Palapasang 10

Dalao’i nanna tula kalapanen, bakaya buntaken

1Maminna dinen manjarum bapi i Yahuwe lo’a baki’ Musa, “Lamba’kin bapi lo’a rajaan,” ingka, “kole’a mamin kupakarasang atena rajaan nanna ambata gulungan anak buana. Ratina kupakarasanga ateda’, saja to’ kenangku’ mainto’ kupolana ambata gulungan tanda panyunyuaku’ antarada’. 2Mainto’ tanda panyunyuaku’ dinen pande padari tutulanen lo’a ambata anak kanturunannu, Musa’e, tutulan manaloku’ lo’a urang Mesiren. Awan poang kupola paradai’an poang manaloku’ lo’da’. Ijarumang lo’a araampunu, lo’a arapuitu ambata tanda panyunyuaku’ yang kupolaan antarada’ urang Mesiren mainto’ itamuna ikin turun-manurun kole’a Iak laloon Iak di’en i Yahuwe,” ingka kenang manjaruma i Yahuwe lo’a baki’ Musa.

3Jaji lamba’ barik baki’ Musa nanna baki’ Harun lo’a rajaan laloang manjarum lo’a, “Andian jaruma i Yahuwe, Alatala yang isembaan ikam tau Ibraniin, dasuro’ jarumang lo’u. Insa’ asopi bakarasa atenu, na’annu mainya’ malola’ani, na’annu mainya’ pakeke’ kalenu di jolona arona? Ingka kenang. Arung iparuarang lamba’ ambata anak katio’anku’ itiang manyemba lo’ku’. 4Kole’a daiko ti’ na’anko lagi’ mainya’ paruarang lamba’ ambata anak katio’anna, ingka, mina’ to dapamondokang lo’a negeri di’en ambata gulungan buntaken, ingka kenang. 5To’ dasapui kausa tana’en di’en nanna buntaken, to’ akaput lasana bayu’a. Na’an lagi’ to’ paita tana’en. Samuana ambata jalu tio’en di tana’en yang na’anen arusak kole’a uran batuun, to’ dakaan kausa kole’a buntaken. Gulungan ambata akat kayuunpi ona’ akaus dakaan. 6Buntak dinen ona’ akaus mamano’i gulungan saonu nanna gulungan saona ambata gulungan anak buanu nanna ambata urangu. Na’an kala’ maitaan awan dinen adarina. Dari mulakat mondoka araamanin arabakinin malalako’iin tana’ negeri Mesir di’en saja na’an kala’ maita,” ingka kenang jaruma baki’ Musa lo’a rajaan. Mamin akaus manjaruma awan dinen laloang koengang kalena lamba’ dinen baki’ Musa marantang unjang kosanna rajaan dinen.

7Jaji manjarum ambata gulungan anak buana rajaan, “Launnasi mantuari di’en ipalaloanga mangaru lo’ka’! Paruarangla uka’i ira dinen lamba’ itiang manyemba lo’a i Yahuwe, Alatala yang dasembaan kole’da’. Mamin arusak tana’ Mesir di’en kole’a. Na’an itamu iko?” ingka kenang jarumda’ lo’a rajaan.

8Jaji baki’ Musa nanna baki’ Harun barik dala, daawa madap bapi lo’a rajaan. Mondok inang, manjarum bapi rajaan, “Lamba’kin la’a itiang manyemba lo’a i Yahuwe Alatalanin. Jaji intain poang ambatin to’ tambaan?” ingka kenang manjaruma rajaan lo’a baki’ Musa.

9“Na, daikam ambatam, samuanam babainyeen babakaan, nangkanak tamatoaan arungkam tamba. Ambata inatangampi tamba kausa. Kole’a daikam arung mamola rami-ramikam itiang manyemba lo’a i Yahuwe,” ingka kenang.

10Jaji manyauti rajaan, “Ha, dauntungi tapatkin kole’a i Yahuwe ati’en tapat kuparuarangkin lamba’ kausa nanna aranakin arabainyenin. Ti’ sampai akauskin tamba, iawa kausa ambata gulungannin, ambata gulungan inatangin, dinen okan jalu to’ maam. Tetap tujuan ajau’ atenin yang awan dinen!” ingka kenang. 11“Ikin poang babakaan lamba’en itiang manyemba lo’a i Yahuwe. Yang bokanen na’an kuparuarang lamba’. Awan dinen lalo jalu ipitaan ikin laun-launna di’en,” ingka kenang rajaan. Laloang dauser barik baki’ Musa nanna baki’ Harun dari arona rajaan.

12Jaji manjarum i Yahuwe lo’a baki’ Musa, “Tanggeang tangannu ibona tana’ Mesiren,” ingka kenang, “mainto’ mondoka buntaken mainsap lo’a tana’ Mesiren, mainto’ dakaanna ambata gulungan jalu yang tio’en di tana’en. Ai poang yang na’anen akaus kole’a uran batuun arung akaus dakaan kole’a buntaken,” ingka kenang manjaruma i Yahuwe lo’a baki’ Musa.

