Palapasang 6
6
1Jaji barik manjarum i Yahuwe lo’a baki’ Musa, “Ona’jo, ikita bua ona’ iko jalu kuanuun lo’a rajaan. Iak ona’ mamaksaan lo’a raja Mesiren dinen nanna kuasaku’. Baru’kin daparuarang lamba’, baru’kin dapainsaluan. Sampai iruru jajikin ti’ mamin kupaksa iak,” ingka kenang manjaruma Alatala.
2Jaji manjarum bapi Alatala lo’a baki’ Musa, “Iak lalo i Yahuwe. 3Ijoloonjo nanga paitanga kaleku’ lo’a baki’ Abraham, lo’a baki’ Isak nanna baki’ Yakub, na’an kujarumang asanku’ i Yahuwe. Suma poang asan kaleku’ Alatala yang palin bakuasaan. 4Maminjo kurantang bayaku’ nanda’ to’ kumeang lo’da’ negeri Kana’an yang dalalako’iinjo kole’da’ awan urang asingen. 5Jaji kuparandam bua iak bayaku’ lo’da’. Kudalinga pasiakda’ ambata anak kanturunanna i Israel kole’a dala pangkama kole’a ambata urang Mesiren,” ingka kenang manjaruma Alatala.
6“Jaji jarumang lo’da’ anak kanturunanna i Israel, Iak lalo Iak di’en i Yahuwe. To’ mawaak lo’in minsaluan dari kuasana tau Mesiren yang mala pangkamen lo’in. Daikin kupalapas nanna kuasaku’ yang palin baraa’en, nanna ukum kulao’en lo’da’ yang palin aboraten. 7Mamin dinen daikin kuangkat padari anak katio’anku’. Iak padariin Alatalanin. Inang barik itamuna ikin kole’a Iak laloon Iak di’en i Yahuwe Alatalanin yang mawaan lo’in minsaluan dari kuasana tau Mesiren dinen yang papadisiin lo’in nanna karaja aboraten. 8Maminnin kupainsaluan dari kuasa dinen, kuawakin barik lo’a negeri yang kubayaangen lo’a baki’ Abraham lo’a baki’ Isak nanna baki’ Yakub, baya kupakarasangen atas asan diri’ku’. Kumeang lo’in padari ikin ampunaan. Kole’a Iak lalo Iak di’en i Yahuwe yang mamayaangen lo’in,” ingka kenang manjaruma i Yahuwe lo’a baki’ Musa.
9Jaji jarum dinen rabarik daawa bua lo’da’ ambata anak kanturunanna baki’ Israelen dinen. Poangsi ira dinen alibak manaantalinga lo’a baki’ Musa. Mamin to’ putus asa. Mamin lolo to borata karajada’ tiang pangkamen.
10Jaji manjarum bapi i Yahuwe lo’a baki’ Musa, 11“Na, lamba’ko barik manjarum lo’a raja Mesiren, arung daruarang anak kanturunanna baki’ Israel dinen dari negerina,” ingka kenang manjaruma i Yahuwe lo’a baki’ Musa.
12Poangsi manjarum barik baki’ Musa, “Ai lo’ku’ bisaan lamba’ lo’a dinen? Daiak di’en okan kutamu malao’ jarum. Ataran poang manjarumku’ di arona. Ai lo’a mainya’a raja Mesiren manaantalinga lo’ku’, sedangkan ira anak kanturunanna baki’ Israel poang alibak,” ingka kenang.
Tutulan kanturunanna baki’ Israelen
13Jaji Alatala de’i mamin manjarum lo’a baki’ Musa nanna baki’ Harun manyuro’ manjarumang paba’ina lo’da’ anak kanturunanna baki’ Israel, lo’a raja Mesiren. Anak kanturunanna baki’ Israel dasuro’ arung dapainsaluan dari negeri Mesir.
14Jaji ira anak kanturunanna baki’ Israelen yang mauluangen barik maira kayan, kenang:
Baki’ Ruben dinen anaka baki’ Israel yang atoaan, ampat anaka babakaan. Asanna anaka dinen, baki’ Henok, baki’ Palu, baki’ Hesron, nanna baki’ Karmi. Ira ampaten lalo yang mauluangen di antara kanturunanna baki’ Ruben dinen.
