Palapasang 13

Anak yang mulakata iparanakangen dalaanang itiang lo’a i Yahuwe

1Jaji manjarum bapi i Yahuwe lo’a baki’ Musa, 2“Samuana ambata anak danginanen arung ilaanang kausa padari iak ampunaan. Kapi anaka mantuariin, kapi anak inatangen, yang anak danginanen samuana iak ampunaan,” ingka kenang manjaruma i Yahuwe.

3Jaji manjarum memen baki’ Musa lo’da’ tau bayu’en, “Aso di’en arung iramiang ikin aso minsaluannin dari negeri Mesir, minsaluannin dari karaja pangkamen. Kole’a nanna kuasa palin baraa’en i Yahuwe mawaan lo’in minsaluan dari negeri di’en. Na, launna iramianga Aso Palaloien di’en na’ankin pande angkaan jalu araragiin,” ingka kenang.

4“Aso di’en lalo, di bulan Abiben daikin tarangkatin minsaluan dari negeri Mesir. 5Jaji to’ dapadari barik bayana i Yahuwe yang darantangen nanna arabakininjo, yang dajarumangen atas asan diri’a. To’ daawakin barik lo’a negeri dalalako’iin dinen kole’a tau suku Kana’an, suku Het, suku Amori, suku Hewi, nanna suku Yebus, negeri yang palin baraselen. Negerida’ to’ dameang barik lo’in padari ikin ampunaan. Jaji ati’enkin mamin mondok lo’a dinen, arung ipakai adat palaloien di’en, arung iramiang di bulan di’en. 6Tuju aso launna arungkin angkaan roti na’anen araragi. Barik mondok di aso yang katujuun dinen, arungkin angkaan rami-rami itiang manyemba lo’a i Yahuwe. 7Launna tuju asoon dinen na’ankin pande angkaan jalu araragiin. Roti na’anen araragi poang yang pandeen ikaan. Sasara negerinin dinen na’an pande andian ragi atau jalu araragi. Kakapitpi na’aan.

8“Jaji Aso Palaloien dinen yang iramiang ikin arung ijarumang lo’a araanakin mainto’ datamuna ratina. Ramina aso di’en kutiang parandamang kamaamanna i Yahuwe lo’ku’ nanga minsaluanku’ dari negeri Mesir, ikin kenang lo’a araanakin. 9Jaji rami dinen ona’ padari lo’in awan lalo tanda di tanganin atau di torongin manyuro’ parandam lapoang lo’a ukuma i Yahuwe. Arung mainso’ lapoang di baba’in manjarumang, kole’a mamin i Yahuwe mawa lo’in minsaluan dari negeri Mesir nanna kuasana yang palin baraa’en. 10Maira taun mondok di bulanna arung ipakai lapoang adat maramiang Aso Palaloien di’en.

11“Jaji to’ daantatkin rabarik lo’a negeri dabayaangen dinen lo’in, yang dajarumangenjo lo’a arabakinin kole’a Alatala atas asan diri’a. To’ dameang lo’in lalo rabarik di’en. Jaji mondokin inang rabarik, 12samuana anak danginanen arung ilaanang itiang lo’a i Yahuwe padari ia ampunaan. Maam anaka inatangen, maam anaka mantuariin, yang anak danginanen, ti’ babakaan mamin ia ampunaan. 13Poangsi anak danginanna kaledaien arung itabus. Isurangi nanna anak dombaan. Ti’ na’an dapat itabus, arung ipoto’ang tolang kalonga. Ambata anakin babakaan yang danginanen arung itabus bea.

14“Ona’ dinen ti’en andian araanakin yang mangatoanang adat malaanangen anak danginanen ti’ ai ratina, arung ijarumang ikin. Kenangka’, kole’a ijolo nanga mala pangkama urang Mesiren lo’ka’, i Yahuwe dinen mamin mawa lo’ka’ minsaluan dari negeri Mesir nanna kuasana yang palin baraa’en. Ialalo ratina ipolaan awandi’en, ingka kenang. 15Ijoloonjo dinen nanga bakarasa atena raja Mesiren, alibak paruarang lo’am lamba’, i Yahuwe barik malao’ ukumanen lo’da’. Ambata anak danginanen di Mesir dinen akaus dauno’ kole’a i Yahuwe. Maam anaka mantuariin, maam anaka inatangen akaus dauno’ yang anak danginanen. Ialalo ratina kupamindaraangen lo’a i Yahuwe ambata anak danginanna inatangen. Poangsi anak danginanku’, kutabus, ikin kenang majarin lo’a araanakin. 16Laloang atoran dinen to’ padari awan lalo tanda di tangannin atau torongin itiang parandamang lapoang lo’in kuasana i Yahuwe, kole’a daia mamin mawaa lo’ka’ minsaluan dari negeri Mesir nanna kuasana yang palin baraa’en.”

Daawa ira manarear jawa Dadara’en

17-18Jaji maminna dinen ira daparuarang lamba’ kole’a raja Mesiren. Dauluang lamba’ kole’a Alatala. Poangsi na’an daawa malola’ dalan yang di negeri Pilistin. Kapisi dalan dinen mainso’en, poangsi na’an dalola’. Daawa ira malola’ dalan kulilingen, dalan di kasik baraa’en maro lo’a jawa Dadara’en. Kole’a andian dinen jaruma dinen Alatala, “To mala mainso’en, ungka’en daawa sikayo inang, ungka’en tapalin ateda’ laloang to’ mole’ balik lo’a Mesir,” ingka kenang pikiranna Alatala mawaan lo’da’. Jaji tarangkat barik ira tau Israelen lamba’, lamba’ awan tau tangkaten to’ sikayo. Maro lo’a jawa Dadara’en ira dinen lamba’a rabarik.

19Jaji baki’ Musa dinen mawa lo’da’. Daawa bea tolanga baki’ Yusup dinen kole’a awan dinen lalo paba’ina baki’ Yusup lo’da’ di matena, dasuro’ awa tolanga. Sampai ira saparanaka kanturunanna baki’ Israelen dinen dasuro’ basumpa arung daira mawa tolanga. “Tentu Alatala manggulungi lo’in mawa lo’in mole’ lo’a tana’ yang dabayaangen dinen. Jaji ti’enkin tangkat ona’, tolangku’ arung iawa ikin lo’a dinen,” ingka kenang paba’ina baki’ Yusupjo dinen.

20Jaji tarangkat barik ira dari Sukot laloang samalam di banua Etam di biringa kasik baraa’en dinen. 21Jaji ilalam palamba’anda’ dinen i Yahuwe mauluang lo’da’. Ati’en imbara asoon, daia mauluang lo’da’ ilalam domen yang balu’ pakayuun ijoloda’, mainto’ datamuna dalana. Ati’en malamen pakayuun dinen balu’ api yang manyalangen ijoloda’ manyuro’ arawang dalanna. Pande barik lamba’ asoon, pande bea lamba’ malamen. 22Asoon malamen, na’an lagi’ anyap jalu dinen. Andian lapoang inang ijoloda’.

Currently Selected:

Palapasang 13: EBE

Highlight

Copy

Compare