Palapasang 25
25
Urang Israelen dasuro’ mamola kakalang palamba’en itiang kosan manyembada’ lo’a Alatala
1Jaji manjarum barik i Yahuwe lo’a baki’ Musa, 2“Manjarumko lo’da’ ambata anak kanturunanna baki’ Israel nanga mawa pameanga lo’ku’. Pameangda’ yang itarima’en iko atas asanku’ bele kaputusanna dalam atena sera-serana. 3Jaji pameang yang itarima’en kenang.
“Ambata barang amas, barang pirak, barang tamagaan,
4“ambata gulungan banang, banang biruun, banang kakalamuntingen nanna banang dadara’ toaan,
“ambata kain lenan alusen, kain bulu kambing,
5“ambata kulit inatangen, kulit domba lakiin yang maminen imeang warna dadara’en, kulit lumba-lumba,
“ambata kayu akasiaan,
6“ambata inyak lampuun,
“ambata gulungan bumbu yang itiang pamarok inyak yang ilulukangen lo’a jalu illaanangen dinen itiang lo’a i Yahuwe,
“ambata bumbu garu,
7“ambata batu indaan yang itiang palakat di epod nanna kain panutup arona imamen dinen.
“Kenang pameangda’ yang itarima’en.
8“Jaji manyuro’ lo’da’ mamola kakalang palamba’ kusus itiang lo’ku’ mainto’ dapatku’ lalako’ di antarada’. 9Kakalangku’ dinen polana, arung sama jaji nanna sonto kupayoangen lo’u. Kenang bea ambata gulungan alata, arung ilola’ani jaji sonto dinen,” ingka kenang paba’ina i Yahuwe.
Dasuro’ mamola kas itiang bukti bayana Alatala
10“Jaji ira dinen suro’ mamola kas, kas dari kayu akasiaan. Langkena kas dinen arung ipola 110 sentimeter. Buka’a arung 66 sentimeter nanna kadenga inait 66 sentimeter. 11Maminna dari kas dinen, arung ilapisi kausa barik nanna amas yang itanak isilongiin. Kenang bea insaluan, kenang bea ilalam ilapisina. Laloang arung ipolaang bingkena kulilingen, ipola dari amasen.
12“Mamin dinen arung ipolaang bea kangkalunga amasen ampat, laloang arung ipalakat maro inyaungen, dua sabala’, dua sabala’. 13-14Maminna dinen, polaang bea kayu gugulungen yang balangkeen. Kayu gugulungen dinen itiang panangkun kas dinen, irurukang lo’a galangen dinen. Jaji kayu panangkun dinen arung ilapisi bea nanna amasen. 15Maminna irurukang kayu dinen lo’a kangkalungen, arung laloang lalako’ poang inang di kangkalungen. Na’an pande irarak lagi’. 16Inang barik iapisa jalu kumeangen lo’u itiang tanda bukti kaputusan bayaku’ yang kupolaan nannin, iapis ilalam kas dinen.
17“Jaji maminna adari kasen barik, arung ipola bapi tolopa yang itiang kosan maurusiin amponan dosaan. Tolop kas dinen arung ipola dari amas itanak isilongiin. Langkena tolop dinen arung ipola 110 sentimeter, buka’a arung 66 sentimeter. 18Jaji di papasanna kas dua sapoloon arung ipola bapi jalu balu’ malaikaten dua, ipola dari amas yang itampaan. 19Sera malaikat ipola di papasanna seraan, sera di papasanna seraan. Polana arung sanyadi nanna tolop kasen, ipola nanna malaikat di papasanna dua sapoloon. 20Jaji sapa malaikat duaan dinen arung itanggeang inait itiang mangaungani tolop kasen.
