Palapasang 18
18
Manjarumi baki’ Yitro lo’a baki’ Musa
1Jaji maminna dinen, tadongo bea jalu adariin dinen lo’a baki’ Yitro, tau imamen dinen di negeri Midian, matoana baki’ Musa. Datamu barik panggulungina i Yahuwe lo’a baki’ Musa nanna uranga dinen, urang Israelen. Datamu dongona i Yahuwe mawaan lo’da’ minsaluanen dari negeri Mesir. 2-4Andian bea lalako’ inang piang Sipora bainyena baki’ Musa dinen nanna anaka duaan, kole’a maminjo dasuro’ mole’ lo’a banuaan kole’a baki’ Musa. Jaji datarima’ barik kole’a baki’ Yitro. Anaka atoaan dinen asanna i Gersom. Kole’a ingka jaruma baki’ Musa, “Padari tau bokanak barik, lalako’ di banua tauen,” ingka kenang. Ialalo daasan i Gersom.#18:2-4 Gersom dinen mainso’ unyina nanna jarum Ibraniin yang ratina tau bokan. Yang imundiin dinen, i Elieser asanna. Kole’a ingka manjaruma amana, “Alatala yang dasembaan kole’a tumate amaku’, Ia yang manggulungiin lo’ku’ manyuro’ alapas lo’a tanganna raja Mesiren yang to’ mauno’en lo’ku’,” ingka kenang manjaruma. Ialalo daasan barik i Elieser.#18:2-4 elieser dinen ratina Alatala dinen panggulungiku’.
5Jaji lamba’ dinen baki’ Yitro mawa bainyena nanna aranaka dinen lo’a baki’ Musa inang di kasik baraa’en, manuju lo’a kosanda’ samalamen inang, di biringa ukita Alatala. 6Jaji paba’ang jarum tajolo, “Mondokak i Yitro matoanu. Mawa bainyenuak nanna araanaku duaan,” ingka kenang jaruma dapaba’angen lo’a.
7Jaji maminna dadalinga dongo dinen, lamba’ bea baki’ Musa pasidua’ang kalena nanna matoana. Mondok inang rabarik, tunduk baki’ Musa manyorong hormat lo’a matoana. Dasum barik matoana, laloang intama barik ilalam kakalang palamba’en. 8Rabarik baki’ Musa daia manutul kausa lo’a matoana, ambata jalu daanuun kole’a i Yahuwe lo’a raja Mesiren nanna ambata gulunganna itiang mangamuroang lo’a urang Israelen. Datutul kausana ambata parinsa’en yang dadua’angen di dalanen nanna panggulungina i Yahuwe lo’da’.
9Jaji barik, palin sasau nyawana baki’ Yitro manaantalinga dongo ambata kamaamanna i Yahuwe lo’a urang Israelen sampai dalapasanga ira dari kuasana urang Mesiren dinen. 10Jaji manjarum: “Ipudi i Yahuwe yang mamasutangen lo’u nanna urangu dari kuasana urang Mesiren nanna rajada’,” ingka kenang. 11“Awan di’en barik kutamu iak kuasana i Yahuwe. Daia labi bakuasa lo’a samuana ambata gulungan jalu isembaan bokanen. Inang lalo itamuna, kole’a awan dinen polana urang Mesiren yang bagap-gapen lo’a urang Israelen,” ingka kenang manjaruma baki’ Yitro. 12Laloang daawa barik pamindara atutungen kole’a baki’ Yitro lo’a Alatala nanna ambata gulungan pamindara bokanen. Mondok bea baki’ Harun nanna ambata gulungan toa-toana urang Israelen angkaan nanna baki’ Musa nanna matoana inang di arona Alatala.
13Maminna dinen, di aso seraan rabarik, aduduk baki’ Musa di ale’ kasaan itiang maurusi ambata soala urang Israelen dinen. Saso-aso tauen babangkulunga ijolona baki’ Musa mawa urusanna dinen, dari makapen sampai mondok pamalamen na’an sangari tauen mawa urusanna. 14Jaji dabele awan dinen kole’a matoana baki’ Musa, ambata karaja malayanina baki’ Musa lo’a uranga, laloang manjarum daia, “Ai daiko karajanu dinen malayaninu lo’a urangu dinen? Kole’ai kakalenu maurusiin lo’da’. Sampai saso-aso tauen babangkulungen kulilingu?” ingka kenang manjaruma lo’a inantuna.
15Jaji manjarum barik baki’ Musa lo’a matoana, “Jaji kenang. Ira dinen mondok lo’ku’ datiang manyari panamuna Alatala. 16Ati’en andian pakarada’, daawa lo’ku’ laloang iak barik manyeledikiin. Ambata gulungan parintana Alatala nanna ukuma kujarumang lo’da’,” ingka kenang.
17Jaji manjarum barik matoana, “Ai lo’a karajanu yang awan dinen? Din na’an maam. 18Ona’ alolo’ tolangu. Tau yang andianen urusanna alolo’ bea tolanga. Na’an ikule’ iko mawa karaja awan dinen kakalenu. Aborat to,” ingka kenang. 19“Jaji kenang. Suba taantalingaak. To’ manjarumiak lo’u. Alatalapi tentu mameang panamu lo’u. Kosan jalu sala’ ati’en iko yang itiang mawa jarumda’ lo’a Alatala, yang manjarumangen pakarada’. Maam dinen. Mandua’,” ingka kenang. 20“Iko lalo yang arungen palajari lo’da’ ambata parintaan nanna ukumanen mainto’ datamuna kole’da’ dalan mandua’en, karaja yang mandua’en di arona Alatala. 21Poangsi arung idile’i antarada’ tau yang dapaten ipakai, tau paduliin lo’a Alatala. Arung tau yang baloloken, tau alibaken mauntungi diri’a mamakai atoran na’anen balolok. Tau dinen barik yang iangkaten itiang mauluang lo’da’. Ipola tingkat urusanen. Arung andian yang mauluangen lo’a kalompok saribuun. Barik inyaunga dinen arung andian yang mauluangen lo’a kalompok saratusen, mamin dinen lo’a lima pulo’en, sampai mondok lo’a kalompok sapulo’en. 22Na, ira dinen barik yang maurusiin lapoang lo’da’. Rabarik ti’en andian pakara baraa, yang badidit to, baru’ko iawa sampur maurusi. Soal yang maundaan ira poang maurusiin. Baru’ aga’ arengan karajanu, sama-sama mambenen jalu aboratenkin. 23Ati’enko mainya’ malola’ani panamuku’, ati’en Alatala to’ manyuro’ kenang, baru’ bataanko ilalam karajanu dinen. Ambata gulungannupi dinen, mole’ lo’a kosanna tentu maam bea nyawana,” ingka kenang manjaruma baki’ Yitro lo’a baki’ Musa.
24Jaji mainya’ barik baki’ Musa mamakai panamuna matoana. Dalola’ani kausa jaruma dinen. 25Daile’i barik tau yang dapaten dapakai antarana ambata gulungan tau Israelen. Daangkat barik itiang mauluang lo’a uranga. Andian yang ibona saribuun, andian yang ibona saratusen, andian ibona lima pulo’en nanna sapulo’en. 26Ira dinen barik yang maurusiin lapoang lo’a tauen. Ambata pakara badiditen daawa lo’a baki’ Musa. Poangsi pakara yang maundaan, daurus poang kole’da’.
27Maminna dinen barik baki’ Musa dinen pamase’ lo’a matoana. Matoanapi laloang tarangkat. Mole’ lo’a banuana.
Currently Selected:
Palapasang 18: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
