Palapasang 4
4
Baki’ Musa dameang panyunyua
1Jaji manjarum bapi baki’ Musa, “Ungka’en ona’ alibak ira parasaya’ lo’ku’, alibak manaantalingana. Ha! Kosan i Yahuwe paitangen kalena lo’u, ungka’ kenang manjaruma lo’ku’. Ai lo’a ti’ mamin awan dinen?” ingka kenang manjaruma baki’ Musa lo’a Alatala.
2Jaji manyauti barik i Yahuwe, “Na, jalu asi yang di tangannu dinen?” ingka kenang lo’a baki’ Musa.
“O di’en tungkatku’,” ingka kenang manyautina baki’ Musa.
3“Tampeangjo tungkatu dinen lo’a tana’en,” ingka kenang i Yahuwe. Jaji datampeang barik kole’a baki’ Musa lo’a tana’en. Laloang tapalin tungkata padari urar. Sampai arari barik baki’ Musa dinen atakuta lo’a uraren. 4Jaji manjarum bapi i Yahuwe, “Na, tanggeang bapi tangannu. Tangko’jo urar dinen di ingko’a,” ingka kenang. Jaji datanggeang barik tanganna baki’ Musa dinen maningkam di ingko’a dinen uraren, mole’ asal padari tungkat di tanganna.
5“Na, awan dinen ona’ lo’da’,” ingka kenang i Yahuwe, “mainto’ parasaya’ ira kole’a maminak i Yahuwe paitang kaleku’ lo’u. Alatalana arabaki’. Lo’ku’ manyembana baki’ Abraham, baki’ Isak nanna baki’ Yakub,” ingka kenang manjaruma i Yahuwe.
6Mamin dinen manjarum bapi i Yahuwe lo’a baki’ Musa, “Na, awandi’en barik apisjo tangannu dinen ilalam sapenu,” ingka kenang. Jaji daapis barik tanganna ilalam sapena. Maminna dinen daruarang bapi, ute’-ute’ jaji tanganna. Dadua’ kudung barik.
7Mamin dinen manjarum bapi Alatala, “Na, pole’ bapi tangannu ilalam sapenu,” ingka kenang. Jaji dapole’ bua ilalam sapena. Mamin dinen daruarang bapi, mamin mole’ asal. Maam, sama awan kulita bokanen.
8Jaji manjarum bapi i Yahuwe, “Ati’en ona’ alibak ira parasaya’, alibak paduli lo’a tanda panyunyua yang mulakataan, tentu parasaya’ barik lo’a tanda kaduaan. 9Poangsi umpamana alibakpi ira parasaya’ lo’a tanda panyunyua duaan dinen, alibak parasaya’ lo’a jarumu, malapang danumko barik lo’a sunge Nil. Arung itunggeang barik lo’a tana’en. Na, maminna itunggeang lo’a tana’en, danum dinen to’ padari dara’ inang di tana’en,” ingka kenang manjaruma i Yahuwe lo’a baki’ Musa.
10Jaji manjarum bapi baki’ Musa, “Ado Parampuane, daiak di’en saja na’an kutamu manjarum. Na’anna memen kutamu dari jolo mondok awandi’en. Awandi’enpi na’an kutamu maminu manjarum lo’ku’ suro’annu. Ateror manjarumku’ kenang bea abadakak,” ingka kenang manjaruma baki’ Musa lo’a i Yahuwe.
11Jaji manjarum bapi i Yahuwe, “Asi na’an itamu iko? Intain mamolaan baba’ mantuariin ti’ okan iak? Intain mamolaan tau abisuun, tau babongen? Intain mamola mantuariin manyuro’ maam matana, manyuro’ bautaan ti’ okan iak i Yahuwe? Samuana dari nanku’ kausa. 12Se’ tangkatko. Iak parajariin lo’u, mauluang baba’u, mauluang panamunu mainto’ itamuna iko manjarum malola’ani daiak,” ingka kenang manjaruma Alatala i Yahuwe lo’a baki’ Musa.
13Poangsi manjarum bapi baki’ Musa, “Ado Parampuane, suba ile’i tau bokanen padari suro’anu, bele poang mainya’u,” ingka kenang manjaruma lo’a i Yahuwe.
14Mamin dinen barik timbul arasina i Yahuwe lo’a baki’ Musa. Laloang manjarum, “Asi dinen kakanu i Harun, ka’ bea sidua’en nannu. Kutamu daia tau datamu manusun jarum. Mamin daia tangkat to’ pasidua’ang kalena nannu. Ti’ko dakita ona’ palin sasau nyawana maitana lo’u. 15Lo’a ona’ manjarumu manjarumang pasanku’ lo’a tau bayu’en. Iak mauluangen lo’a baba’u nanna baba’a i Harun. Iak majaren lo’u mainto’ itamuna iko mawa tugasu. 16I Harun ona’ yang padari baba’u manjarumen di arona tauen. Baba’a ona’ awan lalo baba’u bua. Awan lalo Alatalanako. 17Na, awa barik di’en tungkatu. Arung ipakai iko itiang mamola ambata tanda panyunyua,” ingka kenang manjaruma Alatala lo’a baki’ Musa.
