Palapasang 14
14
1Jaji manjarum bapi i Yahuwe lo’a baki’ Musa, 2“Manjarumko lo’a urang Israelen dinen suro’ mole’ balik laloang samalam mainso’ lo’a banua Pi-Hahirot yang antara dinen banua Migdol nanna jawa dadara’en. Arung ira samalam inang di biring jawaan tumbalianen nanna banua Baal-Sepon. 3Kenangku’ mainto’ ona’ dakitana kole’a rajaan, O alingo pan ira urang Israelen. Lamba’ tajawa-jawa poang inang di kasik baraa’en. Tagurung ira inang di kasik baraa’en, ingka kenang ona’ nyawana. 4Laloang daiak barik kupakarasang atena rajaan manyuro’ malola’ lo’in. Laloang iak barik daparaa’en asanku’ kole’a kuasa manaloku’ lo’a raja Mesiren nanna ambata gulungan balana. Kupola kenang mainto’ samuana urang Mesiren manamu kausa kole’a Iak lalo Iak di’en i Yahuwe,” ingka kenang manjaruma i Yahuwe lo’a baki’ Musa. Jaji dalola’ani bua awan jaruma.
5Jaji dajarumang barik lo’a raja Mesiren maminna akaus arari ira ambata tau Israelen. Jaji maminna dadalinga dongo dinen, laloang tapalin atena rajaan nanna ambata gulungan anak buana. “Ai kakaru’ iparuaranga lamba’ iki’. Kosan barik nanka’ bakaraja,” ingka kenang sijarumanda’. 6Jaji dasuro’ kamasang karetana rabarik. Laloang mangampulungang balaan. 7Anam ratus karetaan yang palin maamen yang daawaan. Daawa bea ambata gulungan kareta bokanen nanna ambata panguluan tau pangayoon. 8Dapakarasang lalo atena raja Mesiren kole’a i Yahuwe manyuro’ malola’ lo’a ambata anak kanturunanna baki’ Israel. Patanga’an lamba’da’ urang Israelen nanna baranina, 9damansangi lalo kole’a rajaan. Dalola’ nanna ambata kudaan nanna ambata karetaan, nanna ambata gulungan tau mauwaten ibona kudaan, ambata gulungan balana. Darambit barik inang di kosan samalama inang di biringa jawaan, mainso’ lo’a banua Pi-Hahirot yang tumbalianen nanna Baal-Sepon.
10Jaji lamba’ gulunganna rajaan, ira urang Israelen dabeleang matana lo’a balakang, dabele mainso’ mamin ambata bala rajaan to’ manu lo’da’. Jaji okan gampang atakuta ira urang Israelen. Jaji mamuko ira dinen kalongang kalena lo’a i Yahuwe. 11Jaji manjarum lo’a baki’ Musa, “Aikam iawaan iko lo’a di’en? Angkosan tana’ pande itiang kuburam inang di tana’ Mesir sampai daikam iawa kakaru’ iko mate di kasik baraa’en? Ai kenang maam-maam karajanu lo’am mawa minsaluan lo’am dari negeri Mesir,” ingka kenang. 12“Kenanga memen jarumam lo’u, Korong kalenam bakarajaan nanda’, ikam kenang. Maam alit bakaraja inang dari pada mate parasuma indi’angen di kasik baraa’en,” ingka kenang jarumda’ lo’a baki’ Musa.
13Jaji manjarum barik baki’ Musa, “Ada’kin atakuten. Lalako’kin poang. Ka’ bea ikitana ikin kuasana i Yahuwe yang matio’en lo’in dari jalu bahayaan. Ambata gulungan urang Mesiren yang ikitaan ikin di aso di’en, na’an lagi’ to’ ikita ona’ sampai salaun-launna. 14I Yahuwe diri’a yang sikayoon nanda’. Daikin lalako’ poangkin,” ingka kenang manyautina baki’ Musa.
