Palapasang 5

Insang aborat barik parinsa’a tau Israelen

1Maminna dinen baki’ Musa nanna baki’ Harun dinen laloang lamba’ madap lo’a raja Mesiren. “Andian jaruma i Yahuwe lo’u, jaruma Alatala yang isembaan ikam tau Israelen. Arung kaingka ambata anak katio’anna iparuarang lamba’ mamola rami-rami itiang manyemba lo’a inang di kasik baraa’en, ingka kenang jaruma lo’u raja’e.”

2Poangsi manjarum rajaan, “Ha. Intainsi i Yahuwe dinen yang arungen kulola’ani jarum parintana? Na’an kukilala. Kenang bea ira dinen kupase’ang takisik,” ingka kenang manyautina lo’da’ duaan.

3Jaji manjarum bapi ira duaan, “Alatala yang isembaan ikam urang Ibraniin mamin pasidua’ang kalena nanam. Jaji andian jalu to’ ipitaan lo’u, to’ suro’ paruarang kalenam lamba’ dalam talung aso di kasik baraa’en. To’ mamola pamindarakam lo’a Alatalanam i Yahuwe. Na’an kenang ungka’en dalao’ki’ nanna tulaan. Ungka’enki’ dauno’ kole’a musuka’,” ingka kenang manjaruma lo’a rajaan.

4Poangsi manjarum barik rajaan lo’da’, “E Musa nanna Harun, ai kenang maam-maama barani-raninin mawa lo’a pangkamku’, manyuro’ marantang karajana? Se’ mole’kin lo’a karajanin! 5Belejo ira dinen bayu’a. To’ isuro’ marantang kakaru’ karajada’!” ingka kenang manjaruma rajaan.

6Jaji aso dinen bua daparintana bapi dinen ambata panguluan karajaan nanna ambata anak buana, 7“Ada’kin lagi’ mameang eromen lo’da’ itiang mamola batu bataan dinen awan ijoloon. Korong kalena, nangkenang sarianga kalena erom. 8Poangsi na’an pande kurang asel karajada’. Arung sama awan joloon bayu’a ambata batu bata dapolaan. Mamin palibakan ira dinen. Ialalo amumutda’ mamita paruarang kalena lamba’ itiang mamola pamindarana lo’a Alatalada’,” ingka kenang. 9“Arung aborat lo’a joloon karajada’ babakaan mainto’ na’anna talele’ barik itiang manaantalinga lo’a jarum ipola-polaan,” ingka kenang rajaan lo’a panguluan karajaan.

10Jaji lamba’ barik ambata panguluan karajaan nanna anak buana manjarum lo’a tau Israelen, “Andian jaruma rajaan lo’in, na’ankin lagi’ to’ dameang erom. 11Ikin poang lamba’en manyari eromen, ingka. Disa poang mandua’angin, inang poang manyarinin. Poangsi karajanin dinen na’an to’ ipakurang. Asela arung sama awan ijoloon,” ingka kenang jarumda’ lo’a gulungan tau Israelen.

12Jaji tambor-ambor barik urang Israelen sasara Mesir dinen manyari rimput itiang manyurang eromen. 13Kenang manyariin, kenang mandesaka panguluaan karajaan, “Arung tuli asel karajanin. Na’an pande kurang lo’a asela joloon nanga imeangin eromen dinen,” ingka kenang. 14Kenang ambata tau Israelen yang datugas awan anak buana uluan karajaan, ira dinen datiang barik. Dakatoani, “Ai lo’a kuranga asela karajanin lo’a joloon. Imalampi ka’ kuranga, aso di’enpi ka’ kuranga,” ingka kenang panguluan karajaan lo’a anak buana.

15Jaji lamba’ barik ira urang Israelen, anak buana panguluan karajaan, manjarum lo’a rajaan. “Maisi awan dinen kalakuannin lo’am suro’annu? 16Mamola batu batakin, ingka kenang manyuro’a panguluan karajaan lo’am, padahal kosan barik erom dameang lo’am suro’annu. Lagi’kampi datiang padahal okan sala’am. Sala’ tarangkat nannin bua. Urangin bua yang sala’en, okan ikam,” ingka kenang laporanda’.

17Poangsi dasauti kole’a rajaan, “Ialalo yang tau palibakanenkin, saja pamalaskin! Ialalo alasannin mamita paruarang kalenin lamba’, to’ mamola pamindarakin lo’a i Yahuwe kalo’in, suro’ painsaluan kalenin,” ingka kenang. 18“Bakarajakin, se’! Na’ankin kumeang erom poangsi arung sama awan joloon asel karajanin. Na’an pande kurang lo’a joloon,” ingka kenang jaruma rajaan lo’da’.

19Jaji ira anak buana uluan karajaan, dabele kalena palin susa barik. Kole’a dapase’ang pakurang asel batu bataan yang dapolaan dalam saso. 20Jaji maruara dari nanna rajaan dinen, sidua’ barik nanna baki’ Musa nanna baki’ Harun yang marungiin lo’da’ inang. 21Jaji manjarum ira lo’da’ duaan, “Na di’en, ikin poang mananggungen jalu sala’en di arona i Yahuwe. Arabulu barik atena raja nanna ambata anak buana mamelena lo’am kole’in. Imeang lele’an poang ikin itiang mauno’ lo’am dinen raja Mesir,” ingka kenang manjaruma ira urang Israelen amumutda’ lo’a baki’ Musa nanna baki’ Harun.

22Maminna dinen baki’ Musapi mole’ lo’a i Yahuwe laloang manjarum, “O Yahuwe,” ingka, “mai kenangu? Mai poang isuro’ku’ lo’a dinen? 23Dari mulakata lamba’ku’ lo’a rajaan manjarum atas asannu, kosan jalu manyuro’ maam lo’a urangku’. Bajao’ to’ ipasutanga iko dari jalu marinsa’en, manyuro’ insang susa andian,” ingka kenang barik amumuta baki’ Musa lo’a i Yahuwe.

Currently Selected:

Palapasang 5: EBE

Highlight

Copy

Compare