13Jaji datanggeang lalo tungkata baki’ Musa ibona tana’ Mesir. Laloang i Yahuwe dinen manyuro’ mondok sariut marusu dari timur. Saso-aso samalam-malam manumpuna suanginen ibona tana’en. Mondok imbara asoon barik, mondoka lalo gulungan ambata buntaken daawa suanginen dinen. 14Jaji mainsap lo’a tana’ Mesiren laloang manando’ di negerina inang. Nyangka’-nyangka’ buntaken. Na’an kala’ ikitaan awan dinen dari ijoloon sampai mondok lo’a ona’en. 15Akaput tana’en sasara Mesir, nanarum kausa jalu ibeleen lasana bayu’a inatang dinen. Akaus dakaan ambata gulungan jalu tio’en di tana’en nanna ambata bua’ kayuun. Ai poang darantangen maminna uran batuun dinen, akaus dakaan. Sampai kosan lagi’ arantang jalu mamata’en di akat jalun sasara negeri Mesir, kapi di umaan, kapi di kayuun. Dakaan samuana.

16Maminna dakita awan dinen jalu ajau’en kole’a rajaan, jaji bariar daia manyuro’ madap lo’a baki’ Musa nanna baki’ Harun. Jaji manjarum, “Na, daiak badosaak lo’a Alatalanin i Yahuwe. Badosaak bea lo’u. 17Amponiak sakali di’en dari dosaku’. Bado’ako lo’a Alatalanin i Yahuwe, suro’ panjao’ tula yang mondoken lo’ku’ di’en, yang jalu manyuro’ mateen,” ingka kenang manjaruma lo’a baki’ Musa.

18Jaji maruar barik baki’ Musa dari arona rajaan laloang bado’a lo’a i Yahuwe. 19Laloang dinen dakapi’ang manumpuna sariut dinen kole’a i Yahuwe dari timur manyuro’ manumpu dari barat. Akaus lalo dinen ambata buntakeen daawa kole’a sariuten laloang alao’ lo’a jawa Dadara’en. Kosan lagi’ buntak arantangen barik di negeri Mesir. 20Poangsi i Yahuwe tetap manyuro’ bakaras atena rajaan. Sampai rajaanpi dinen alibak paruarang lo’a anak kanturunanna baki’ Israel lamba’.

Dalao’i tula kasumilanen, araun dom tetek kausa jaluun

21Maminna dinen manjarum bapi i Yahuwe lo’a baki’ Musa, “Na, tanggeang tangannu lo’a suanen manyuro’ mondok jalu araunen mangaputiin negeri Mesir, araun dom tetek. Rasa-rasana, tungan jalu dapaten ijaput lasana araunna.” 22Jaji dalola’ani kole’a baki’ Musapi barik, datanggeang tanganna inait lo’a suanen. Laloang mondok rabarik jalu araunen, araun dom tetek. Talung aso, talung malam kosan lagi’ jalu pande ikita sasara negeri Mesir dinen. 23Na’an dapat maita sera lo’a seraan. Kosan tau kakaji’ talung aso launna dinen. Poangsi lo’a ambata anak kanturunanna baki’ Israel dinen na’an araun. Andian jalu arawangen di kosan lalako’da’.

24Jaji dakita awan dinen, dasuro’ madap barik baki’ Musa kole’a rajaan. Mondok inang rabarik, manjarum, “Lamba’kin la’a itiang manyemba lo’a i Yahuwe,” ingka kenang. “Awa bea arabainyenin araanakin. Suma poang yang irantangen, ambata gulungan kambing dombanin nanna sapiin. Dinen ada’ iawana ikin,” ingka kenang jaruma rajaan lo’da’ duaan.

25Jaji dasauti barik kole’a baki’ Musa, “Asi lo’a irantanga. Dinen bua iparuluun itiang pamindaranam jalu itutungen di arona i Yahuwe Alatalanam. Arung iparuarangkam mawa bea ambata gulungan inatangam,” ingka kenang. 26“Kosan serapi inatangen yang pande arantang. Kole’a to’ ipakai sapa dua itiang pamindaranam lo’a i Yahuwe Alatalanam. Kenang bea ati’en nampikam mondok lo’a dinen, nampi itamu yang inde-inde yang dasuro’ pamindaraangen itiang manyemba lo’a. Ialalo na’anna pande irantang,” ingka kenang manjaruma dinen baki’ Musa lo’a raja Mesiren.

27Poangsi i Yahuwe tetap manyuro’ bakaras lo’a atena raja Mesiren. Alibakpi paruarang lo’da’ lamba’. 28Jaji manjarum barik lo’a baki’ Musa, “Mamalinko. Tadangko maitaan lo’a lindo’ku’. Ti’ko maita lo’a lindo’ku’, mateko. Aso dinen bua matenu!” ingka kenang arasina lo’a baki’ Musa.

29Jaji dasauti dinen kole’a baki’ Musa, “Na, tapat dinen jarumu. Jangka’u lalo maitaan lo’ku’,” ingka kenang jaruma dinen baki’ Musa manyautina lo’a rajaan.

Currently Selected:

Palapasang 10: EBE

Highlight

Copy

Compare