Palapasang 20

Darantang Ukum Sapulo’en

1Mamin dinen manjarum barik Alatala kenang,

2“Iak lalo di’en i Yahuwe, Alatala yang isembaan ikin. Iak lalo yang mawaan lo’in minsaluan dari negeri Mesir, yang mamasutangen lo’in lo’a karaja pangkamen. 3Ada’ andian jalu bokanen lo’ku’ yang isembaan ikin, ingka kenang.

4“Ada’ polaanga kalenin jalu isembaan, kapi balu’ ai batora. Kapi balu’ jalu di suanen ibo, kapi balu’ jalu di tana’en inyaung, kapi jalu di danumen ilalam tana’en, na’an pande itiroi mamola jalu isembaan. 5Ada’kin tunduk lo’a, ada’kin mangalongen lo’a. Kole’a iak di’en i Yahuwe Alatalanin paimburoak. Kupase’angkin lo’a jalu isembaan bokanen. Kubalas iak kajau’an tau mangalibakangen lo’ku’ mondok lo’a anaka, mondok lo’a ampuna, mondok lo’a anak ipuit. 6Poangsi lo’a tau mangasaangen lo’ku’, yang mainya’en malola’ani parintaku’ kupayoang bea pangasaangku’. Sampai lo’a baribu-ribuaan kanturunanna kupayoanga pangasaangku’ ingka kenang.

7“Asanku’ i Yahuwe Alatalanin na’an pande iasan iala palulu’an. Tetap kudukum tau masanen asanku’ mala palulu’an, ingka kenang.

8“Adat aso katujuun ada’ lilu’a ikin. Samua parinta aso Sabaten arung ilola’ani, ilaanang lo’a aso bokanen itiang parandam lo’ku’. 9Anam aso launna pandekin bakaraja, sukup itiang mangausang karajanin. 10Poangsi aso yang katujuun dinen mamin ilaanang itiang lo’ku’, aso sangarianen. Aso dinen na’ankin pande bakaraja. Maam ikin, maam anakin babaka babainyeen, maam suro’annin babaka babainyeen, maam inatangin, maam bea tau asingen yang lalako’en nannin, samuana kupase’ang bakaraja di aso katujuun. 11Ratina kenangku’, kole’a awan dinen lalo karajaku’ i Yahuwe, Alatala yang isembaan ikin. Nanga mamola duniaku’ akaus kupola dalam anam aso. Ambata suanen, tana’en, jawaan nanna ambata gulungan isi’a akaus adari kole’ku’ dalam anam asoon. Rabarik mondok aso yang katujuun, sangarianak barik. Ialalo aso yang katujuun kulaananga lo’a aso bokanen, kupamaam, ingka kenang.

12“Padulikin lo’a amanin, padulikin lo’a indunin mainto’ balangkena tio’in di tana’in ona’, tana’ kumeangen iak i Yahuwe, Alatala yang isembaan ikin, ingka kenang.

13“Ada’ mauno’en.

14“Ada’ manyiuken.

15“Ada’ mangaliten.

16“Ada’ mawa saksi panganung-anungen, yang manyopoon lo’a tauen, ingka kenang.

17“Ada’ mangaingini jalu tauen. Maam saona, maam bainyena, maam suro’anna babaka babainyeen, maam sapina atau keledaina atau ai poang yang mamin tauen ampunaan, ada’ ikainginina,” ingka kenang parinta ukuma i Yahuwe lo’a urang Israelen.

18Jaji barik maminna dadalinga dalak dinen nanna unyi jalu itiapen dinen, maminna dabele dinen kilaten nanna rimbu apiin, laloang kikirik ira. Babajao’ barik akadengda’, atakut mainso’ lo’a ukiten. 19Jaji manjarum lo’a barik baki’ Musa, “Iko poang manjarumen lo’am. Daikam manaantalingakam lo’u. Ada’ poang Alatala manjarumen lo’am. Ona’ matekam,” ingka kenang jarumda’ lo’a baki’ Musa.

20Jaji manjarum barik baki’ Musa, “Ada’kin atakuten. Alatala dinen mondoka, to’ mangilalai lo’in. Mainto’ itamuna ikin atakuten lo’a Alatala, mainto’ na’annin mamola dosaan,” ingka kenang.

Currently Selected:

Palapasang 20: EBE

Highlight

Copy

Compare