Palapasang 3

1Jaji nanga dinen, baki’ Musa dinen mawa kambing dombana matoana dinen, baki’ Yitro, imama Midian. Jaji dauluang inatangen dinen isualina kasik baraa’en dinen, mainso’ lo’a ukit Sinai#3:1 Ukit Sinai dua asanna. Asan yang kaduaan, Ukit Horeb. manyari rimput itiang pangkaanan inatanga. Ukit Sinai dinen ukita Alatala.

2Jaji mondok inang andian malaikata Alatala paitang kalena lo’a baki’ Musa, manyaru’ balu’ api adale’en di akat jalu arapati’en. Dabele barik kole’a baki’ Musa, akat dinen adale’ nanna apiin, poangsi na’an atutung. 3Jaji jarumi kalena, “To’ lo’a dinenakpi mamele jalu laan-laanen dinen. Mainto’ kutamuna ratina akat jaluun dinen sampai na’anna atutung,” ingka kenang manjaruma dinen baki’ Musa dalam batak nyawana. Jaji lamba’ barik baki’ Musa mamele lo’a dinen.

4Jaji maminna dinen, dakita baki’ Musa dinen to’ lempangang kalena lo’a dinen to’ mamele, mangalong barik Alatala dinen lo’a baki’ Musa dari akat jalu adale’en dinen, “Musa, O Musa!” ingka kenang.

Jaji dasauti bua kole’a baki’ Musa, “Indi’angak,” ingka kenang.

5“Ada’ko mainso’en lo’a di’en,” ingka kenang Alatala. “Leka’jo sapatunu. Na’an pande ilat iko nanna sapatuun tana’ di’en. Kole’a tana’ di’en yang ikadengiin iko di’en tana’a Alatala, tana’ yang bareseen,” ingka kenang manjaruma Alatala.

6Jaji manjarum bapi, “Iak lalo di’en Alatalana arabaki’. Lo’ku’ manyembana baki’ Abraham, baki’ Isak, nanna baki’ Yakub,” ingka kenang manjaruma Alatala. Jaji baki’ Musapi mamumbuni lindo’a rabarik. Na’an barani barik mamele lo’a Alatala.

7Jaji manjarum bapi Alatala, “Okan na’an kubele daparinsa’i tauna ambata anak katio’anku’ di negeri Mesir inang. Kudalinga iak pasiaka lasana dapaksana kole’a ambata panguluan karajaan. Kutamu iak susana,” ingka kenang. 8“Ialalo tadorku’ di’en to’ malapasang lo’da’ dari kuasana ambata urang Mesiren. To’ kuawa barik lo’a tana’ palin maamen, tana’ luasen, tana’ bainyaken. Palin barasel tana’ dinen. Kuawa iak lo’a negeri dalalako’iinpi kole’a tauen, kole’a ambata suku laanen, urang Kana’an, urang Het, urang Amori, urang Peris, urang Hewi nanna urang Yebus,” ingka kenang manjaruma Alatala lo’a baki’ Musa.

Baki’ Musa dameang tugas rabarik

9“Jaji kudalinga bua iak barik pasiaka ambata anak kanturunanna baki’ Israel mangalonga lo’ku’,” ingka kenang manjaruma Alatala. “Kukita bua daparinsa’ina kole’a ambata urang Mesiren dinen,” ingka kenang. 10“Ialalo mamarintaku’ barik lo’u. Se’ tangkatko. Daiko kusuro’ madap lo’a raja Mesiren itiang mawa minsaluan lo’a anak katio’anku’ urang Israelen dari negeri Mesir,” ingka kenang manjaruma dinen Alatala lo’a baki’ Musa.

11Poangsi manjarum barik baki’ Musa, “Asi lo’a isuro’ku’ daiak di’en? Ai ratiku’ sampai to’ isuro’ak iko lo’a raja Mesir, isuro’ mawa minsaluan lo’a anak kanturunanna baki’ Israel dari negeri Mesir? Na’an patut iak,” ingka kenang manyautina lo’a Alatala.

12Jaji manjarum bapi Alatala, “Maam. Sarataak bua nannu. Kumeangko tanda mainto’ itamuna iaka yang manyuro’en lo’u. Ti’ko mamin mawa minsaluan lo’da’ dari negeri Mesir, daiko manyembako bua lo’ku’ indi’angen di ukit di’en. Dinen lalo tandanu, tanda iaka manyuro’en lo’u,” ingka kenang manjaruma Alatala lo’a baki’ Musa.

