Palapasang 19

Urang Israelen kamasang kalena to’ madap lo’a i Yahuwe di ukit Sinai

(Awan bua bayana Alatalajo dinen lo’a baki’ Musa)

1Jaji mondok ira dinen lo’a kasik Sinai. Mondok dinen pas di bulan kataluna maminna ambata anak kanturunanna baki’ Israel dinen minsaluanna dari negeri Mesir. 2Di tangkatda’ dari Rapidim, lamba’ ira di kasik baraa’en laloang samalam inang di ukit Sinai.

3Jaji mondok inang baki’ Musa laloang anait di ukiten itiang pasidua’ang kalena nanna Alatala. Jaji mangalong barik i Yahuwe dari ukiten manjarum lo’a baki’ Musa, “Na di’en jarumang lo’a ambata anak kanturunanna baki’ Yakub dinen, lo’a ambata urang Israelen. 4Daikin mata diri’in yang maitaan ambata jalu yang kuanuun lo’a urang Mesiren dinen, iko kenang. Awan lalo burung rajawaliin dinen yang mawaan lo’a anaka mainsap, dauwatang di balakanga, awan dinen sama’a mawaku’ lo’in sampai mondok lo’ku’ indi’angen. Mamin itamu ikin,” ingka kenang.

5“Jaji kenang. Ati’enkin tapat-tapat mainya’ malola’ani panamuku’, ati’enkin pamatang baya kupolaan nannin, daikin barik padari anak katio’annaku’, padari anak amasku’ yang palin indaan. Samuana ambata jalu inyaunga galung suanen tapat daiak kausana. Poangsi ikin poang antarana samuana ambata gulungan suku di duniaan yang kuanggapen awan iak ampunaan. 6Daikinpi kupadari awan lalo suku imamen yang mawa urusanen antarana tau bokanen nanku’. Awan lalo negeri yang ilaanangen itiang lo’a diri’ku’kin, awan dinen jarumku’ yang kusuro’ pamondokangen lo’da’,” ingka kenang manjaruma i Yahuwe lo’a baki’ Musa.

7Jaji mole’ balik barik baki’ Musa laloang mawa kombong lo’a ambata gulungan urang Israelen. Maminna kombong dapamondokang barik ambata gulungan jaruma i Yahuwe dinen awan paba’ina lo’a. 8Jaji manyauti sasarata dinen urang Israelen, “Samuana ambata gulungan jalu dajarumangen kole’a i Yahuwe, ilola’ani ikam kausana,” ingka kenang jarumda’. Jaji jarumda’ dinen barik yang daawaan inait lo’a i Yahuwe kole’a baki’ Musa.

9Jaji manjarum barik i Yahuwe lo’a baki’ Musa, “Daiak ona’ to’ mondokak lo’u ilalam dom yang bakayaan, to’ manjarum lo’u di arona tauen. Kenangku’ mainto’ dadalingana kole’a banuaka’ di’en, mainto’ daparasaya’inu lapoang kole’da’,” ingka kenang. Laloang dapamondokang bua jarumda’ lo’a i Yahuwe.

10Jaji manjarum bapi i Yahuwe, “Jaji mole’ko indor. Maurus lo’da’ mainto’ bakamasa itiang madap lo’ku’. Mulai di aso di’en sampai aso mina’ ira arung pasisarakang kalena lo’a jalu ajau’en. Ambata pakaianda’ arung dakusuk, 11laloang mondok aso kataluun arung ira mamin kamas, kole’a daiak i Yahuwe to’ tadorak paitang kaleku’ di arona ambata urang Israelen di ukit Sinai di’en,” ingka kenang.

