Palapasang 8

1manjarum barik daia lo’a baki’ Musa, “Lamba’ko bapi lo’a rajaan manjarum lo’a, Andian bapi jaruma i Yahuwe dasuro’ jarumang lo’u. Anak katio’anna, ingka, arung iparuarang lamba’ itiang manyemba lo’a, ingka kenang jaruma lo’u. 2Poangsi ti’ko alibak paruarang lo’da’, negerinu to’ dalao’i nanna ukumanen. Dapamondokang reket sasara negerinu. 3Bakaya ona’ gulungan reketen di sunge Nilen, sampai to’ maruar ona’ dari sungeen inang lamba’ inait lo’a saonin. Apano’ ona’ saonin daintamai kole’a reketen. Sampai intama lo’a sapat tindo’annin, inait ibona tilamin. Intama bea lo’a saona ambata suro’annu, lo’a ambata saona gulungannu. Sampai intama ona’ ilalam bakaran rotiin, ilalam ambata basikom kosan mamarokang rotiin. 4To’ mamansangi lo’in samuana, maam lo’u, maam lo’a ambata gulungannu, maam lo’a ambata suro’annu, ingka kenang manjaruma i Yahuwe yang dasuro’ jarumangen lo’u, iko kenang lo’a rajaan,” ingka kenang manjaruma i Yahuwe.

5Jaji manjarum i Yahuwe lo’a baki’ Musa, “Mamin dinen manjarumko bapi lo’a i Harun manyuro’ tanggeang tanganna nanna tungkata ibona ambata danumen, ibona sungeen maam yang baraa’en, maam bea yang akeke’en, ibona kokoanen. Na kenang manyuro’ tabobosa reketen dari danumen itiang mamansangi tana’ Mesir, iko kenang lo’a i Harun,” ingka kenang manjaruma i Yahuwe.

6Jaji malola’ani barik dinen yang baki’ Harunen datanggeang tanganna ibona danumen di Mesir dinen. Tapat bua malola’i jarum dinen de’i. Minsaluan barik gulungan ambata reketen tabobos dari danumen dinen, akaus apano’ tana’ Mesiren barik nanna reketen. 7Ambata gulungan tau bailmuun dinen awan dinen bua polana mamakai lo’a panamuna dinen, pamondokang reket. Minsaluan bapi reketen lamba’ di tana’ Mesir.

8Maminna dinen barik mangalong rajaan lo’a baki’ Musa nanna baki’ Harun manyuro’ madap lo’a. Jaji manjarum: “Jaji bado’akin, pitaangak ikin lo’a Alatalanin i Yahuwe. Isuro’ bajao’ di’en ambata gulungan reketen lo’ku’, lo’a ambata gulunganku’,” ingka. “Nanga kuparuaranga lo’in tau Israelen lamba’ itiang mamola pamindaranin lo’a i Yahuwe,” ingka kenang.

9Jaji manjarum bapi baki’ Musa lo’a rajaan, “Maam ti’ kenang. Nanga inde kamainya’annu kudo’aangin nanna ambata suro’annu nanna ambata gulungannu. Iko poang manjarumangen lo’ku’. Nanga inde ipanjao’a gulungan reketen lo’in nanna saonin, kusuro’ lalako’ poang di sunge Nil?” ingka kenang.

10“O ti’ kenang, mina’ poang,” ingka kenang manjaruma rajaan lo’a baki’ Musa.

“O’, kenang mainya’,” ingka kenang manjaruma baki’ Musa, “mainto’ itamuna barik iko kole’a angkosan lagi’ sabangonen nanna i Yahuwe Alatalanam. 11Ona’ barik ambata reketen dinen dapanjao’ dari nannin, dari ambata saonin, dari ambata gulungannu, dari suro’annu. Reketen barik to’ lalako’ poang di sunge Nil,” ingka kenang manjaruma baki’ Musa lo’a rajaan.

12Maminna dinen barik lamba’ minsaluan baki’ Musa nanna baki’ Harun marantang unjang kosana rajaan. Maminna lamba’ dinen laloang mangalong baki’ Musa lo’a i Yahuwe manjarumang soala reketen yang dasuro’ mansangi lo’a rajaan de’i. 13Jaji dalola’ani kole’a i Yahuwe awan bua do’ana baki’ Musa. Akaus mate ambata gulungan reketen di saoda’, di rawang banuaan, di umaan. 14Laloang dakapulungang kole’a tauen bangkayoanna reketen dinen, bau babauruk kausa negeri Mesiren barik kole’a reketen yang mateen dinen. 15Poangsi raja Mesiren dinen dabele na’an lagi’ mangaru jalu dinen, tetap bakaras atena. Alibak manaantalinga lo’a jaruma baki’ Musa nanna baki’ Harun awan bua jaruma i Yahuwe memen lo’da’.

Dalao’i nanna tula kataluun, bakaya kutu jaluun

16Mamin dinen manjarum bapi i Yahuwe lo’a baki’ Musa, “Manjarumko lo’a kakanu, i Harun, nanga datanggeang tungkata laloang dababalang lo’ tana’en mainto’ padari kutu jaluna sasara negeri Mesir,” ingka kenang jaruma i Yahuwe lo’a baki’ Musa.

17Jaji dalola’ani awan bua jaruma. Datanggeang tungkata baki’ Harun laloang dababalang lo’a tana’en. Rabarik kutu tana’en dinen padari kutu jaluun kausa sasara Mesir dinen. Jaji tambor-ambor kutu jaluun dinen lo’a gulungan mantuariin, lo’a ambata gulungan inatangen mokota saisi negeri Mesir dinen.