21“Jaji maminna adari tolop kasen, arung ijalaang barik inang lo’a kasen. Ilalam kasen arung iapis barik ikin jalu kumeangen lo’u itiang tanda bukti kaputusan bayaku’ kupolaan nannin. 22Ibona kasen inang antarana malaikat duaan, inang kosan sidua’ka’. Dari inang kujarumangen ambata gulungan parinta yang kusuro’ pamondokang lo’a ambata anak kanturunanna baki’ Israel,” ingka kenang manjaruma i Yahuwe lo’a baki’ Musa.
Dasuro’ mamola meja datiang panyorongi rotiin lo’a Alatala
23“Maminna adari kas bukti bayaan, arung ipola bapi mejaan dari kayu akasiaan. Langkena meja dinen arung 88 sentimeter polana, buka’a arung 44 sentimeter, langkena inait 66 sentimeter. 24Meja dinen arung ilapisi barik nanna amas itanak isilongin laloang arung ipolaang bingkena kuliling. 25Inyaunga bingkena arung ipolaang kuliling papunna yang 7,5 sentimeter buka’a, laloang arung imeang bapi bingkena dari amasen. 26Mamin dinen arung ipolaang bapi kangkalung amasen ampat, ipalakat lo’a susu’ ampaten di biringa kakina. 27Arung ipalakat maro ibo mainso’ lo’a bingkena. Parurukan kayu gugulungen inang mainto’ dapata itangkun ati’en lamba’. 28Kayu datiang rurukang di galangen dinen arung ipola dari kayu akasiaan laloang arung ilapisi nanna amasen. Dinen ipakaien ikin itiang manangkun meja panyorongiin.
29“Jaji alat itaro’en ibona mejaan arung ipola bea dari amas itanak isilongiin, ambata pinggan, bokor, sarata teko nanna mangkoken yang itiang maolongang danum isorongangen lo’a i Yahuwe. 30Inang taro’a rotiin mainto’ andianna lapoang ijoloku’ mairaso,” ingka kenang paba’ina i Yahuwe lo’a baki’ Musa.
Dasuro’ mamola dudukan palita
31“Maminna dinen mamolakin dudukan palita. Arung itampa, ipola sakala dari amas itanak isilongin. Dari akata sarata pampanga nanna mangkoka, sarata dudukan timbukas bungaan nanna timbukas bunga maminen taungkar, samuana arung ipola sakala dari amasen. 32Dari akata inang arung apampang dua bali, talu sabala’, talu sabala’. 33Maira pampang dinen arung imeang maira mangkoka talu yang ibator balu’ timbukas badam yang maminen taungkar. Laloang arung tasusun inang dudukan timbukas bungaan nanna timbukas bunga yang maminen taungkar. Kenang kausa susunanna bunga pampang anamen dinen. 34Laloang di akata inang arung andian mangkok ampaten yang ibator balu’ timbukas badam yang maminen taungkar, sarata arung imeang inang dudukan timbukas bungaan nanna timbukas bunga yang maminen taungkar. 35Jaji dudukan timbukas bungaan seraan ipola inyaunga pampang mulakataan, yang apampangen sera sabala’, sera sabala’. Laloang dudukan timbukas bunga kaduaan arung ipola inang inyaunga pampang kaduaan. Inyaunga pampang kataluun, kenang bapi ipola dudukan timbukas bunga inyaunga pampanga. Jaji pampanga dinen anam samuana. 36Timbukasen nanna pampanga dinen arung itampa, ipola sakala nanna akata, dari amas itanak isilongiin.
37“Maminna adari dudukanna, arung ipola bapi palitana. Laloang itaro’ inang di dudukanna mainto’ arawanga inang di arona. 38Jaji ambata alat itiang pamaami sumbuna, nanna kosan panaro’an alata dinen arung ipola bea dari amas itanak isilongiin. 39Jaji borata amasen yang itiang mamola dudukan palitaan nanna ambata gulungan alat arung 35 kilogram amas yang itanak isilongiin. 40Jaji maam-maam polana ikin mainto’ sama jaji nanna sonto kupayoangen lo’u di ukit di’en,” ingka kenang paba’ina i Yahuwe lo’a baki’ Musa.
Currently Selected:
Palapasang 25: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
