Di Mulakata 13

Baki’ Abram nanna baki’ Lot silaan

1Jaji barik baki’ Abram dinen minsaluan dari negeri Mesir dinen lamba’ lo’a daerah Negeb. Daawa bainyena nanna anak kamanakanna nanna ambata gulungan kamaamanna dinen. 2Jaji maam barik tio’a baki’ Abram dinen. Bayu’ ambata katio’anna, ambata amasa, piraka.

3Jaji barik lamba’ bapi dinen dari daerah Negeb, sangarian lola’ sampai mondok lo’a banua Betel. Inang lalo barik dapakadenga kakalang palamba’a antarana banua Betel nanna banua Ai, di tana’ dakosaniinjo dinen. 4Inang lalojo dapolana kosan panutung pamindaraan. Jaji mondok inang rabarik baki’ Abram, dakalong asanna i Yahuwe.

5Barik daia baki’ Lot dinen yang tambaan nanna baki’ Abram, bayu’ bea ambata gulungan kamaamanna, ambata gulungan dombana, ambata gulungan sapina, ambata gulungan uranga. 6Jaji to’ sarilao’ lapoang ira, na’an sumana ambata rimput di tana’en dinen dala patio’ ambata inatanga dinen. Bayu’ to kamaamanda’ duaan. 7Kapanjangan na’anna sumada’, mulai sipadu barik antarana ambata panuntuani inatangen. Suro’anna baki’ Abram sipadu nanna suro’anna baki’ Lot. Jaji nanga dinen ira urang Peres nanna urang Kana’an masipi lalako’ di negeri dinen.

8Jaji barik manjarum baki’ Abram lo’a baki’ Lot, “Jaji kenang anake, daiki’ di’en saparanakki’. Ada’ sampai manyuro’ sijai antaraka’ duaan, antarana suro’anka’. Kosan ratina,” ingka kenang. 9“Belejo ijoloka’. Baraapi tana’en. Labi maam silaanki’. Ti’enko kayoko’en, daiak katoenak. Ati’enko to’ katoen, daiak kayoko’enak,” ingka kenang jaruma baki’ Abram lo’a baki’ Lot.

10Jaji barik baki’ Lot dinen dabeleang matana, dakita dinen tana’ rataan di antarana ukit duaan, tana’ di biringa sunge Yordan. Maam tana’ dinen. Sukup danuma. Balu’ tanamanna i Yahuwe subura, balu tanaman Eden. Balu’ tana’ Mesir maro lo’a banua Soar. Nanga dinen nampi datampusi banua Sodom nanna banua Gomora kole’a i Yahuwe. 11Jaji maile’i barik baki’ Lot, ia barik to’ lalako’en di tana’ Yordan dinen. Jaji mamalin barik baki’ Lot maro timur. Silaan barik baki’ Abram nanna baki’ Lot dinen. 12Baki’ Abram daia lalako’ di Kana’an. Baki’ Lot daia lalako’ di Kana’an bea, poangsi daia inang di ambata banua di tana’ rataan inang. Kakalang palamba’a dapakadeng mainso’ lo’a banua Sodom. 13Tau banua Sodom dinen ajau’ jaji basada’. Tau badosa lo’a i Yahuwe.

14-15Jaji maminna barik silaan baki’ Lot nanna baki’ Abram, manjarum barik i Yahuwe dinen lo’a baki’ Abram, “Na, belejo. Bele kausana kuliling di’en. Samuana yang ikitaan iko, maro timur, maro barat, maro utara, maro selatan dinen kudunjukang kausa lo’u. Samuana daiko ampunaan turun-manurun sampai mondok lo’a anak ituntung, lo’a anak ipuit,” ingka kenang. 16“Kanturunannu ona’ kupabayu’. Sabangon nanna kutu tana’en lasana bayu’a. Ti’ dakule’ tauen mangira insa’ ambata kutu tana’en, dakule’ bea mangira ambata kanturunannu ona’,” ingka kenang. 17“Se’ lamba’i jaji. Bele kausana negeri di’en langkena nanna raana. Kole’a samuana di’en kudunjukang kausana lo’u,” ingka kenang i Yahuwe lo’a baki’ Abram.

18Jaji barik mamalin bapi baki’ Abram dari dinen, kakalang palamba’a dapakadeng mainso’ lo’a ambata akat tarbantin di Mamre yang inang di banua Hebron. Inang bapi dapolana kosan panutung pamindaraan itiang manyemba lo’a i Yahuwe.

Currently Selected:

Di Mulakata 13: EBE

Highlight

Copy

Compare