Palapasang 17

Danum dasuro’ maruar dari batuun

1Maminna dinen tarangkat ira ambata anak kanturunanna baki’ Israel dinen dari kasik Sin. Lamba’ lola’ ira dinen, samalam lola’ bele parintana i Yahuwe sampai mondok rabarik lo’a Rapidim. Mondok di Rapidim barik laloang lalako’ ira inang. Dalam lalako’da’ inang dinen, kosan ira mandua’ang danum. 2Jaji sipadu barik ira nanna baki’ Musa. “Meangkam danum,” ingka. “Daikam to’ mainyumkam,” ingka kenang amumutda’.

Jaji manjarum barik baki’ Musa, “Mai daikin sipadunin nanku’? Ai kenang maam-maam mangilalainin lo’a i Yahuwe ti’ tapat andian i Yahuwe indi’angen nanka’?” ingka kenang jaruma lo’da’.

3Jaji amumut. Basongot-songot nyawada’ lo’a baki’ Musa. Alibak mandalinga lo’a jaruma kole’a akaring jaji nyawada’. “To’ iduno’kam pan nanna anakam nanna inatangam indi’angen di kasik baraa’en, isuro’ mate akaring nyawaan. Ai memen iawanam minsaluan dari negeri Mesir?” ingka kenang ajau’a nyawada’.

4Jaji mangalong barik baki’ Musa lo’a i Yahuwe, “Ai kupolaan barik di’en lo’a ira di’en?” ingka. “Kole’a sikadangpi ona’ to’ daparatak nanna batuun,” ingka kenang manjaruma baki’ Musa lo’a i Yahuwe.

5Jaji dasauti barik kole’a i Yahuwe, “Tajoloko poang lamba’en. Mawako gulungan toa-toaan sapa dua. Awa bea tungkatu yang itiang malao’ tulaanjo lo’a sunge Nil. Jaji lamba’ko barik,” ingka kenang. 6“Mondok ona’ inang di batu Horeb, andianak bua inang akadeng ijolonu. Jaji arung ibabal batu dinen nanna tungkatu. Ti’ mamin ibabal iko, laloang to’ minsaluan inang danumen, itiang painyumi lo’da’,” ingka kenang manjaruma i Yahuwe lo’a baki’ Musa. Jaji awan dinen lalo karajana baki’ Musa di arona gulungan toa-toaan.

7Jaji daasan barik kosan dinen Masa, daasan bea Meriba#17:7 Ratina masa ilalam jarum Ibraniin, pangilalaien. Ratina meriba dalam jarumda’, sipaduun. kole’a sipaduna inang de’i ambata gulungan anak kanturunanna baki’ Israel, na’an sikule’. Kole’a mangilalaina dinen ira inang lo’a i Yahuwe. “Tapat-tapatsi andian i Yahuwe indi’angen nanka’? Andian te’ kosan te’?” ingka kenang jarumda’ de’i mangilalaien lo’a.

Sikayo urang Amalek nanna urang Israelen

8Maminna dinen barik sikayo, mondok gulungan urang Amaleken malawan lo’a urang Israelen inang di Rapidim. 9Jaji manjarum barik baki’ Musa lo’a baki’ Yosua, “Se’ maile’iko bala itiang panyialoi lo’a urang Amaleken dinen yang mondoken, itiang malawan lo’da’. Mina’ daiak to’ inaitak lo’a tompok ukiten, to’ akadengak inang. Sarata tungkat yang datiang mamola panyunyua kole’a i Yahuwe dinen kujaput inang di tanganku’,” ingka kenang manjaruma lo’a baki’ Yosua.

10Jaji dalola’ani bua kole’a baki’ Yosua, awan bua jaruma baki’ Musa dinen. Sikayo bua nanna urang Amaleken. Ari baki’ Musa, baki’ Harun, baki’ Hur inait lo’a tompok ukit dinen. 11Jaji sikayoda’ dinen, launna dangkatanga tanganna baki’ Musa dinen, manalo ira urang Israelen. Poangsi nanga tadora dinen tanganna, manalo dinen urang Amaleken barik. 12Poangsi apalan tanganna baki’ Musa, aborat rasana. Jaji dala batuun barik kole’da’ datiang dudukanna. Baki’ Musa dapaduduk barik inang. Mamin dinen akadeng ira duaan baki’ Harun nanna baki’ Hur dinen dua bali, manunggu’ tanganna baki’ Musa inait mainto’ na’anna tador barik. Jaji manaat barik tanganna baki’ Musa sampai tasulupa matasoon. 13Awan dinen atalona barik dinen urang Amaleken kole’ mata pedanga baki’ Yosua.

14Jaji manjarum dinen barik i Yahuwe lo’a baki’ Musa, “Jaji jalu kujarumangen di’en tulis di buku’en mainto’ na’anna ililu’ ikin. Jarumang bea lo’a i Yosua mainto’ datamuna ira urang Amaleken tetap kutampusi dari inyaunga galung suanen. Na’an lagi’ to’ daparandam kole’a tauen,” ingka kenang manjaruma i Yahuwe.

15Jaji baki’ Musa dinen barik mamola kosan itiang panutungan pamindaraan. Daasan barik kosan panutungan pamindaraan dinen, I Yahuwe Akat Kayoka’. Ialalo Tambe tanda manaloka’. 16“Kole’a andian tanganka’ iangkatang inait lo’a i Yahuwe, i Yahuwepi barik to’ malawan lo’a urang Amaleken turun-manurun,” ingka kenang manjaruma baki’ Musa dinen.

Currently Selected:

Palapasang 17: EBE

Highlight

Copy

Compare