Palapasang 32
32
1Jaji baki’ Musa balaun di ukiten. Jaji dabele barik kole’a urang Israelen baki’ Musa balaun na’an lagi’ tador dari ukiten, laloang babangkulung barik ibiringa baki’ Harun. Jaji manjarum, “Disa dinen tau yang mawaan lo’am painsaluan dari Mesir? Daikam na’ankam manamu lo’a i Musa, ti’ isa kosanna. Se’ polaangkam barik jalu isembaan yang pandeen padari panguluan lamba’am,” ingka kenang jarumda’ lo’a baki’ Harun.
2Jaji dasauti kole’a baki’ Harun, “Ati’ kenang leka’ ikin antin-antin amasen yang di talingana arabainyenin, di talingana araanakin babaka babainyeen. Awa ikin lo’ku’,” ingka kenang. 3Jaji daleka’ kausa barik ambata antin-antinda’ laloang daawa lalo lo’a baki’ Harun. 4Barik datarima’ kole’a baki’ Harun laloang dasitak mamola jalu isembaan balu’ anak sapi, dabatori nanna paaten.
Jaji dabele barik kole’da’, jaji manjarum ira, “Arasairunku’ urang Israelen, ialalo di’en jalu isembaan iki’ yang mawaan lo’ka’ minsaluan lo’a negeri Mesir,” ingka kenang sera lo’a seraan.
5Jaji dabele awan dinen ira, laloang baki’ Harun daia mamola kosan panutung pamindaraan ijolona anak sapi dinen. Mamin dinen manjarum baki’ Harun lo’a uranga urang Israelen. “Na, aso mina’en rami-ramiki’ itiang manyemba lo’a i Yahuwe,” ingka kenang. 6Jaji di aso mina’a barik babariar bua tauen asadinga laloang mamola pamindara jalu itutungen, mamola pamindara mawa pasikule’angen. Maminna dapola pamindarana, laloang aduduk ira angkaan mainyum. Mamin angkaan mainyum laloang mulai asoak.
7Na, maminna dinen manjarum i Yahuwe lo’a baki’ Musa inang di ukiten, “Se’ tadorko. Kole’a urangu yang iawaan iko minsaluan dari negeri Mesir mamin pola kalena padari ajau’. 8Sikadang kaya lempanga lo’a dalan kuparintangen lo’da’. Mamin ira polaang kalena jalu isembaan dasitak balu’ anak sapi. Mamin dasemba, mamin dapamindara. Arasairunku’ urang Israelen, ialalo di’en jalu isembaan iki’ yang mawaan lo’ka’ minsaluan dari negeri Mesir, ingka kenang manjaruma kakaru’,” ingka kenang manjaruma i Yahuwe lo’a baki’ Musa.
9“Mamin kutamu ratina ira dinen,” ingka kenang manjaruma i Yahuwe lo’a baki’ Musa. “Sampai karasa ateda’ to’ mawa panamu diri’da’. 10Na, ada’ mangaruun lo’ku’. To’ kupayoang jaji arasiku’ lo’da’ ira dinen, to’ kutampusi,” ingka kenang. “Dari nannu poang barik kupadari banua baraa’en,” ingka kenang i Yahuwe.
Baki’ Musa mangamuroang barik lo’a uranga
11Poangsi manjarum barik baki’ Musa mamita tapat lo’a i Yahuwe Alatala yang dasembaan, “O Yahuwe,” ingka. “Tiang asi bakayana arasinu dinen? To’ malawanko lo’a tau iawaan iko minsaluan dari negeri Mesir nanna kuasanu yang palin baraa’en? 12Ai lo’a ati’en ira urang Mesir manjarum ona’ pajau’ lo’u, Daia mawa lo’da’ minsaluan dari Mesir, to’ mauno’ poang lo’da’ di gulungan ukiten. To’ manampusi lo’da’ mainto’ kosanna lagi’ tio’en ibona tana’en, ti’ ingka ona’. Ada’ sampai awan dinen jarumda’. Mamalikang jarum arasinu yang balasaan dinen. Palinang pikirannu dinen. Ada’ pamondokang jalu bahayaan lo’a anak katio’annu. 13Parandam lo’a ira dinen suro’annu baki’ Abraham, baki’ Isak nanna baki’ Israel yang irantangang bayanu nanna jarum basumpaan atas asan diri’u. To’ ipabayu’ anak kanturunanna awan lalo bintangen di suanen bayu’a. Samuana ambata tana’ di’en to’ itawa’i lo’a anak kanturunanna awan lalo bayanu lo’da’. To’ padari ira ampunaan sampai mondok lo’a anak ituntung, lo’a anak ipuit, iko la’ kenang,” ingka kenang manjaruma baki’ Musa lo’a i Yahuwe. 14Jaji tapalin barik pikiranna i Yahuwe. Na’an barik dapamondokang jalu bahayaan awan pikiranna de’i.
15Jaji maminna dinen barik baki’ Musa daia laloang koengang kalena tador dari ukiten mawa balok batu duaan di tanganna. Batu dinen dua-duana datulis dua baliin. 16Batu dinen ialalo dapola kole’a Alatala, tulisannapi tulisanna Alatala yang arabintaren inang di balok batuun.
17Jaji unyida’ madan-madanen dadalinga bua kole’a baki’ Yosuaan dinen. Jaji maminna dadalinga awan dinen laloang manjarum lo’a baki’ Musa, “Suba taan talinganu. Andian unyi tau sikayoon di kosan pakadengan kakalangka’,” ingka kenang.
18Poangsi dasauti barik kole’a baki’ Musa, “Dinen okan.