Baki’ Musa mole’ balik lo’a negeri Mesir
18Jaji lamba’ barik baki’ Musa mole’, laloang jarumang kalena lo’a matoana, “To’ jarumang kaleku’ barik, ama’e,” ingka kenang. “Mamita paruarang kaleku’ mole’ balik lo’a arasairunku’ yang karaja pangkamen di negeri Mesir. To’ kutamu ka’ada’anna ti’ tio’pi ti’ na’an,” ingka kenang lo’a matoanna.
Jaji manjarum baki’ Yitro lo’a baki’ Musa, “Kenang mainya’. Mase’ko. Lao’-lao’u lamba’en,” ingka kenang.
19Jaji inang memen di Midian manjaruma i Yahuwe lo’a baki’ Musa, “Mole’ balikko lo’ Mesir kole’a samuana yang to’ mauno’en lo’u dinen mamin mate,” ingka kenang. 20Jaji daawa barik anaka nanna bainyena, dauwatang lo’a keledaien laloang tarangkat mole’ balik lo’a Mesir. Daawa bea tungkata Alatala di tanganna.
21Jaji manjarum bapi i Yahuwe lo’a baki’ Musa, “Maminnu mole’ lo’a Mesir arung ipakai kausa panyunyua kudunjukangen lo’u dinen. Arung ipayoang kausa tanda panyunyua dinen di arora rajaan. Poangsi atena rajaan dinen to’ kupakarasang mainto’ na’anna daparuarang lamba’ ambata anak katio’anku’,” ingka kenang.
22“Na, ti’ mamin daia alibak paruarang lamba’, manjarumko barik inang lo’a rajaan, Andian jaruma i Yahuwe lo’u, Alatala yang isembaan ikam urang Israelen. Israel dinen kuanggap awan anakku’ ingka, anak danginan. 23Ialalo manjarumku’ lo’u de’i, Anakku’ dinen arung iparuarang lamba’ itiang manyemba lo’ku’, uka’ kenang lo’u. Poangsi daiko alibakko. Na’an iparuarang lamba’. Ialalo anaku yang atoaan kuduno’ barik iak, iko kenang manjarumen ona’ lo’a rajaan,” ingka kenang paba’ina i Yahuwe lo’a baki’ Musa.
24Jaji barik di patanga’an lamba’a baki’ Musa dinen, samalam di dalanen. Jaji dalam samalama dinen, tador dinen i Yahuwe pasidua’ang kalena nanna baki’ Musa. To’ dauno’. 25Laloang dala batu bataramen kole’a piang Sipora. Dasunat barik anaka, dajalaang barik kulita dinen di kakina baki’ Musa. Jaji manjarum, “Di’ lalo lakiku’ pamondokang dara’en,” ingka kenang. 26Kole’a sunata anaka ialalo awan dinenna jaruma. Jaji maminna barik dasunat dinen anaka, na’an barik daanu kole’a i Yahuwe. Mul. 17:9-14.
27Jaji manjarum i Yahuwe lo’a baki’ Harun, “Tarangkatko lamba’ lo’ kasik baraa’en,” ingka. “Pasidua’ang kalenu nanna i Musa,” ingka kenang. Jaji tarangkat barik baki’ Harun, sidua’ barik nanna baki’ Musa di ukita Alatala. Maminna barik sidua’, sasau nyawana. Laloang dasum barik dinen yang baki’ Musaan. 28Jaji manjarum bea dinen baki’ Musa lo’a baki’ Harun datutul kausa. Samuana ambata jaruma i Yahuwe yang dasuro’ jarumangen lo’a tauen, tapat lalo dajarumang. Ambata gulungan tanda panyunyua yang dasuro’ polaan dajarumang bea lo’a baki’ Harun. Sitamu tapat dinen ira.
29Maminna dinen barik, laloang lamba’ ira duaan baki’ Musa nanna baki’ Harun mawa kombong ambata gulungan toa-toa urang Israelen dinen. 30Maminna kombong, manjarum barik baki’ Harun, manutul ambata jalu dajarumangen kole’a i Yahuwe lo’a baki’ Musa. Maminna dinen dapola bua ambata tanda panyunyuaan dinen di arona tauen. 31Jaji parasaya’ barik ira urang Israelen. Maminna barik dadalinga dongo pangamase’ina i Yahuwe lo’da’ sampai daia mainya’ mamele lo’a ambata kamarinsa’anda’ dinen, laloang tundukang kalena samuana manyemba lo’a i Yahuwe.
Currently Selected:
Palapasang 4: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