13Jaji manyauti baki’ Musa, “Ai lo’ku’ ona’ manjarumen lo’da’ anak kanturunanna Israel ti’ mondok indinang? Ona’ kuasan iak, Na, daiak di’en dasuro’ak kole’a Alatala yang dasembaan kole’a arabaki’ka’ dinen, uka’ kenang manjarumen. Tentuak dakatoani, intain asanna yang manyuro’en lo’u, tentu ingka. Jaji ai lo’a manyautiku’ lo’da’ ti’ mamin awan dinen jaruma?” ingka kenang matoanina baki’ Musa lo’a Alatala.

14Jaji dasauti barik kole’a Alatala: “Jaji kosan bokan manyuro’en lo’u. Iak lalo di’en Iak. Awan dinen ona’ manyautinu lo’da’ anak kanturunanna i Israel. Asan tau manyuro’en lo’ku’ ialalo Iak lalo di’ Iak, i Yahuwe. Ia yang manyuro’en lo’ku’, iko kenang ona’,” ingka kenang.#3:14 Yahuwe dinen asanna Alatala. Mainso’ unyina nanna jarum Ibraniin yang barartiin Iak laloon Iak. 15Mamin dinen manjarum bapi, “Manjarumko lo’da’, Iak yang manyuro’en lo’u, Alatalana arabaki’. Lo’ku’ manyembana baki’ Abraham, baki’ Isak nanna baki’ Yakub. Kenangko manjarumen. Kenang asanku’ sampai salaun-launna. Arung awan dinen lapoang tauen parandama lo’ku’ turun-manurun sampai mondok lo’a anak ipuit, mondok lo’a anak ituntung,” ingka kenang manjaruma Alatala lo’a baki’ Musa.

16“Se’, lo’da’ko. Kapulungang ira dinen gulungan toa-toa Israelen awa kombong, laloang jarumang jarumku’ lo’da’. I Yahuwe mamin paitang kalena lo’ku’, iko kenang. Ialalo dinen Alatalana arabaki’. Lo’a manyembana baki’ Abraham, baki’ Isak nanna baki’ Yakub. Jaji ilalam paitanga kalena lo’ku’ dinen andian jarum dasuro’ pamondokang lo’in, iko kenang. Okankin na’an kubele, ingka. Kubele basada’ lo’in indi’ang di negeri Mesiren. 17Ialalo kuputusina barik, ingka. Daikin to’ kuawa minsaluan dari kamarinsa’anen di negeri Mesir di’en. To’ kuawakin iak lo’a negeri dalalako’in kole’a ambata suku laanen, ambata urang Kana’an, urang Het, urang Amori, urang Peris, urang Hewi nanna urang Yebus. Kuawa barik lo’a tana’ palin baraselen, ingka kenang manjaruma Alatala lo’ka’, iko kenang ona’ lo’da’,” ingka kenang pesanna Alatala lo’a baki’ Musa.

18“Na, maminna ona’ dadalinga jarumu dinen kole’da’, mainya’ ira ona’ malola’ani jarumu. Gulungan tau toa-toa Israelen dinen awa sarata madap lo’a raja Mesiren. Mondokkin inang arungkin manjarum lo’a rajaan, i Yahuwe Alatalanam urang Ibraniin mamin pasidua’ang kalena nannam, ikin kenang. Jaji andian jalu to’ ipitaan lo’u, to’ isuro’ paruarang kalenam lamba’ dalam talung aso. To’ mamola pamindarakam lo’a Alatalanam i Yahuwe, ikin kenang manjarumen lo’a rajaan ona’. 19Na, kutamu bua lo’a raja Mesiren dinen, na’ankin daparuarang lamba’. Daia mamase’ang maruar lo’in ungka’en poang daia ipaksa nanna kuasaku’. 20Jaji daiak to’ kupayoang kuasaku’. Kudukum ona’ urang Mesiren nanna ambata ukuman yang na’anen kala’ itamu laun-launna di’en, jalu kupolaan antarada’. Baru’ barik mainya’ rajaan paruarang lo’in lamba’,” ingka kenang.

21“Ona’ urang Mesiren dinen kusuro’ palin manghormati lo’in. Mainya’ ona’ lo’in. Ti’kin lamba ona’, okan kosan jalu iawaan. 22Ambata gulungan babainyenin kusuro’ arung lamba’ lo’a babainye Mesiren yang sama lalako’en di saona, yang lalako’ sibiringanen. Arungkin mamita gulungan barang amas, barang pirak, ambata gulungan kain yang maamen. Pamakaiang ikin barik lo’a araanakin babainyeen, lo’a babakaan. Awan dinen lalo ona’ irampasa ikin ambata kamaamanna urang Mesiren dinen supayakin na’an dinen lamba’ parasuma mole’en, mainto’ andianna awanannin,” ingka kenang manjaruma Alatala lo’a baki’ Musa.

Currently Selected:

Palapasang 3: EBE

Highlight

Copy

Compare