Palapasang 22

1Jaji ukuman tau mangaliten, umpamana andian tau mangalit sapi seraan atau domba seraan, laloang dasambeli atau dapet, tetap daia arung manyurangi. Ati’en sapi arung isurangi nanna sapi lima. Ati’en domba arung isurangi nanna domba ampat.

2Umpamana pangalit dinen darambit patanga’an intamana to’ mangalit jaluun, datiang mainya’, dababal mainya’ kapisi sampai mate. Tau mauno’en pangalit dinen na’an dadua’ ukum, na’an arautang dara’. 3Poangsi ati’en jalu dinen adari di maminna tabae’ matasoon, daia tetap arautang dara’ yang mauno’en dinen.

Tau mangaliten arung manyurangi kausa jalu dakaliten. Ati’en daia tapat angkosan jalu dajaputen itiang manyurangi jalu dakaliten, arung diri’a ipet itiang mamayar utanga.

4Umpamana inatang sapi atau domba yang dakaliten, idua’ang di tanganna pangaliten. Ti’ masipi tio’ inatang dinen, tau mangaliten arung mamayar dua kali lipat.

5Umpamana inatangka’ ipakai itiang paimbari di umaka’ atau kobon anggurka’ ati’en ipalaloang lamba’ sampai mandaliti lo’a tana’ tauen angkaanna, iki’ yang ampuna inatang dinen arung manyurangi jalu dakaanen dinen. Arung isurangi nanna asela tana’ diri’ka’, asel yang palin maamen. Awan dinenla surangina kole’ka’.

6Umpamana matio’ apiki’ yang angkaanen lo’a jalu arapati’en mondok talola’ dakaan uma tauen, arungki’ barik manyurangi karugian dinen. Maam asel uma yang maminen ikatam, maam yang akadengenpi yang nampiin ikatam, maam ti’en akausa itutung umaan, iki’ yang matio’ apiin arung manyurang karugianna dinen nanna sukupa.

7Umpamana andian tau marantang duit atau jaluun lo’a kawanna, dasuro’ maruangi, barik jalu dinen dakalit tau dari saona kawanna dinen. Ati’en idua’ang tau mangaliten, arung dabayar kole’a pangaliten. Duang kali lipat dasurangina jalu yang inyapen dinen. 8Ungka’en poang na’an idua’ang tau pangaliten, tau ampuna sao darantangi jalu dinen de’i, arung daia madap lo’a paurusen mainto’ itamuna iana mangaliten nanna okanna. 9Jaji soal tau pasikoloang jaluun, maam lo’a sapi, keledai, domba, ataupun kain atau jalu bokanen yang anyapen, ira dua pihaken arung iawa madap di arona paurusen. Intain daasanen sala’ barik kole’a paurusen, daia arung mamayar jalu dinen duang kali lipat.

10Umpamana andian tau marantang inatangen lo’a kawanna, dasuro’ maruangi. Maam sapi, keledai, domba, kenang bea inatang bokanen, ati’en laloang mate, atau dadua’ padis, ataupun dala tau di nanga kosanna tau mangitaan, 11na’an parulu daia manyurangi itiang maurus dinen, tau darantangi inatang di’en arung basumpa atas asanna Alatala kole’a okan ia yang manuun. Laloang kawanna yang ampunaan inatang dinen arung manarima’ jarum dinen, arung daia parasaya’ lo’a atas sumpana dinen. Daia na’an parulu manyurangi karugianna dinen. 12Poangsi ati’en tapat jalu dinen dakalit lo’a waktu iana mangaruangiin, arung daia manyurangi karugianna. 13Ati’en inatang dinen datingkam inatang paita’en, ti’en dasarikang, tau dinen arung mawa bangkayoanna dinen itiang bukti. Daia na’an parulu manyurangi karugianna ti’ inatang yang datingkam jaluun.

14Umpamana andian tau mainjam inatang sera dari nanna kawanna, laloang inatang dinen dadua’ padis atau mate di anyapa tau ampunaan, barik tau mainjamen arung manyurangi karugian dinen kausana. 15Poangsi ati’en tau ampuna dinen andian inang di nanga dadua’ padisa inatanga, tau mainjamen dinen na’an parulu manyurangi karugianna. Kenang bea ati’en inatang dinen dasewa, na’an parulu daia mamayar bapi karugianna, kole’a karugianna dinen mamin tamasok ilalam raga sewaan. Akaus nanna raga sewana dinen.

Adata Alatala yang itiang maurusi lo’a basa sala’en

16Umpamana andian babaka yang dakule’en mala atena anak babainye bungasen, daia sampai manindo’i. Jaji anak babainye dinen nampiin itajuk. Babaka dinen barik arung mamayar kain ingko’a nanna pano’a manurut adata anak babainye yang bungasen. Daia laloang siala. Na’an pande na’an siala. 17Poangsi ati’en de’i amana babainye dinen alibak lo’a babaka dinen, dapase’ang siala nanna anaka, babaka dinen arung tetap mamayar kain ingko’a nanna apano’a manurut raga kain ingko’ babainye bungasen. Na’an poang adari ira siala. Kenang adata ti’en babaka manindo’i anak babainye bungasen.

18Intain poang babainyeen yang mamakai panamuna awan lalo panuntut atau balianen, ada’ ipalaloang tio’. Daia arung idukum mate.

19Intain poang mamolaan basa na’anen baguna, yang sibasananen nanna inatangen na’an pande ipalaloang tio’. Tau sinjamanen nanna inatangen, arung idukum mate.

20Intain poang mamolaan pamindara lo’a jalu bokanen yang okanen i Yahuwe, daia arung itampusi.

21Ada’ parinsa’ina tau asingen yang lalako’en antaranin. Ada’ itakanna, ada’ ilola’-lola’anga, kole’a daikinpi ijoloon lalako’kin bea awan lalo tau asingen inang di negeri Mesir, lalako’ di banua tauen.

22Bainye baluun nanna anak biuun, ada’ iparinsa’ina. Ada’ malao’angen jaluun lo’a. 23Ati’en dapukoang, unyida’ kalongangen kalena lo’ku’ mamita idurusi, pasti kudalinga. 24Pasti tio’ arasiku’ laloang kuduno’ lo’in pamondokang suno’anen lo’in. Kabalikanna, bainyenin rabarik yang padariin bainye baluun. Anakin barik padari anak biuun ti’ mamin kudurusi.

Currently Selected:

Palapasang 22: EBE

Highlight

Copy

Compare