Palapasang 16
16
I Yahuwe malao’ jalu kaanen lo’da’
1Maminna dinen, tarangkat ira kausa dari Elim mondok lo’a daerah kasik baraa’en asanna Sin. Sin dinen antarana Elim nanna ukit Sinai. Mondoka lo’a dinen mamin aso kalima belasen, bulan kaduaan, maminna lamba’da’ minsaluanen dari negeri Mesir.
2Jaji mondok inang, amumut kausa ambata urang Israelen lo’a baki’ Musa nanna baki’ Harun. 3“Maam alit ti’kam mate iduno’ memen kole’a i Yahuwe inang di negeri Mesir. Nanga dinen jalu kaan andian. Madap kualikam yang andianen isi’ inatang, ambata gulungan patama. Angkaan rotikam sampai bosor,” ingka kenang manjaruma. “Iawakam kakaru’ lo’a kosan ateengen di’en, to’ manyuro’ manggatu’ kausanam indi’angen,” ingka kenang amumutda’ lo’a baki’ Musa nanna baki’ Harun.
4-5Jaji manjarum i Yahuwe lo’a baki’ Musa, “Ona’jo, to’ kulao’angkin roti awan lalo sauranen mondoka lo’in, alao’a dari suanen. Alao’ dinen suma anam aso launna. Aso katujuun na’an kulao’ang. Arung idunto’ barik ikin mairaso, mangapulungang sukup itiang kaparuluan kaan dalam saso. Kenang limang aso launna. Poangsi mondok di aso kaanamen barik, jalu idunto’en ikin ti’ mamin iriko, arung duang kali lipat bayu’a, mala sukup duang aso,” ingka kenang. “Kumeang parintaku’ barik lo’da’ itiang pangilalai lo’da’ ati’en mainya’ malola’ani paba’iku’,” ingka kenang paba’ina i Yahuwe yang darantangen nanna baki’ Musa.
6Jaji manjarum barik baki’ Musa nanna baki’ Harun lo’a ambata anak kanturunanna baki’ Israel, “Pamamalam ona’ ka’ bea itamuna ikin kole’a ialalo dinen i Yahuwe yang mawaan lo’in minsaluan dari negeri Mesir. 7Makap mina’ ka’ bea ikitana kamaamanna i Yahuwe yang paita ilalam jalu palin arawangen. Kole’a dadalinga bua amumutin dinen malawan lo’a. Ai daikin unding amumutin lapoang lo’am? Intainkam di’en kalo’in? Jalu suro’anna poangkam, suro’anna i Yahuwe,” ingka kenang. 8“Na, pamamalamen ona’ nanga angkaan patamanin. Makap mina’ nanga angkaan rotinin sampai bosor. Ati’ mamin ikita jalu adariin dinen, inang ona’ itamuna kole’a ialalo i Yahuwe yang manuun. Kole’a dadalinga bua jarumin amumuten lo’a. Daikin amumuta atenin, dinen lo’a i Yahuwe, okan lo’am,” ingka kenang manjaruma baki’ Musa lo’da’.
9Jaji manjarum barik baki’ Musa lo’a baki’ Harun, “Manjarum lo’da’ kausana ambata anak kanturunanna baki’ Israel mawa kombong. Arungkin kombong ijolona arona i Yahuwe, iko kenang, kole’a mamin dadalinga kole’a i Yahuwe ambata jarumin amumuten,” iko kenang lo’da’. Jaji dajarumang lo’da’.
10Jaji patanga’an manjaruma baki’ Harun lo’da’ mawa kombong, dakoengang kausa lindo’da’ maro lo’a kasiken, mamin paita inang kamaamanna Alatala yang palin arawangen, palita ilalam domen. 11Jaji manjarum barik i Yahuwe lo’a baki’ Musa, 12“Mamin kudalinga Iak amumuta ambata anak kanturunanna baki’ Israel dinen. Jaji manjarumko barik lo’da’, Na, pamamalamen ona’ nanga angkaan patamanin. Makapen mina’ nanga angkaan rotinin sampai bosor. Ka’ bea itamuna ikin kole’a Iak lalo Iak di’en i Yahuwe Alatalanin, iko kenang lo’da’,” ingka kenang manjaruma i Yahuwe lo’a baki’ Musa.
13Jaji pamamalamen barik mondok lalo gulungan ambata kawan kapetoon dinen nyangka’-nyangka’. Sampai bayu’a. Abubung mandona, apano’ bea tana’en kulilinga ambata gulungan kakalang palamba’da’ di kosanda’ samalamen, datando’i burung kapeto dinen. Kenang bea di makapen adarina, mondok dinen ambunen. Ambun dinen barik arabui ibona kasiken. 14Barik ada’a launna dinen ibona tana’en, ator, atanak bua jalu dinen. Asisik barik batora inang di tana’en tungan danum arabuku es yang alusen. 15Jaji dabele barik kole’a tau Israelen sisik jalu awan dinen, “Jalu ai dinen?” ingka kenang sera lo’a seraan sikatoananna. Kole’a na’an datamu ratina jalu dinen.
Jaji manjarum barik baki’ Musa, “Na, di’ lalo rotiin yang dameangen kole’a i Yahuwe lo’in padari jalu kaannin. 16Jaji parintana i Yahuwe lo’in kenang. Arung ikapulungang ikin sera-seranin bele kaparuluannin. Malakin dua liter-dua liter maira mantuariin ilalam kakalangin,” ingka kenang paba’ina i Yahuwe yang dajarumangen kole’a baki’ Musa.
