Palapasang 23

Malaikata Alatala dasuro’ tajolo itiang mangamasang dalanna

20Jaji manjarum barik i Yahuwe, “Na, di’en, mamin kusuro’ malaikatku’ lamba’ ijolonin itiang manyagai lo’in, itiang mawa lo’in lo’a kosan kukamasangen mamin itiang lo’in. 21Arung ipaduli ikin. Arungkin manaantalinga lo’a jalu dajarumangen lo’in. Ada’kin malawanen lo’a. Ada’ basaruiten. Ona’ ti’ ilawan ikin, na’an lagi’ daamponi basa malawanin dinen. Kole’a manjaruma dinen samuana manjarum atas asanku’, mamin asanku’ kutaro’ nanna. 22Ati’enkin mainya’ manaantalinga, ati’en akaus ilola’ani ambata gulungan jarum kusuro’angen lo’a, iak barik mangayoon lo’a ambata gulungan pangayonin, iak malawanen lo’a gulungan lawannin. 23Kole’a malaikatku’ dinen kusuro’ lamba’ di jolona aronin itiang mawa lo’in lo’a tana’ dalalako’iin kole’a ambata suku urang Amori, urang Het, urang Peris, urang Kana’an, urang Hewi, urang Yebus. Samuana ambata gulungan suku dinen kutampusi.

24“Na, ada’kin tunduken lo’a jalu dasembaan kole’a suku kutampusiin dinen. Arung irarak jaji ikin ambata gulungan jalu dasembaan kole’da’. Ambata batu isembaan arung ibobor ikin. Ada’ isembana ikin, ada’ ilola’anina ambata adatda’. 25Manyembakin poang lo’a i Yahuwe Alatalanin. Ti’ isemba ikin i Yahuwe, baru’ ambata gulungan jalu ikaanen ikin, ambata jalu idinyumen ikin, kupamaam. Kupanjao’ ambata panyakiten dari antaranin, kukapi’ang. 26Arabainyenin ona’ di arauntinga, kosan anak yang mondok loloon. Kosan ona’ tamanangen. Kosankin ona’ yang polo tio’en. Kenang kamaamanku’ lo’in ati’enkin mainya’ malola’ani panamuku’.

27“Ona’ kusuro’ lamba’ ijolonin jalu yang ikatakutangen manyuro’ aru lo’a ambata gulungan negeri ilaloien dinen. Kusuro’ arari atakuta. Balakanga poang yang ikitaan. 28Ambata tauwan kali kusuro’ mainsap ijolonin itiang maruru lo’a ambata suku urang Hewiin, urang Kana’anen, urang Heten. 29Poangsi okan bariar kutampusina. Okan dalam sataunen. Kole’a ati’en akaus ilalam sataunen, ona’ padari balin tana’ dinen. Arusak kole’a kosanna tau manuntuaniin. Ona’ bayu’ to’ inatang batiin. 30Sakakapit-sakakapit ona’ kururuna ijolonin. Salalao’a anyapa mainto’ sikadanan bayu’in, mainto’ sukupin itiang mangkam di tana’ dinen. Kenang sara mangataloangku’ lo’da’.”

Currently Selected:

Palapasang 23: EBE

Highlight

Copy

Compare