Palapasang 9

Dalao’i nanna tula kalimaan, inatangen mate dadua’ asampar

1Maminna dinen manjarum bapi Alatala lo’a baki’ Musa, “Se’ lamba’ko bapi lo’a rajaan. Mawa jarumku’ lo’a. Andian jaruma i Yahuwe, Alatala yang isembaan ikam urang Ibraniin dasuro’ jarumang lo’u, iko kenang. Anak katio’anna, ingka, arung iparuarang lamba’ itiang manyemba lo’a, ingka kenang. 2Ti’ na’an iparuarang iko, ingka, ti’ itaan lapoang, 3samuana gulungan ambata inatangen di tana’in to’ dalao’i nanna panyakit sampar yang palin balasaan. Maam kudaan, maam keledaien, maam untaan, kenang bea ambata gulungan sapi dombaan nanna kambingen, kosan ona’ na’anen dadua’. 4Suma poang na’anen dadua’ ona’, ambata gulungan inatanga urang Israelen. Dabeda dinen kole’a Alatala mainto’ kosan mateen yang di anak katio’anna kanturunanna baki’ Israel dinen. 5Jaji katentuan adarina bayana dinen di aso mina’. Mina’ tetap adari jalu dabayaangen dinen, ingka kenang jaruma i Yahuwe yang dasuro’ pamondokangen lo’u, iko kenang manjarumen lo’a rajaan,” ingka kenang jaruma i Yahuwe lo’a baki’ Musa.

6Jaji di aso seraan, dapamondokang lalo panyakit samparen kole’a i Yahuwe awan bua jaruma. Samuana ambata inatangda’ urang Mesiren dinen akaus mate. Poangsi inatanga kanturunanna baki’ Israel dinen tanto’ sera yang mateen. 7Jaji dapariksa barik kole’a rajaan, dasuro’ mabas lo’a dinen lo’a suro’anna, tapat bua. Tanto’ sera inatanga tau Israelen yang mateen. Poangsi bakaraspi atena raja dinen. Daia alibak paruarang lo’a tau Israelen lamba’.

Dalao’i nanna tula kaanamen, apadis tauen dadua’ bara’

8Maminna dinen manjarum bapi i Yahuwe lo’a baki’ Musa nanna baki’ Harun, “Mala kutu daar dari kosan panutungan batu bataan dinen, awa ikin di tangannin. Mondok ona’ di arona rajaan, iko Musa arung amborang inait kutu daar dinen ijolona rajaan. 9Maminna ona’ iamborang inait, kutu daar dinen barik to’ padari kutu tana’en yang palin alus sasara negeri Mesir. Laloang to’ manyuro’ datio’i bara’ kausa, bara’ yang atatasen. Maam mantuariin kenang bea ambata inatangen, akaus ona’ datio’i bara’ sasara negeri Mesir,” ingka kenang pesanna i Yahuwe lo’da’ duaan.

10Jaji dala kutu daar dari kosan panutungan batu bataan awan bua jaruma i Yahuwe, laloang lamba’ ira madap lo’a rajaan. Mondok ijolona inang, daamboraang inait bua kole’a baki’ Musa. Laloang padari kutu tana’en barik jalu dinen, manyuro’ datio’i bara’ kausa sasara negeri Mesir, maam lo’a mantuariin, kenang bea lo’a inatangen. 11Ambata gulungan tau bailmuunpi dinen na’an lagi’ dakule’ akadeng itiang madap lo’a rajaan lasana padisa. Kole’a okan poang tau biasaan dadua’ panyakit dinen, dadua’ bea tau bailmuun. 12Poangsi alibakpi rajaan manaantalinga lo’a jaruma baki’ Musa nanna baki’ Harun, awan bua jaruma i Yahuwe memen. Kole’a mamin atena rajaan dinen dapakarasang lo’a pikiran ajau’en kole’a i Yahuwe.

Dalao’i nanna tula katujuun, uran batu nanna kilaten

13Maminna dinen manjarum bapi i Yahuwe lo’a baki’ Musa, “Mina’ makapen arung bariar asadingin. Arungkin madap lo’a rajaan laloang manjarum lo’a, Andian jaruma i Yahuwe yang isembaan ikam urang Ibraniin, dasuro’ jarumang lo’u. Anak katio’anna arung iparuarang lamba’ itiang manyemba lo’a, ingka kenang. 14Kole’a ati’enko alibak, kali di’en to’ dapamondokang kausa gulungan ambata tula yang palin bakarasen lo’in, lo’a ambata anak buanu nanna suang negerinu. Dapolana kenang mainto’ itamuna jaji ikin kole’a ia lalo dinen yang palin baraa’en. Kosan bokan lagi’ sabangonen nanna inyaunga galung suanen. 15Kole’a sabenara, ingka, ti’en ikin nanna urangin mamin dalao’i memen nanna samparen, maminkin atampus. Kosankin lagi’ di duniaan, ingka kenang jaruma i Yahuwe. 16Na daiak kuangkatangu padari rajaan kosan tujuanku’ bokan, ingka kenang i Yahuwe. Suma sera poang tujuanku’, mainto’ tadongoku’ manaloon lo’u, datamu kole’a tauen. Maira tatak banua inyaunga galung suanen tadongoku’ barik, ingka kenang. Dinen lalo tujuanku’ mangkaten lo’u, ingka kenang manjaruma i Yahuwe yang dasuro’ jarumang lo’u raja’e.

