamuna,” ingka kenang. 10“Ona’ daiko di’en kupabayu’ anak kanturunannu. Na’an lagi’ ikule’ ikira ambata, lasana bayu’a,” ingka kenang jaruma malaikaten lo’a.

11Jaji barik manjarum bapi malaikata i Yahuwe lo’a piang Hagar, “Daiko di’en arauntingko. Anaku ona’ babaka. Arung iasan iko i Ismael kole’a i Yahuwe di’en mamin mandalinga lo’a nangisu ilalam parinsa’u,” ingka kenang.#16:11 Ratina ismael ilalam jarum Ibraniin, Alatala mandalingaan. 12“Jaji sipata anaku dinen ona’ awan lalo kaledaien yang batiin, yang na’anen kala’ dapajinaki tau. Daia dinen ona’ tau sipat malawan. Daiapi tauen malawan lo’a. Kosan lalako’anna dinen ona’ bajao’ lo’a ambata arasairunna bokanen,” ingka kenang jaruma malaikaten lo’a piang Hagar.

13Jaji maminna dadalinga awan dinen jaruma malaikaten, Alatala daasan barik kole’a piang Hagar El-Roi. Ratina, Alatala di’en mamele lo’ku’. Kole’a ingka nyawana, “Tapatak te’ mamin mangita lo’a Alatala yang mameleen lapoang lo’ku’?” ingka kenang piang Hagar dinen jarumina kalena. 14Ialalo ratina mata danum inang daasan Lahai-Roi.#16:14 Ratina jarum lahai-roi dinen, sumura tau yang tio’, yang tau mameleen lo’ku’. Kenang ratina. Mata danum dinen andianpi mondok aso di’en#16:14 Maksuta andian sampai mondok lo’a aso datulisa buku’ dinen kole’a baki’ Musa. antarana Kades nanna Bared inang.

15Jaji barik piang Hagar dinen paranakang anaka baki’ Abram dinen, babaka. Jaji daasan kole’a baki’ Abram, i Ismael. 16Jaji umura baki’ Abram waktu paranakanga i Ismael dinen, mamin lapan pulo’ anam taun.

Currently Selected:

Di Mulakata 16: EBE

Highlight

Copy

Compare