Di Mulakata 14

Baki’ Abram matio’ lo’a baki’ Lot

1-3Jaji andian ira raja sikayo lima sabala’, ampat sabala’. Jaji raja yang ampaten sigulungan sikayo. Ialalo Raja Amrapel dari Babilonia, Raja Ariok dari Elasar, Raja Kedorlaomer dari Elam nanna Raja Tidael dari Goyim. Yang lima sabala’ sigulungan bea. Ialalo dinen Raja Bera dari Sodom, Raja Birsa dari Gomora, Raja Sinab dari Adina, Raja Semeber dari Seboim, nanna raja dari Bela yang daasanen bea Soar. Jaji samuana ira sumilanen mondok lo’a tana’ rata Sidim yang daasanen barik awandi’en Jawa Mateen.

4Jaji kenang dinen. Mamin dua belas taun launna ira limaan dajajaan kole’a Raja Kedorlaomer. Poangsi di taun yang katiga belasen, ira dinen malawan paratoranna raja dinen. Alibak daangkam. 5Jaji di taun kaampat belasen barik Raja Kedorlaomer dinen mamalas nanna ambata raja taluun yang sigulunganen nanna. Mondok kausa sikayo, to’ mangkam jaji barik. Laloang manalo ira lo’a raja limaan dinen. Atalo barik urang Repaim di Asiterot-Karnaim, urang Susim di Ham, urang Emen di Sawe-Kiryataim 6nanna urang Hori di gulungan ukit Edom.#14:6 Terjemahan Baru = pegunungan Seir; Kabar Baik = pegunungan Edom. Dariria bapi tauen sampai mondok lo’a Er-Paran yang di biringa kasik baraa’en. 7Mamin dinen mole’ balik ira lo’a Er-Mispat yang daasanen barik awandi’en Kades. Akaus atalo ambata urang Amalek nanna urang Amori yang tau lalako’en di Haseson-Tamar.

8Jaji maminna dinen lalo mondoka ira raja limaan de’i, raja Sodom, raja Gomora, raja Adina, raja Eboim, raja Bela. Araurean barik ira balana to’ sikayo inang di tana’ rata Sidim. 9Yang to’ dalawanen, ira raja ampaten, Raja Elam, Raja Goyim, Raja Babilonia nanna Raja Elasar.

10Jaji tana’ Sidim dinen bayu’ tapat loang kalina, loang kali tau mala aspal. Jaji arari dinen raja Sodom nanna raja Gomora, bayu’ ira alao’en. Alao’ lo’a loang kaliin, mate. Yang na’anen mate inang, rariang kalena lo’a gulungan ukiten. 11Samuana gulungan jaluna, gulungan jalu kaanna banua Sodom nanna banua Gomora akaus darampasi. Dala dinen kole’a raja manaloon. Laloang mole’ balik ira lo’a banuana. 12Jaji tamba bea baki’ Lot dinen, anak kamanakana baki’ Abram, darampas jaluna. Diri’api tamba datawan kole’a tauen, kole’a daia lalako’a dinen di banua Sodom.

13Jaji barik andian bea dinen mantuari yang dapaten rariang kalena, arari mawa dongo siuno’en dinen lo’a baki’ Abram urang Ibrani dinen. Baki’ Abram daia lalako’ di biringa ambata akat kayuna i Mamre dinen, urang Amori. I Mamre dinen sairunna i Eskol nanna i Aner. Samuana ira taluun kawanna baki’ Abram yang sigulunganen sikayo.

14Jaji barik datamu kole’a baki’ Abram dinen datingkama dala pangkama anak kamanakanna, laloang dakalong dinen kawanna laloang mangapulungang bala. Daawa ambata suro’anna dinen yang lalako’en nanna tarangkat dari akeke’a. Samuana ambata suro’an dinen andian tiga ratus lapan belas bayu’a. Jaji mauluang barik dinen baki’ Abram mawa balana malola’ lawanna sampai mondok lo’a banua Dan.

15Mondok inang di banua Dan, malamen barik, gulungan balana dinen dabagi dua itiang malawan lo’da’. Sampai atalo bua lawanna. Sampai dalola’. Dalola’ sampai mondok lo’a banua Hoba yang maro utara lo’a banua Damsik. 16Ilalam manalona dinen akaus darampas. Gulungan ambata jaluna inang akaus daawa mole’. Daawa mole’ bea dinen baki’ Lot anak kamanakanna baki’ Abram dinen nanna ambata jaluna. Daawa mole’ gulungan babainyeen nanna ambata tau bokanen.

17Jaji maminna manalo lo’a Raja Kedorlaomer nanna ambata raja sigulunganen dinen, to’ mole’ balik dinen, mondok barik lo’a tana’ rataan di Sawe. Ia bua dinen yang daasan Tana’ Rata Rajaan. Jaji mondok inang andian tau lamba’ pasidua’ang kalena nanna baki’ Abram. Raja Sodom yang lamba’en.

18Mamin dinen mondok bea i Melkisedek, raja Salem, mantat roti nanna angguren. Jaji raja Salem de’i ia bua dinen imam yang manyembaan lo’a Alatala yang Palin Baraa’en. 19Jaji barik manjarum i Melkisedek lo’a, mamberkati lo’a baki’ Abram, “Kupitaangko lo’a Alatala yang Palin Baraa’en, yang panyunyuangen duniaan nanna suanen. Kusuro’ pamaam lo’u Abrame. 20Ipudi bea Alatalaka’ yang Palin Baraa’en, yang maminen manyuro’ atalo musuna i Abram,” ingka kenang bado’ana atas asanna Alatala. Mamin dinen baki’ Abram daia manawa’i jalu parampasanna dinen sapulo’ paresen lo’a i Melkisedek.

21Maminna dinen barik, manjarum bapi raja Sodom lo’a baki’ Abram, “Ambata gulungan jalu parampasanen dinen, daiko kausana. Na’anak to’ mala mole’. Suma mantuariin poang, ambata isi’ banuaan yang itingkamen, dinen poang yang to’ kualaan,” ingka kenang dinen manjaruma raja Sodom lo’a baki’ Abram.

22Jaji barik dasauti kole’a baki’ Abram, “O dinen na’an. Kole’a daiak maminak basumpa di arona Alatala yang Palin Baraa’en dinen, yang panyunyuangen duniaan nanna suanen. 23Daiak uka’, kosan jalu kualaan. Kapi sasarik banang, kapi tali sandal, ati’en iko ampunaan na’an kuala. Alibakak ti’en iasanak ona’ iko padari kaya kole’a jalunu. Dinen yang kukalibakangen,” ingka kenang. 24“Suma yang kupitaan, jalu maminen dakaan kole’a gulungan anak bakasen yang malola’en lo’ku’. Sarata ira tau manggulungiin lo’ku’, ialalo i Aner, i Eskol nanna i Mamre, biar ira mala tawa’a. Yang daiaken na’anak mala,” ingka kenang manjaruma baki’ Abram lo’a raja Sodom.

Currently Selected:

Di Mulakata 14: EBE

Highlight

Copy

Compare