17“Jaji daiko dinen, tapatko malawan lo’a anak katio’anku’ sampai awandi’en alibakko paruarang lo’da’. 18Jaji barik pada aso mina’a, kira-kira jam di’en, to’ dapamondokang lo’u uran batuun yang palin balasaan. Na’an kala’ mondok di negerinu balasa awan dinen, dari akat andianna negerinu mondok awandi’en.

19“Jaji manjarumko lo’a suro’annu, inatangu dinen, ambata gulungan anak katio’annu nanga dakumpul ilalam. Ai poang andianen di tana’en arung iawa kausa ilalam, mainto’ na’anna mate. Kapi mantuariin, kapi inatangen ti’ darambit ona’ kole’a uran batuun inang di tana’en, tetap daia mate ti’ na’aan iawa ilalam, iko kenang lo’a rajaan,” ingka kenang paba’ina i Yahuwe lo’a baki’ Musa.

20Jaji dajarumang jarum dinen, antarana ambata anak buana rajaan mandua’ atakuten lo’a jaruma i Yahuwe dinen, yang mainya’en malola’ani, terus daawa ilalam ambata pangkama nanna inatanga, dasuro’ mole’ ilalam. 21Poangsi mandua’ tau pebelen lo’a jaruma i Yahuwe, dapalaloang poang ambata pangkama nanna anak katio’anna inang di tana’en.

22Jaji manjarum barik i Yahuwe lo’a baki’ Musa, “Na, tanggeang tangannu lo’a suanen mainto’ alao’a uran batuun sasara negeri Mesir. Mainto’ alao’a lo’a mantuariin, lo’a inatangen, lo’a ambata jalu tio’en di uman. Arung dadua’ kausa,” ingka kenang pesanna i Yahuwe lo’a baki’ Musa.

23Jaji datanggeang barik tungkata inait kole’a baki’ Musa, laloang i Yahuwe dinen terus malao’ uran batu, malao’ dalak, malao’ api kilaten lo’a tana’en. Jaji dalao’i tana’en nanna uran batuun dinen. 24Kenang uran anak batu alao’en di aset, kenang bea dinen kilat paramanyaren. Na’an kala’ mondok lo’a Mesir balasa awan dinen launna mamin padari negeriin. 25Samuana ambata gulungan jalu di tana’en sasara negeri Mesir dinen akaus dadua’ uran batuun. Dadua’ mantuariin, dadua’ inatangen, dadua’ ambata jalu datanamen. Arusak bea ambata akat kayuun dadua’ uran batuun dinen. 26Suma poang na’anen dadua’ uran batu, di daerah Gosen, kosan lalako’anna ambata gulungan tau Israelen dinen. Inang lalo andianna parangka’a kole’a i Yahuwe.

27Maminna dinen mangalong rajaan lo’a baki’ Musa nanna baki’ Harun manyuro’ madap, “Jaji daiak di’en maminak badosa lo’a i Yahuwe. Ia yang tapaten. Iak lalo yang sala’en, ikam nanna ambata gulunganku’. Mangaku’ak,” ingka kenang. 28“Jaji do’aangkam barik lo’a i Yahuwe. Maminkam puas marinsa’en kole’a dalaken, kole’a uran batuun. Kuparuarangkin lamba’ barik, na’ankin kutaan lagi’,” ingka kenang manjaruma rajaan.

29Jaji manyauti barik baki’ Musa, “Jaji kenang, ti’ak mamin minsaluan lo’a banuaan, terus ona’ kuangkatang tanganku’ itiang bado’a lo’a i Yahuwe. Nangkenang tadanga barik dalaken. Kosan ona’ ikitaan uran batuun maminna bado’aku’ dinen. Ratina kenang polana, mainto’ itamuna iko kole’a dunia di’en i Yahuwe yang ampunaan kausana. Ia yang mangkamen,” ingka kenang. 30“Poangsi kutamu memen atenu dinen nanna ambata gulungan anak buanu. Nampikin atakut lo’a i Yahuwe,” ingka kenang baki’ Musa lo’a rajaan.

31Jaji nanga dinen mamin akaus arusak tanaman rami nanna jelaien. Kole’a rami dinen mamin mondok dangara, jelai mamin araunting. Ialalo arusaka. 32Suma poang gandom nanna jalu balu’ gandomen na’anen arusak kole’a nampi ambua’.

33Jaji maruar baki’ Musa lo’a banuaan marantang kosanna rajaan laloang daangkatang tanganna bado’a lo’a i Yahuwe. Maminna bado’a dinen laloang tadang dalaken nanna uraan batuun. Na’an lagi’ alao’ sauranen lo’a duniaan. 34Poangsi dabele mamin tadang kole’a rajaan, daia laloang badosa bapi. Dapakarasang atena barik, ia nanna ambata gulungan anak buana. 35Jaji bakaras atena rajaan. Na’an daparuarang lo’da’ anak kanturunanna baki’ Israel dinen lamba’, awan bua jaruma i Yahuwe yang dajarumangen lo’a rajaan malaloi baki’ Musa.

Currently Selected:

Palapasang 9: EBE

Highlight

Copy

Compare