“Okan unyi tau manaloon yang kudalingaan.
“Okan bea unyi tau ataloon.
“Unyi kudalingaan balu’ unyi tau banyanyi,” ingka kenang manjaruma baki’ Musa.
Arasi baki’ Musa
19Jaji lamba’pi barik indoor ira baki’ Musa, mainso’ lo’a kakalangen, dakita barik anak sapi dapolaan dinen, dakita bea tau mandaria’en. Jaji timbul arasina. Badale’-dale’ arasina dinen di batak nyawana. Laloang daparatang bea dinen balok batuun yang daawaan di tanganna. Laloang abala’ barik batu dinen alao’ di kaki ukiten. 20Laloang dalamba’i anak sapi dapolaan dinen, dala, laloang datutung bua di apiin. Maminna datutung dinen, amasa dinen dabobor-bobor nanna batuun padari tepung. Laloang daseseang bobora dinen ibona danumen. Barik ira tau Israelen dasuro’ arung mainyum danum dinen.
21Jaji manjarum barik baki’ Musa lo’a baki’ Harun, “Asi kenang maam-maama karajanu dinen? Asi ira dinen, mamaksa lo’u aka sampai iduluang iko mawa mamola dosa raana balu’a dinen?” ingka kenang lo’a baki’ Harun.
22“Ada’ arasiin, Pa’e,” ingka kenang baki’ Harun. “Itamuna bua iko kalakuanna ira di’en, mainya’ tapat mamola dosana. 23Kole’a andian jarumda’ lo’ku’, Disa i Musa dinen tau yang mawaan lo’am minsaluan lo’a Mesir? Daikam na’ankam manamu lagi’ lo’a i Musa, ti’ isa kosanna. Se’ polaangkam barik jalu isembaan yang pandeen padari panguluan lamba’am, ingka kenang manjarumda’ lo’ku’. 24Jaji barik kusauti, Intain poang ampuna ayu’ amas ipakaien, leka’ ikin, uka’ kenang. Jaji dameang lo’ku’ amasda’ dinen laloang kutampeang lo’a apiin. Jaji minsaluan dari apiin dinen, kubele Iak, andian timbul anak sapi pan. Din lalo dasembaan kole’da’,” ingka kenang manjaruma baki’ Harun lo’a baki’ Musa.
25Jaji dabele barik kole’a baki’ Musa, tau Israelen dinen na’an lagi’ dapat ijarumi. Na’an dapat iparinta, kole’a maminna dapalaloang kole’a baki’ Harun dinen. Mamin parabor kalena dakitana kole’a ambata gulungan musuda’. 26Jaji akadeng barik daia di akat dalan intamaan lo’a kosan pakadengan kakalangda’ dinen laloang manjarum, “Intain poang mangamuroangen lo’a i Yahuwe nanga lo’a di’en,” ingka kenang manjaruma. Jaji dababangkulungi barik baki’ Musa kole’a ira suku Lewiin.
27Jaji manjarum bapi, “Kenang jaruma i Yahuwe, Alatala yang isembaan iki’ tau Israelen. Se’, manakin basikin maira babakaan. Lamba’kin urait kalaut di kosan pakadengan kakalangka’ di’en, dari sabala’ lo’a sabala’. Uno’ ikin arasairunin, arakawannin, araurangin,” ingka kenang parintana. 28Jaji dalola’ani awan bua jaruma baki’ Musa dinen kole’da’ suku Lewiin. Dalam sasoon dinen andian kira-kira tiga ribu mantuari bayu’a yang mateen urangda’ dinen.
29Jaji manjarum bapi baki’ Musa, “Na daikin rabarik di aso di’en mamin laanang kalenin lo’a urangin bokanen padari suro’anna i Yahuwe. Kole’a maminna dinen malawan sera-seranin lo’a araanakin, lo’a arasairunin. Maminkin daberkati barik kole’a i Yahuwe di aso di’en,” ingka kenang manjaruma baki’ Musa.
30Jaji di aso mina’a barik manjarum baki’ Musa, “Daikin di’en balasa tapat dosanin yang ipolaan dinen. Poangsi daiak barik to’ inaitak lo’a i Yahuwe. Ungka’en mainya’pi kuawa pasikule’angen itiang maurus dosanin di’en.”
31Jaji mole’ inait barik baki’ Musa, madap lo’a i Yahuwe, laloang manjarum, “Balasa tapat dosa yang dapolaan kole’da’ suku di’en! Sampai mamola jalu isembaan dari amasen. 32Poangsi daiak kupita lo’u, amponi poang dosada’. Poangsi ati’en na’an dapat iamponi labi maam asanku’ iapus dari buku’ itulisangen iko,” ingka kenang manjaruma baki’ Musa lo’a i Yahuwe.
33Jaji manjarum barik i Yahuwe lo’a baki’ Musa, “Na’an kenang. Intain poang badosaan ijolona aroku’, asanna tau dinen kuapusen dari buku’ku’,” ingka kenang. 34“Na se’. Lamba’ko barik. Mauluang banua di’en lo’a kosan kujarumangen dinen lo’u. Malaikatku’ dinen tetap lamba’ ijolonu. Poangsi mondok ona’ to’ kudukum, tetap kudukum dosana ira di’en nanna panyakit samparen,” ingka kenang i Yahuwe lo’a baki’ Musa.
35Jaji barik dalao’i banua dinen nanna panyakit samparen. Daukum kole’a basada’ dinen yang dapolaan nanna anak sapi dapolaan kole’a baki’ Harun.
Currently Selected:
Palapasang 32: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