15Mamin dinen baki’ Simeon, anam anaka babakaan. Asanna anaka dinen, baki’ Yemuel, baki’ Yamin, baki’ Ohad, baki’ Yakin, baki’ Sohar. Mamin dinen andian bapi anaka, baki’ Saul asanna. Baki’ Saul dinen anaka baki’ Simeon nanna bainyena urang Kana’an. Ira anamen lalo yang mauluangen di antarana kanturunanna baki’ Simeon dinen.
16Mamin dinen baki’ Lewi dinen talu anaka babakaan. Asanna anaka dinen baki’ Gerson, baki’ Kehat, nanna baki’ Merari. Ira taluun lalo yang mauluangen di antarana kanturunanna baki’ Lewi dinen. Baki’ Lewi di matena mamin mondok 137 taun umura.
17Baki’ Gerson dinen barik, dua anaka yang babakaan. Asanna anaka dinen baki’ Libni nanna baki’ Simei. Bayu’ bea kanturunanda’ duaan.
18Baki’ Kehat dinen ampat anaka babakaan. Asanna anaka dinen baki’ Amram, baki’ Yisar, baki’ Hebron, nanna baki’ Usiel. Baki’ Kehat dinen di matena mamin mondok 133 taun umura.
19Baki’ Merari dinen dua anaka babakaan. Asanna anaka dinen baki’ Mahli nanna baki’ Musi. Jaji kenang asanna baki’ Lewi nanna ambata anak kanturunanna maira kayan.
20Jaji baki’ Amram dinen siala nanna arina amana, i Yokebed asanna. Andian anakda’ barik baki’ Harun nanna baki’ Musa. Baki’ Amram daia di matena mamin mondok 137 taun umura.
21Baki’ Yisar dinen talu anaka babakaan. Asanna anaka dinen baki’ Korah, baki’ Nepeg, nanna baki’ Sikri.
22Baki’ Usiel andian bea anaka babakaan talu. Asanna anaka dinen baki’ Misael, baki’ Elsapan nanna baki’ Sitri.
23Baki’ Harun dinen siala nanna i Eliseba, anaka baki’ Aminadab. Piang Eliseba dinen sairuna bea nanna baki’ Nahason. Jaji Piang Eliseba andian anaka, baki’ Nadab, baki’ Abihu, baki’ Eleasar nanna baki’ Itamar.
24Baki’ Korah dinen talu anaka babakaan. Asanna anaka dinen baki’ Asir, baki’ Elkana, nanna baki’ Abiasap. Ira dinen lalo yang mauluangen antarana anak kanturunanna baki’ Korah dinen.
25Baki’ Eleasar anaka baki’ Harun dinen daia siala nanna anaka baki’ Putiel. Andian anaka barik, baki’ Pinehas asanna. Kenang asanna ambata tau mauluangen maira kayan di antarana ambata anak kanturunanna baki’ Lewi.
26Jaji yang dasuro’en kole’a i Yahuwe dinen lalo baki’ Harun nanna baki’ Musa. “Awa insaluan ira anak kanturunanna baki’ Israel maira tatak gulungan balaku’ dari negeri Mesir,” ingka kenang parintana i Yahuwe lo’da’. 27Ira dinen lalo yang manjarumen lo’a raja Mesir, ira to’ mawa lo’a tau Israel minsaluan dari negeri Mesir. Ira dinen lalo yang datugasen.
Baki’ Harun nanna baki’ Musa dameang parinta barik
28Jaji nanga dameang parinta dinen lo’a baki’ Musa kole’a i Yahuwe inang di negeri Mesir, kenang jaruma. 29“Iak laloon Iak di’en i Yahuwe. Ambata gulungan jalu kujarumangen dinen lo’u arung ijarumang kausana lo’a raja Mesiren,” ingka kenang.
30Poangsi manyauti baki’ Musa lo’a i Yahuwe, “Mainya’ te’ rajaan manaantalinga lo’ku’? Kole’a daiak na’an kutamu malao’ jarum,” ingka kenang manjaruma baki’ Musa lo’a i Yahuwe.
Currently Selected:
Palapasang 6: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