17Jaji dalola’ani bua kole’a ambata anak kanturunanna baki’ Israelen, awan bua paba’ina i Yahuwe dinen. Sapa dua bayu’ dakapulungang, sapa dua kakapit. 18Jaji daukur barik kole’da’ jalu dakapulungangen, tau yang mangapulungang bayu’en dinen, na’an bea dinen padari kalabian lo’a. Tau yang mangapulungang kakapitenpi, na’an bea dinen padari kakurangan lo’a. Samuana mangapulungang bele kaparuluanna.
19Jaji manjarum barik baki’ Musa lo’da’, “Ambata jalu kaan dinen, ada’ itaro’a sampai makapen,” ingka kenang. 20Poangsi na’an bua dapaduli jarum dinen kole’da’ sapadua. Andian bea yang manaro’en itiang aso mina’. Jaji makapen barik boari, dalola’ ulas mamin. Arabau. Jaji arasi baki’ Musa lo’da’.
21Jaji mairaso-mairaso dakapulungang bua jalu dinen bele kaparuluanna maira mantuariin. Poangsi yang na’anen dakapulungang dinen, ti’ sisiak matasoon akaus areo. 22Jaji mondok aso yang kaanamen rabarik, yang dakapulungangen di aso dinen duang kali lipat kaparuluan saso. Ampat liter ampat liter kaparuluan mantuariin yang dakapulungangen. Jaji lamba’ ambata toa-toaan dinen malapor dinen lo’a baki’ Musa. 23Jaji dasauti kole’a baki’ Musa, “Na, dinen maam. Dinen lalo parintana I Yahuwe. Mina’ dinen aso Sabat, aso yang katujuun. Dalaanang lo’a aso yang bokanen itiang manyemba lo’a i Yahuwe. Jaji jalu ikapulungang ikin dinen, yang to’ itutung, tutung. Yang to’ iriko, riko. Yang na’anen ikaan ikin aso di’en, taro’ poang itiang aso mina’,” ingka kenang manjaruma baki’ Musa lo’da’.
24Jaji dataro’ kole’da’ awan bua jaruma baki’ Musa, maam. Na’an arabau. Na’an dalola’ ulas. 25Jaji manjarum barik baki’ Musa, “Na, dinen ikaan aso di’en. Kole’a aso di’en aso ilaanangen lo’a aso yang bokanen itiang manyemba lo’a i Yahuwe. Aso di’en na’ankin lagi’ mandua’ang jalu kaan dinen di tana’en,” ingka kenang. 26“Anam aso launna arung ikapulungang ikin mairaso. Poangsi aso katujuun, aso Sabaten dinen na’ankin mandua’ang,” ingka kenang manjaruma baki’ Musa lo’da’.
27Na, kapi awan dinen jaruma baki’ Musa, aso katujuun maruar bua tauen sapa dua to’ maunto’ jalu dinen. Poangsi na’an mandua’ang. 28Jaji manjarum barik i Yahuwe lo’a baki’ Musa, “To’ insa’pi launna malawannin, alibakin malola’ani parintaku’?” ingka kenang. 29“Jaji kenang. Iak i Yahuwe mamin kumeangkin adat tiang aso Sabaten, aso sangarianen. Ialalo ratina aso yang kanamen kumeangkin jalu kaan duang kali lipat, sukup duang asoon. Jaji lalako’kin barik samuanin. Ada’kin anyapen di aso yang katujuun,” ingka kenang paba’ina i Yahuwe yang darantangen nanna baki’ Musa. 30Jaji sangarian lalo tauen di aso yang katujuun.
31Jaji jalu daunto’en mairaso dinen daasan kole’da’ anak kanturunanna baki’ Israel, manna asanna.#16:31 Ratina manna dalam jarum Ibraniin, ratina jalu asi? Balu’ tolang jalu yang palin alus jalu dinen, ute’-ute’. Nyanyama dinen, nyanyam koe yang dapolaan nanna danum wanyiin. 32Jaji manjarum baki’ Musa, “Jaji andian parintana i Yahuwe dasuro’ jarumang lo’in. Arung iala manna dinen duang liter bayu’a. Arung itaro’ turun-manurun mainto’ dakitana kole’a anak kanturunanka’ jalu kaan yang dalao’en lo’ka’ di kasik baraa’en nanga daawaka’ minsaluan dari negeri Mesiren,” ingka kenang manjaruma baki’ Musa lo’da’.
33Jaji manjarum bapi lo’a baki’ Harun, “Na, malako bokoren. Arung idisi’i nanna mannaan. Bokoren dinen arung itaro’ iko inang di arona i Yahuwe mainto’ andian lapoang buktina turun-manurun lo’a roti alao’en di aset,” ingka kenang manjaruma lo’a baki’ Harun. 34Jaji dataro’ lalo kole’a baki’ Harun awan lalo parintana baki’ Musa dinen, mainto’ na’anna anyap. Dataro’ inang di arona kosan dinen yang itiang buktina andianna i Yahuwe marantang ukuma nanda’.
35Jaji dameang kiraso lo’da’ roti manna, dalao’ kole’a i Yahuwe di aset. Ampat pulo’ taun launna ira ambata anak kanturunanna baki’ Israel dinen angkaanna manna dinen. Dinen lapoang dakaanen sampai mondok lo’a negeri yang dalalako’i tauen, sampai mondok lo’a parabatasanen negeri Kana’an.
36Jaji ukuran duang liter yang dapakaien kole’da’, dinen yang daasanen gomer kole’da’. Sapulo’ gomer dinen padari sera epa. Kenang ukuran dapakaien kole’da’.
Currently Selected:
Palapasang 16: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
