Di Mulakata 15

Alatala mamola bayana nanna baki’ Abram

1Jaji maminna baki’ Abram mala mole’ lo’a baki’ Lot, andian jalu dapaitangen kole’a Alatala lo’a. Ilalam jalu dapaitangen lo’a dinen, mondok jaruma i Yahuwe, “Daiko ada’ kalangganganen Abrame,” ingka kenang. “Andianak malindungi lo’u awan lalo jabangen. Kulindungi lo’a jalu ajau’en yang to’ manuun lo’u. Daiko ona’ baraa opa’u,” ingka kenang jaruma i Yahuwe lo’a baki’ Abram.

2Jaji maminna dadalinga dinen barik kole’a baki’ Abram, “O Alatala Yahuwe, jalu ai to’ itawa’angen iko lo’ku’? Ona’ dinen gulungan kamusanku’ alao’ kausa lo’a i Elieser, tau Damsik dinen. Kole’a daiak kosan anakku’. 3Ialalo alao’a kausana lo’a tau padariin pangkamku’ tarangkat dari paranakanga. Kole’a na’anko manoang lo’ku’ anak,” ingka kenang manjaruma dinen baki’ Abram lo’a i Yahuwe.

4Maminna dinen barik andian bapi jaruma Alatala lo’a baki’ Abram, “O dinen na’an kenang,” ingka. “Okan ia yang mandua’ang kamusannu. Ona’ yang mandua’angen, ia dinen anak diri’u,” ingka kenang manjaruma i Yahuwe dinen lo’a baki’ Abram.

5Jaji barik baki’ Abram dinen daawa minsaluan kole’a i Yahuwe. Mamin minsaluan, “Belejo gulungan bintangen di suanen. Suba ti’ ikule’ iko mangira insa’ ambatana,” ingka. “Awan dinen bua ona’ bayu’a kanturunannu, awan bintangen di suanen,” ingka kenang manjaruma i Yahuwe lo’a baki’ Abram.

6Jaji barik dataantalinga kole’a baki’ Abram, jaji parasaya’ barik. Jaji kole’a kaparasaya’anna lalo dinen daasanna tapat kole’a i Yahuwe yang baki’ Abramen dinen.

7Jaji manjarum bapi Alatala, “Iak lalo di’en i Yahuwe yang mamalinangen lo’u dari Ur di Babilonia. Kuawa lo’a di’en. Daiko to’ kusuro’ mangkam ona’ di negeri di’en,” ingka kenang manjaruma i Yahuwe.

8Jaji barik manyauti bapi baki’ Abram lo’a i Yahuwe, “Matoaniak lo’u, Alatala Yahuwe, ai tandana iaka ampunaan, iaka mangkamen lo’a negeri di’en?” ingka kenang manyautina lo’a i Yahuwe.

9Jaji dasauti bapi dinen kole’a i Yahuwe, “Na ati’enko to’ manyari tanda bukti to’ ikona ampunaan, awa dinen anak sapi sera, anak kambing sera, anak domba lakiin sera. Samuana dinen arung talung taun umura. Burung takukur sera, burung merpati sera,” ingka kenang paba’ina i Yahuwe lo’a baki’ Abram.

10Jaji barik gulungan inatang daawaan dinen lo’a i Yahuwe, samuana dinen dauno’. Dabala’ dua. Sabala’ dinen dataro’ di kayoko’, sabala’ dataro’ di katona. Kenang kausa kira baranana. Burungen dinen dauno’ bea poangsi na’an dabala’. Dataro’ poang inang. 11Mamin dinen tador bea gulungan burungen to’ angkaan jalu mateen. Poangsi burung dinen darabak kole’a baki’ Abram.

12Jaji barik di maminna tasulup matasoon dinen, tindo’ baki’ Abram. Maam tapat tindo’a. Jaji di tindo’a dinen mondok barik jalu araunen. Saja dom tetek, manyuro’ balasa atakutka’. 13Jaji manjarum Alatala, “Arung itamu iko di’en to’ adarina. Gulungan kanturunannu ona’ to’ mamalin lo’a negeri seraan. To’ lalako’ di banua tauen, yang okanen banua diri’a. Inang bea dinen to’ dala pangkama kole’a tau negeri dinen. To’ daparinsa’i ampat ratus taun launna,” ingka kenang. 14“Poangsi yang tau mala pangkamen dinen ona’ to’ kudukum,” ingka kenang. “Maminna barik kudukum, ona’ dinen to’ minsaluan bapi anak kanturunannu dari negeri dinen mawa kamaamanna bayu’-bayu’. 15Daikopi ona’ dinen mate maam, mate apupul. Na’anko mandua’ang jalu susaan dinen sampai mondok lo’a aso ikuburu. 16Rabarik di kanturunannu yang kaampaten baru’ to’ mole’ balik ira lo’a negeri di’en. Kupolana kenang dinen kole’a nampi tuli kajau’anna suku Amori di’en yang tau lalako’en di negeri di’en. Nampi to’ kudukum,” ingka kenang jaruma Alatala lo’a baki’ Abram.

17Jaji barik di maminna tasulup matasoon dinen, maminna mondok jalu araunen, andian paita jalu balu’ karan arimbuun, balu’ sulo’ adadale’en. Jaji barik jalu dinen lamba’ itanga’ di antarana ambata sapat inatang yang dajalaangen de’i. 18Inang lalo di aso dinen i Yahuwe manatap bayana lo’a baki’ Abram. “Na, banua di’en lalo kudunjukangen lo’a kanturunannu,” ingka kenang. “Dari batas negeri Mesir lo’a sunge Eprat, kanturunannu kausa ampunaan. 19Banuana urang Keni, banuana urang Kenas, banuana urang Kadmon, 20banuana ambata urang Het, urang Peres, urang Repaim, 21urang Amori, urang Kana’an, urang Girgasi, urang Yebus, daira kausana ampunaan. Kudunjukang lo’a kanturunannu,” ingka kenang bayana i Yahuwe lo’a baki’ Abram.

Currently Selected:

Di Mulakata 15: EBE

Highlight

Copy

Compare