Palapasang 15

Banyanyi baki’ Musa nanna piang Miriam mamudi lo’a i Yahuwe

1Jaji banyanyi barik baki’ Musa nanna ambata gulungan urang Israelen dinen mamudi lo’a i Yahuwe,

Na, banyanyiak mamudi lo’a i Yahuwe, kole’a mamin di’en daparaa asanna. Ambata kudaan nanna ambata tau mauwaten inang akaus datampeang barik lo’a jawaan. 2Ialalo dinen i Yahuwe yang pakarasangen lo’ku’, yang manyuro’ lo’ku’ di’en banyanyi. Ia yang matio’en lo’ku’. Ialalo di’en Alatalaku’. Mamudiak barik lo’a.

Ialalo Alatala yang dasembaan kole’a aramaku’. Kuparaa asanna.

3I Yahuwe lalo dinen bala yang palin bakarasen. I Yahuwe lalo asanna. 4Ambata karetana raja Mesiren, ambata balana, samuana datampeang lo’a jawaan. Akaus alamas ambata balana yang baraa’en pangkata, alao’ di danum jawaan. 5Takaput samuana nanna danum bajalamen. Awan lalo batu alao’en intamana lo’a danumen.

6O Yahuwe, palin bakuasa tangan katonu dinen. Akaus abobor gulungan lawannu kole’a kuasanu. 7Tau malawanen lo’u mamin atalo malaloi kuasanu yang palin baraa’en dinen. Arasinu yang iruarangen dinen mamin mangausang lo’da’ awan lalo api angkaanen lo’a batang aseen. 8Marusu poangko nanna batak nyawanu, mamin babangkulung danum jawaan. Atuku’ kausa, akadeng tungan jalu darugu’angen. Balu’ jalu atanak barik danumen akadengen di tanga’ jawaan.

9Bagap dinen musuka’, “Ona, ira dinen ona’ kulola’,” ingka. “Maminna barik kurambit kurampas,” ingka kenang. “Suka ate mangajariku’ lo’da’. Basiku’ kudunus, kuayo’ang itiang mauno’ lo’da’,” ingka kenang jarumda’ bagapen. 10Poangsi daiko barik irusu poang iko nanna sariuten, laloang takaput barik ira. Alamas barik ira di danum baraa’en, awan lalo batu tingkalama yang itampeangen lo’a danumen.

11Intain lagi’ sabangonen nannu antarana ambata gulungan jalu isembaan? Intain bokanen yang ampuna kabareseanen yang palin patut ipudiin, yang palin ikatakutangen, yang palin datamuun mamola panyunyuanna? 12Itanggeang poang tangannu, mamin ira datalan kole’a duniaan.

13Daikam di’en tau maminen itebus iko iduluang iko malaloi kamaamanna atenu. Iawakam barik iko malaloi kuasanu, iawakam lo’a kosan lalako’u. 14Mandalinga kausa ambata negeri bokanen. Gup-gup nyawada’ ambata tau suku Pilistin mandalingaan dongonu. 15Sakayu-kayu poang ambata toa-toa Moap kikirika. Samuana ambata panduduk Kana’anpi kosan lagi’ kakuatanna di atena. 16Atakut kausa rabarik. Palin balasa atakuta. Pamate kalena kausana. Tungan batu pamatena kalena lasana atakuta lo’a kuasanu sampai akaus mamin talalo manarearam ambata anak katio’annu yang maminen itabus iko.

17Daikam tentu iduluang iko lo’a ukit to’ imeangen iko lo’am. Tentu tatanamkam ona’ inangen di kosan yang to’ ipola iko itiang kosan lalako’u. Inang lalo saonu i Yahuwe yang to’ ipolaan malaloi kuasanu. 18Sorotapisi na’annu mangkam O Yahuwe sampai salaun-launna, ingka kenang nyanyianda’. 19Kole’a lamba’ kausana ambata gulungan kudana raja Mesiren nanna karetana ambata tau mauwaten ibona kudaan, lamba’ di tanga’ jawaan. Laloang i Yahuwe barik manyuro’ mole’ asal dinen danum jawaan mangaputiin lo’da’. Poangsi ira ambata gulungan anak kanturunanna baki’ Israel dinen lamba’ poang di tanga’ jawaan di tana’ akaringen.

20Mamin dinen barik piang Miriam dinen, arina baki’ Harun, daia dinen panjaruma Alatala. Jaji dajaput dinen rebana. Malola’ kausana ambata gulungan babainyeen mandaria’ sarata manaba’ rebana. 21Jaji banyanyi barik piang Miriam lo’da’, “Banyanyiki’ mamudi lo’a i Yahuwe kole’a mamin daparaa barik asanna. Ambata kudaan nanna tau mauwaten ibona mamin akaus datampeang lo’a jawaan,” ingka kenang banyanyina.

Amumut urang Israelen di danum Mara

22Maminna dinen barik baki’ Musa daia mauluang lo’da’, marantang jawa dadara’en laloang lamba’ lo’a kasik baraa’en bagian Sur. Talung aso ilalam palamba’anda’ di kasik baraa’en, kosan ira mandua’ang danum. 23Jaji mondok rabarik lo’a loang palanan danum, danum mara asanna. Poangsi mondok inang, na’aan dapat ira mainyum danum dinen kole’a danum dinen apait nyanyama. Ialalo ratina kosan dinen daasan Mara, kole’a apaita. 24Jaji amumut barik gulungan urang Israelen lo’a baki’ Musa, “Ai yang idinyumen ikam barik?” ingka kenang amumutda’.

25Jaji mandalinga jarum dinen, baki’ Musapi barik mangalong lo’a i Yahuwe. I Yahuwepi barik mamayoang lo’a satatak kayuun. Barik kayu dinen datampeang lo’a danumen. Danum dinenpi barik padari mamis.

Inang di danum dinen lalo i Yahuwe dinen mamola paratoranna rabarik, mamola adat. Inang bea dinen i Yahuwe mangilalaina lo’da’. 26“Ti’kin mainya’ manaantalinga lo’ku’ i Yahuwe Alatalanin,” ingka, “ti’kin mainya’ mamakai basa yang tapaten, ti’kin mananami nyawaan ambata gulungan parintaku’ nanna ukumku’, daikin kugulungikin. Na’an kulao’ lo’in ambata tulaan awan yang kulao’iin lo’a urang Mesiren. Kole’a Iak lalo Iak di’en i Yahuwe yang pamaamen lo’a ambata gulungan sakinin,” ingka kenang bayana i Yahuwe lo’da’.

27Maminna dinen barik, mondok ira lo’a Elim. Di Elim inang andian mata danumen dua belas ambata. Andian bea batang kurma tuju pulo’ bayu’a. Jaji samalam barik ira inang di biringa danumen.

Currently Selected:

Palapasang 15: EBE

Highlight

Copy

Compare