15Jaji manjarum bapi i Yahuwe lo’a baki’ Musa, “Ai pasiak-siaku mangalongen lo’ku’? Mamarinta ko poang lo’da’ ambata anak kanturunanna baki’ Israel, suro’ maju. 16Angkat dinen tungkatu, tanggeang ibona jawaan manyuro’ abala’ danum jawaan. Daikin anak kanturunanna baki’ Israelen lamba’in barik, lamba’ di tanga’ jawaan, lamba’ di tana’ akaringen,” ingka kenang manjaruma i Yahuwe. 17“Ka’ bea kupakarasanga ona’ ateda’ urang Mesiren manyuro’ bakaras to’ malola’ lo’in. Inang ona’ daparaana asanku’ barik kole’a kuasaku’ manaloon lo’a raja Mesiren nanna ambata gulungan balana, lo’a ambata karetana nanna tau mauwat kudaan. 18Ka’ bea datamuna kole’a urang Mesiren kole’a Iak laloon Iak di’en i Yahuwe, ti’ mamin atalo ona’ kole’ku’ raja Mesir nanna balana, nanna ambata karetana nanna ambata tentarana pakai kudaan,” ingka kenang manjaruma i Yahuwe lo’a baki’ Musa.
19Jaji barik malaikata Alatala yang mauluangen lamba’a ambata bala Israelen, daia mamalin ibalakanga tau Israelen. Mamalin bea jalu balu’ pakayu domen, mole’ ibalakangda’ 20itiang maintarai lo’da’ bala Israelen nanna bala Mesiren. Jaji samalam-malam dinen ira bala Mesiren darauni kole’a pakayu domen, poangsi ira bala Israelen darawangi kole’a pakayu domen dinen. Jaji malam dinen na’an sikainso’an ira.
21Jaji daangkatang tungkata baki’ Musa ibona jawaan, i Yahuwepi barik manyuro’ mondok sariut balasaan dari timuren. Samalam-malam-malam tapuputa sariuten manyuro’ tabae’ danum jawaan. Jaji akaring barik tana’en di tanga’ jawaan kole’a sariuten, abala’ bea danuma. 22Lamba’ barik anak kanturunanna baki’ Israel di tana’ akaringen di tanga’ jawaan. Di kayoko’da’ danum jawaan dinen balu’ siring akadengen. Kenang bea di katona, akadeng danumen balu’ siringen. 23Gulungan urang Mesirenpi dinen, dabele awan dinen, laloang malola’ bea ira. Maju ira inang nanna ambata gulungan karetana rajaan, nanna ambata tau mauwat kudaan, lamba’ di tanga’ jawaan.
24Jaji malam-malam barik, i Yahuwe dinen mamele indor dari pakayu dom yang adale’en balu api dinen, mamele lo’a bala Mesiren dinen. Jaji dakaru barik. Raranga’ urang Mesiren 25kole’a merang lamba’a ambata roda karetaan. Ajau’ lamba’a. Badidit tapat ira mawaan lo’a karetaan. Jaji manjarum, “Arariki’ alit, rariang kaleka’! I Yahuwe di’en mangamuroang lo’da’ malawan lo’a Mesir,” ingka kenang jarumda’. Palin atakut rabarik.
26Jaji manjarum i Yahuwe lo’a baki’ Musa, “Na, tanggeang bapi tangannu ibona jawaan,” ingka kenang. “Manyuro’, mole’ din danumen lo’a kosanna itiang mangaputi lo’a urang Mesiren. Lo’a ambata karetana, lo’a ambata gulungan tau mauwaten ibona kudaan,” ingka kenang. 27Jaji baki’ Musa dinen datanggeang tanganna ibona jawaan awan bua jaruma i Yahuwe. Jaji di imbara asoon, patanga’an ararina urang Mesiren dinen, mole’ barik danumen lo’a kosanna, mole’ asal. Urang Mesiren dagoleng poang lo’a tanga’ jawaan kole’a i Yahuwe. 28Mole’ danumen dinen mangaputiin lo’a ambata gulungan karetaan, lo’a tau mauwaten ibona kudaan, lo’a samuana ambata gulungan balana raja Mesiren yang maririaan lo’da’ inang di tanga’ jawaan. Kosan serapi yang tio’en. Akaus alamas.
29Ira urang Israelen, kosan mai. Lamba’ poang inang di tanga’ jawaan, lamba’ di tanga’ akaringen. Akadeng danum jawaan dinen dua baliin, balu’ siring akadenga kayoko’ kato. 30Aso dinen bua i Yahuwe matio’ lo’da’ dari tanganna urang Mesiren. Paragoleng poang ambata bangkayoanna urang Mesiren inang di biring jawaan dakita kole’da’ anak kanturunanna baki’ Israel. 31Jaji dabele barik awan dinen kole’a urang Israelen, raana kuasana i Yahuwe malawanna lo’a urang Mesiren, atakut barik ira lo’a i Yahuwe. Parasaya’ kausa barik lo’a i Yahuwe nanna suro’anna dinen yang baki’ Musaan.
Currently Selected:
Palapasang 14: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
