Palapasang 2

Baki’ Musa daparanakang

1Jaji nanga dinen andian ira kanturunanna baki’ Lewi dinen siala sama diri’a. Sama ira duaan suku Lewi. 2Jaji araunting barik. Maminna araunting dinen barik, aranak babakaan. Jaji dabele nangkanak dinen kole’a induna, palin maam batora. Jaji ka’ mase’-mase’a anak dinen. Jaji dalamun barik. Talung bulan launna dalamunna ilalam saoen. 3Poangsi maminna dalamun dinen dalam talung bulan, na’an dakule’ barik dalamun kole’a induna. Laloang barik dapolaang babakul kole’a induna. Babakul dinen dakaruin maam-maam. Nangkanak dinen dataro’ rabarik ilalam babakulen dinen laloang daantat lo’a biring sunge Nil, dasuro’ tambol-ambol poang inang antarana ambata rimput gelagaan. 4Jaji barik andian kakana yang atoan dinen, dabele poang dinen babakul kosanna arina dinen, ti’ ai yang manuun ona’ lo’a arina dinen.

5Jaji maminna dinen barik, anaka rajaan yang babainyeen tador inang mandi’ nanna ambata gulungan suro’anna dinen. Mondok di biring sunge Nil dinen lamba’-lamba’. Jaji dakita dinen babakulen kole’a anaka rajaan, dasuro’ ala barik lo’a suro’anna. Maminna dala barik, 6dabele ilalama, andian nangkanak babakaan. Anak dinen laloang anangis. Laloang iapi ka’ mase’-mase’a. Jaji barik manjarum anaka rajaan dinen, “Kosan tau bokan di’i tentula anaka urang Ibrani dinen, kanturunanna Israel,” ingka kenang manjaruma lo’a suro’anna dinen.

7Jaji maminna dinen barik laloang dainso’i barik kole’a kakana nangkanaken dinen de’i manjarum lo’a anaka rajaan dinen, “Ai lo’a ti’en kusariang babainye tau Ibraniin, anak di’en ipanusu’ang lo’a itiang anaku?” ingka kenang.

8Jaji manyauti barik anaka rajaan, “O’, alaangla itiang panusu’ nangkanak di’en,” ingka kenang. Laloang daalaang lo’a indu diri’a bua. 9Mondok inang rabarik induna, manjarum anaka rajaan lo’a, “Na, awa nangkanak di’en ipanusu’. Bele ona’ kudopa’inu,” ingka kenang manjaruma lo’a induna. Laloang daawa barik nangkanak dinen, dapanusu’. 10Baraa barik nangkanak dinen, lapas manusu’a. Daantat bua lo’a anaka rajaan padari anaka. Jaji daasan kole’a anaka rajaan barik, i Musa asanna, kole’a daruaranga di danum sungeen. Ialalo iasanna i Musa.#2:10 Musa dinen mainso’ unyina nanna jarum Ibraniin yang ratina, iruarang.

Arari baki’ Musa lo’a negeri Midian

11Jaji maminna dinen barik, maminna baraa baki’ Musa dinen, lamba’ daia mamele lo’a uranga yang karaja ipaksa’en inang. Di lamba’a barik, andian jalu dakitaan kole’a baki’ Musa, urang Mesiren maniangen lo’a uranga seraan, lo’a urang Israelen. 12Jaji mamele kuliling-kuliling baki’ Musa dinen, dabele kosan tau, laloang dauno’ urang Mesiren dinen. Maminna dinen bangkayoanna dakaliang di kasiken inang.

13Maminna dinen, imbara aso seraan, lamba’ bapi baki’ Musaan, sidua’ dinen nanna tau sijaien. Urang Ibrani sama urang Ibraniin sitiang. Jaji barik darada’i, “Ai kenang maam-maam mabalu lo’a kawannu? Padahal sairunkin. Sama urang Israelkin,” ingka kenang marada’ina baki’ Musa lo’a tau arasala’en dinen.

14Jaji manjarum seraan, “Ai daiko kenangu, baraninu marada’i lo’am? Intain padariin lo’u paurus lo’am? Ai daiak, to’ iduno’ak bapi di’en awan urang Mesiren iduno’en iko imalam?” ingka kenang manyauta tau dinen.

Jaji atakut baki’ Musa mandalingaan awan dinen. “Ado, kalakuanku’ dinen yang mamin mauno’ tau, datamu pan mamin kole’a tauen,” ingka kenang nyawana.

15Jaji raja maminna manamu dinen kalakuanna baki’ Musa, dasari barik baki’ Musa dinen, to’ dabalas dauno’. Poangsi baki’ Musa daia rariang kalena babajao’ lo’a raja Mesiren, arari to’ lalako’ di negeri Midian.

Mondok inang rabarik aduduk baki’ Musa di biringa loang kali palanan danumen. 16Jaji andian imamen di Midian dinen Yitro asanna.#2:16 Andian bapi asanna i Yitro dinen, i Rehuel asanna. Andian anaka i Yitro babainyeen tuju yang mondok malapang danum inang itiang painyumi gulungan dombana amanna. To’ malapang danum tiang maisi’i pampalungen dinen, 17mondok rabarik panuntuani domba bokanen. Dauser anaka imamen dinen. Poangsi dagulungi barik kole’a baki’ Musa dinen, laloang maisi’i pampalung danuma dinen sampai akaus itiang painyumi dombana amana babainyeen dinen. Jaji mole’ ira dinen barik, kole’a maminna akaus apano’ gulungan pampalunga dinen.

18Jaji mondok barik lo’a amana, dakatoani, “Mai bariarin kakaru’ mole’en aso di’en?” ingka kenang amana.

19Jaji dasauti, “Asi na’annam bariar. Andianen tau Mesiren inang manggulungiin, yang mangamuroangen lo’am lo’a panuntuani inatangen de’i. Ia malapangang danumen itiang painyumi ambata dombaan,” ingka kenang tutulanda’ lo’a amana.

20“Bo, isasi barik daia?” ingka kenang amana. “Asi irantang unjanga kakaru’ ikin. Awa angkaan indi’angen, se’,” ingka kenang baki’ Yitro lo’a araanaka. 21Baki’ Musapi barik mainya’ daawa lalako’ nanna tamatoa dinen. Dapasialaang barik nanna anaka dinen i Sipora asanna. 22Ada’a launna barik, araunting piang Sipora dinen, aranak babakaan. Dameang asan barik kole’a baki’ Musa, i Gersom asanna. Kole’a manjarum baki’ Musa, “Padari tau bokanak rabarik, lalako’ di banua tauen,” ingka kenang. Ialalo daasan i Gersom.#2:22 Gersom dinen mainso’ unyina nanna jarum baratiin lalako’ manumpang di banua tauen.

Baki’ Musa dasuro’ mole’ balik lo’a Mesir

23Balaun maminna arari baki’ Musa barik, raja Mesiren dinen mate. Jaji ambata gulunganna, tau Israelen dinen yang karaja ipaksa’en tinggal ka’ mase’-mase’ poang. Sampai marinsa’a. Sampai nanna anangisa dinen ira panaat susana kole’a karaja paksana, sampai pasiak-siak mangalonga lo’a Alatala suro’ gulungi kalena dalam karaja pangkama. 24Jaji dadalinga bua kole’a Alatala do’ada’ dinen mangalongen lo’a. Daparandam bua baya darantangenjo dinen lo’a arabaki’da’ baki’ Abraham, baki’ Isak nanna baki’ Yakub. 25Dabele bua susada’, dakamase’i.

Currently Selected:

Palapasang 2: EBE

Highlight

Copy

Compare