18Poangsi ira tau bailmuun to’ malola’ani awan dinen mamakai lo’a panamuna, na’an dakule’. Akaus dakaan kutu jaluun, maam mantuariin, maam inatangen.

19Laloang manjarum ira bailmuun lo’a rajaan, “Na, di’ lalo karajana Alatala yang na’an dapat ilawan,” ingka kenang. Poangsi raja dinen tetap bakaras atena. Alibak daia manaan talinga lo’a jarumda’ awan bua jaruma i Yahuwe memen lo’a baki’ Musa.

Dalao’i nanna tula kaampaten, bakaya jalu mainsapen

20Jaji manjarum bapi i Yahuwe lo’a baki’ Musa, “Mina’ makapen arung bariar asadingu. Lamba’ko malam-malam pasidua’ang kalenu nanna rajaan nanga lamba’a lo’a danumen. Maminnin sidua’ manjarumko lo’a, Andian jaruma i Yahuwe dasuro’ jarumang lo’u, Anak katio’anna, ingka arung iparuarang lamba’ itiang manyemba lo’a. 21Ti’ko alibak paruarang lo’da’ lamba’, ingka, to’ dasuro’ mondok lo’in ambata gulungan jalu mainsapen nyangka’-nyangka’. Maam di tana’en sampai mondok intama lo’a saoen mangaruna lo’in, lo’a ambata gulungan suro’annu, lo’a gulungannu. Saja bakaya ona’ jalu mainsapen dinen. Apano’ gulungan saona tau Mesiren, apano’ tana’ itiang pangaru lo’in,” ingka kenang.

22“Kenang mondoka lo’in. Poangsi di daerah Gosen dinen, ingka, kosan lalako’a anak katio’anna, laan polana kole’a. Mondok aso dinen ona’, kosan jalu mainsapen mondok lo’da’. Ratina kenang polana, mainto’ itamuna barik iko andianna diri’a i Yahuwe indi’angen di negeri di’en. 23Polana lo’a tau Mesiren laan, lo’a anak katio’anna laan. Jaji baya to’ adarina tanda panyunyuana dinen. Mina’ darina, ingka kenang jaruma i Yahuwe dasuro’ jarumang lo’u,” ingka kenang baki’ Musa nanna baki’ Harun dinen lo’a rajaan.

24Jaji awan dinen lalo polana kole’a i Yahuwe. Bakaya jaji mondoka jalu mainsapen, intamaan lo’a saona rajaan, lo’a ambata suro’anna. Akaus arusak tana’en kole’a jalu mainsapen dinen sasara negeri Mesiren.

25Maminna dinen mangalong barik rajaan lo’a baki’ Musa nanna baki’ Harun dasuro’ madap lo’a. Jaji manjarum, “Na, ti’ kenang, pamindarakin la’a. Indi’ang poang di tana’ Mesiren mamola pamindaranin lo’a Alatalanin,” ingka kenang lo’da’.

26Poangsi dasauti kole’a baki’ Musa, “Tetapkam sala’ ti’kam mamola pamindara indi’ang. Kole’ jalu to’ ipamindaraangen ikam lo’a i Yahuwe Alatalanam tentu alibakkin mamele. Tentu manyinggung lo’a parasa’an urang Mesir mameleen. Ona’ ati’enkam dakita kole’da’ manyambeli inatangen, tentukam daparati nanna batuun. 27Arungkam lamba’ dalam talung aso di kasik baraa’en, laloang inang mamola pamindaranam lo’a i Yahuwe paraampuanam awan bua parintana lo’am,” ingka kenang manjaruma baki’ Musa lo’a raja Mesiren.

28Jaji manjarum bapi rajaan, “Na, kenang mainya’, minsaluankin mainya’ lo’a kasik baraa’en itiang mamola pamindaranin lo’a i Yahuwe Alatalanin. Ada’ poang bajao’en,” ingka kenang. “Na, do’aangak barik,” ingka kenang manjaruma rajaan lo’a baki’ Musa.

29Jaji manjarum barik baki’ Musa, “Na, maam ti’ kenang. Lamba’akpi barik. Ti’ak minsaluan dari di’en, ka’ bea kudo’aangu lo’a i Yahuwe. Kupitaangko mainto’ mina’ anyapa ambata jalu mainsapen di’en dari nannu, dari nanna ambata suro’anu nanna ambata gulungannu. Ada’ poang makalu awan ijoloon dinen sampai na’an lagi’ iparuarang lamba’ urangam itiang mamola pamindarana lo’a i Yahuwe,” ingka kenang manjaruma dinen baki’ Musa lo’a rajaan.

30Jaji maruar barik baki’ Musa marantang unjang kosana rajaan laloang daia bado’a lo’a i Yahuwe balu’ yang dapitaan kole’a rajaan. 31Jaji dadalinga bua jalu dapitaan kole’a baki’ Musa. Dasuro’ anyap ambata jalu mainsapen dinen dari nanna rajaan, dari nanna suro’anna nanna ambata gulunganna. Tanto’ sera yang andianen di Mesir dinen barik. 32Poangsi raja dinen dapakarasang bapi atena. Dapase’ang lamba’ ira tau Israelen.

Currently Selected:

Palapasang 8: EBE

Highlight

Copy

Compare