Palapasang 7
7
1Jaji manjarum dinen i Yahuwe lo’a baki’ Musa, “Na bele, daiko di’en kupolako awan lalo Alatalana raja Mesiren. Kakanu i Harun dinen itiang panjarumu rabarik. 2Ai poang kuparintaan lo’u arung ijarumang lo’a i Harun. Ia barik yang isuro’en iko itiang manjarum lo’a rajaan, manyuro’ paruarang lo’a ambata anak kanturunanna baki’ Israel minsaluan dari negerina,” ingka kenang. 3“Poangsi atena rajaan dinen to’ kupangkarasang. Kapi bayu’ ona’ ambata tanda kuasaku’ nanna panyunyuaku’ kupolaan di negeri Mesir di’en 4tetap daia alibak paduli jarumin. Daiak rabarik dinen to’ maukum urang Mesiren nanna ukuman palin aboraten. Baru’ barik kuawa minsaluan balaku’ ambata anak kanturunanna baki’ Israel dinen dari negerida’. 5Maminna barik kudukum urang Mesiren, mamin kuawa insaluan ambata anak kanturunanna Israel, inang ona’ datamuna kole’a urang Mesiren kole’a Iak laloon Iak di’en i Yahuwe,” ingka kenang manjaruma i Yahuwe lo’a baki’ Musa.
6Jaji samuana dinen jaruma i Yahuwe lo’a baki’ Musa nanna baki’ Harun, dalola’ani kausa kole’da’ duaan. 7Umura baki’ Musa nanga manjaruma lo’a raja Mesiren mamin lapan pulo’ taun. Umura baki’ Harun daia, mamin lapan pulo’ tiga taun nanga dinen.
Tungkata baki’ Musa yang datangko’en kole’a baki’ Harun padari urar rabarik
8Jaji manjarum barik i Yahuwe lo’a baki’ Musa nanna baki’ Harun, 9“Jaji mondokin inang ona’ di arona rajaan, ati’en raja manyuro’ lo’in mamayoang panyunyuaku’, manjarumko barik lo’a i Harun manyuro’ pantokang tungkata dinen di jolona arona rajaan mainto’ tungkata padari urar,” ingka kenang manjaruma i Yahuwe lo’da’ duaan.
10Jaji lamba’ barik ira duaan madap lo’a rajaan laloang dalola’ani ambata gulungan parintana i Yahuwe lo’da’, paba’ina lo’da’ duaan. Dapantokang tungkata dinen kole’a i Harun di jolona arona rajaan nanna ambata gulungan anak buana, laloang tungkata dinen padari urar.
11Dabele awan dinen kole’a rajaan tungkata dinen padari urar, laloang dasuro’ mala lo’a ambata tau ara panuntuten, lo’a ambata tau andianen panamuna. Mondok rabarik lo’a dinen, dapakai barik panamuda’ dinen datiang mamola bea panyunyua awan dinen. 12Dapantokang bea tungkata padari urar. Poangsi tungkatda’ dinen datalan kole’a tungkata baki’ Harun. 13Poangsi bajao’ to’ tapalin atena rajaan. Bangona bua bakarasa. Alibak manaantalinga lo’da’ awan bua jaruma i Yahuwe yang dajarumanga memen lo’a baki’ Musa.
Dalao’i nanna tula mulakataan, tapalin danumen padari dara’
14Jaji manjarum i Yahuwe lo’a baki’ Musa, “Raja Mesiren di’en bakaras lapoang atena. Alibak daia paruarang lo’a anak katio’anku’ minsaluan dari negerina. 15Jaji kenang,” ingka, “mina’ makapen nanga maruara rajaan to’ tador lo’a danumen, lamba’kin lo’a rajaan. Marungkin inang di biring kabang sunge Nil. Awa bea tungkat padari uraren dinen,” ingka kenang i Yahuwe lo’a baki’ Musa.
16“Jaji mondokin inangen,” ingka, “manjarumkin barik lo’a rajaan. I Yahuwe, Alatala yang isembaan ikam urang Ibraniin manyuro’ lo’am mawa jaruma lo’in. Anak katio’anna di’en arung iparuarang lamba’ itiang manyemba lo’a inang di kasik baraa’en, ingka kenang jaruma yang maminen ijarumang ikam lo’u dinen. Poangsi daiko sampai awan di’en alibakko manaantalinga. 17Jaji andian bapi barik jaruma i Yahuwe lo’u, Awandi’en barik dapayoang kuasana lo’u, mainto’ itamuna iko kole’a Ia laloon Ia dinen i Yahuwe, ingka kenang manjaruma i Yahuwe yang dasuro’ jarumang lo’u. Jaji danum Sunge Nil di’en kubabal iak barik nanna tungkat di tanganku’en di’. Laloang barik danum Nil di’en to’ tapalin padari dara’. 18Ambata gulungan lauk di danumen ona’ to’ akaus mate. Sampai danum sungeen dinen ona’ padari ajau’, arabau. Na’an ikule’ idinyum barik ikin gulungan urang Mesiren, iko kenang lo’a rajaan.
19“Mamin dinen barik manjarumko lo’a i Harun, manyuro’ mala tungkata dinen. Nanga datanggeanga tanganna ibona danumen di negeri Mesir, ibona ambata gulungen sungeen maam baraa’en maam akeke’en, ibona kokoanen, ibona ambata gulungan kolamen laloang to’ manyuro’ tapalin kausa padari dara’. Kapi danum ilalam tong kayuun, kapi ilalam jawiin, samuana ambata danumen di negeri Mesir arung padari dara’ kausana, iko kenang manjarumen ona’ lo’a i Harun,” ingka kenang paba’ina i Yahuwe lo’a baki’ Musa.
20Jaji barik ambata parintana i Yahuwe dinen dalola’ani bua kole’a ari baki’ Musa nanna baki’ Harun. Datanggeang dinen tungkata laloang dababalang lo’ danumen di jolo arona raja nanna ambata gulungan suro’anna, dalao’i ukumanen lo’a danum yang di sungeen. Jaji tapalin barik sunge Nil dinen padari dara’. 21Akaus mate gulungan ambata lauk dinen ilalam sungeen. Bau bauruk barik danuma. Na’an dapat idinyum barik kole’a ambata tau Mesiren. Andian dara’ kausa maira tatak banuaan sasara negeri Mesir dinen.
22Na, kapi poang dakita awan dinen kole’a rajaan, kosan tau paduliin. Ira tau bailmuun dinen mamola bea awan dinen mamakai panamuna. Jaji na’an tapalin atena rajaan. Bangona bua bakarasa awan bua jaruma i Yahuwe memen yang dajarumangen lo’a baki’ Musa. 23Kapi jalu adariin balu’a dinen, mole’ balik poang dinen rajaan intama ilalam saona. Na’an sama sakali mainya’ paduli.
24Jaji gulungan tau Mesiren mangali tana’en di biringa sunge Nil manyari danum yang pandeen idinyum. Na’an jaji dakule’ mainyum danum dari sungeen yang jalu bau bauruken dinen.
Dalao’i nanna tula kaduaan, bakaya reketen
25Jaji tuju aso maminna dalao’i ukumanen lo’a Sunge Nil kole’a i Yahuwe,
Currently Selected:
Palapasang 7: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