12“Jaji banuaka’ nanna ukit di’en arung idintarai kuliling. Arungko manjarum lo’da’. Maam-maamkin, iko kenang. Ada’ lamba’en inait lo’a ukit dinen. Ada’ tadua’ lo’a kakina. Intain poang tadua’en lo’a ukit dinen tetap daia idukum mate. 13Ti’ andian yang tadua’en lo’a ukit dinen ada’ lagi’ dajaput tauna. Arung daia daparati nanna batuun atau ipana sampai mate. Maam inatang kenang bea mantuariin, na’an pande lagi’ ipalaloang tio’ iko kenang lo’da’. Ti’ andian idalinga tarompet alele-leleen unyina,#19:13 Ilalam jarum Ibrani tarompet dinen ipola dari tanduk domba lakiin. baru’ pande idinso’i barik ukiten,” ingka kenang manjaruma i Yahuwe lo’a baki’ Musa.

14Jaji tador barik baki’ Musa dari ukit dinen pasidua’ang kalena nanna tau banua dinen. Dasuro’ kamas-kamas itiang madap lo’a i Yahuwe. Jaji dalola’ani bua. Dakusuk barik ambata pakaianda’. 15Mamin dinen manjarum bapi lo’da’, “Na, kamaskin lo’a aso kataluun. Ada’kin sitindo’anen ijolo launna nampi mondok aso kataluun, supaya bakamaskin lo’a aso kataluun, supayakin barese,” ingka kenang.

16Jaji imbara asoon barik di aso yang kataluun, mondok unyi dalak mamatupen, mondok kilat paramanyar-manyaren. Bakaya bea domen yang mondok manutupi ukiten. Sarata mondok bea barik unyi jalu itiapen saja balasa tapat. Kikirik kausa tolanga tau yang lalako’ inang di kosan pakadengan kakalang palamba’en dinen. 17Jaji baki’ Musa barik dinen mawa uranga dinen maruar dari kakalang palamba’da’ to’ madapi lo’a Alatala. Barik akadeng samuana kulilinga kaki ukiten dinen. 18Akaus damumbuni ukit dinen nanna rimbuun kole’a i Yahuwe dinen tadora lo’a dinen ilalam apiin. Maruap-ruap rimbu api dinen awan lalo uma akarumpangen atutunga. Kenang bea tatagara ukit dinen, balasa tapat tatagara. 19Jaji unyi jalu itiapen dinen taling-aling insang-insang balasa unyina, laloang manjarum baki’ Musa. Laloang dasauti kole’a Alatala ilalam unyi dalaken.

20Jaji tador barik i Yahuwe inang mondok ibona tompok ukit Sinai dinen. Laloang dakalong baki’ Musa dasuro’ inait lo’a tompok ukiten. Baki’ Musapi laloang anait. 21Jaji manjarum barik i Yahuwe lo’a baki’ Musa, “Tadorko laloang manjarumi lo’da’ mainto’ na’anna uluang ate kalena inang lasana to’ mamele lo’ku’ i Yahuwe. Ada’ sampai bayu’ kulao’iin nanna ukum mateen,” ingka kenang. 22“Imamenpi yang to’ mainso’iin lo’ku’ arung kamasang kalena tajolo mainto’ na’anna dadua’ arasiku’ i Yahuwe,” ingka kenang.

23Jaji manyauti barik baki’ Musa, “Maam dini. Kosan mai. Na’an dakule’ ira inait di ukiten kole’a andian mamin jarumu, ukit di’en isuro’ idintarai itiang pasilanaang ukit di’en itiang lo’u,” ingka kenang jaruma baki’ Musa lo’a i Yahuwe.

24“Na’an kenang,” ingka kenang i Yahuwe. “Tadorko bua mawa inait lo’a i Harun laloang manjarumi lo’da’. Na’an pande ira imamen nanna gulungannin dinen uluang ate kalena laloang inait lo’ku’ i Yahuwe. Ona’ manyuro’ tadua’ nanna arasiku’,” ingka kenang. 25Laloang tador barik baki’ Musa manjarumi lo’da’.

Currently Selected:

Palapasang 19: EBE

Highlight

Copy

Compare