Palapasang 12
12
Anak dombaan datiang surang kale
1Jaji manjarum i Yahuwe lo’a baki’ Musa nanna baki’ Harun inang di negeri Mesir, 2“Jaji bulan di’en padari bulan mulakataan lo’in di tanggalin. Bulan di’en lalo mulai taun barunin,” ingka kenang. 3“Jaji manjarumko lo’da’ samuana ambata tau Israelen. Bulan di’en tanggal sapulo’ ona’, daikin maira kayan arung maningkam anak domba tata sera, 4bele insa’ ambatin kira loang kayan. Jaji anak dombaan dinen kira na’an ikule’ ikausang saloang kayan, pande bea dinen kapulungan ambata kayan yang sibiringanen nannin lo’a anak dombaan seraan. Itawa’ poang barik isina bele kira-kira tulina maira mantuariin.
5“Jaji inatang yang idile’in dinen arung anaka yang umura sataunen. Arung inatang yang palin maamen, yang kosanen jaji arabora, kosan sakina. Anak dombaan pande, anak kambingpi pande. 6Jaji maminna barik idile’i, arung igurung barik ampat aso launna. Mondok tanggal kaampat belasen bulan dinen, pamamalam barik arung isambeli. Jaji anak domba dinen iduno’, arung sasaratakin. Sama manyambeli inatang diri’in maira kayan pamalamen dinen.
7“Na, maminna isambeli, dara’ dinen arung ilulukang ikin di kadengan mambanganen dua bali, lo’a dinen palentanganna yang iboen ilulukanga ikin, inang di sao kosan angkaannin dinen. 8Isina inatang dinen arung ingangar barik ikin, ipanggang. Malam dinen bua ikaanna ikin, ikaan nanna saringkaan apaiten nanna roti yang na’anen imeang ragiin. 9Ada’ ikaan mata’a isi’ inatangen dinen atau irubus. Arung ingangar, nanna uluna, nanna kakina, nanna suang batanga. 10Arung akaus ikaan malam dinen. Na’an pande andian arantang sampai makapen. Ti' de'i andian arantang isina sampai makapen, na’an dapat akaus ikaan, arung itutung di apiin sampai akaus jalu dinen, mainto’ kosanna lagi’ sisana.
11“Jaji angkaannin dinen, arungkin bakamas to’ lamba’, nanna ambata kainin, nanna sapatunin, nanna tungkatin bea di tangannin. Arung ipakaruru ikin kaanna dinen. Awan dinen lalo ramina Aso Palaloien yang iramiangen itiang paraa lo’a asanku’ i Yahuwe. 12Kole’a ialalo di malam dinen daiak to’ malamba’i maira sao, maira mambanganen di negeri Mesiren. To’ maile’i anak tau yang atoaanak, anak yang mulakata iparanakangen. Maam anaka inatangen, kenang bea anaka mantuariin, to’ kuduno’ kausana anak yang atoaan. Malam dinen bua ambata gulungan jalu dasembaan kole’a tau Mesiren kulao’i nanna ukumanku’. Kole’a iak lalo di’en i Yahuwe.
13“Jaji dara’ ilulukangen ikin di mambanganen, dinen kutiang tandanin lo’ku’. Ti’ mamin kukita dara’ dinen di mambangannin, daikin barik kulaloi. Na’ankin dadua’ tula kulao’en lo’a negeri Mesiren di’en.
Dasuro’ mamola rami angkaan roti na’anen araragi
14“Jaji aso di’en arung iramiang ikin turun-tamurun. Padari adatin rabarik yang ipakaien lapoang itiang paraa lo’a asanku’ i Yahuwe, adat ipakaien sampai mondok lo’a anak ituntung lo’a anak ipuit. 15Jaji tuju aso launna, ambata roti ikaanen ikin dinen, na’an pande ikaan roti araragiin. Di aso mulakataan arung idunjang jaji ambata ragiin dari saonin. Intain angkanen jalu aragiin launna tuju asoon dinen arung dalaanang lo’a anak kanturunanna baki’ Israel. Na’an pande lagi’ ianggap anak kanturunanna.
16“Jaji aso mulakataan dinen nanna aso yang katujuun dalam minggu mamola ramiin dinen na’an pande ianggap sama nanna aso bokanen. Arung ilaanang itiang bakumpul manyemba lo’ku’. Na’ankin pande bakaraja. Suma poang yang pandeen ikaraja di aso dinen, ambata gulungan jalu kaanen. Kosan jalu bokan yang pandeen ikarajaan di aso duaan dinen.
17“Jaji arung iramiang lapoang aso Angkaanen Roti yang Na’anen Araragiin. Kole’a di aso dinen kupainsaluaniin bayu’en saranak-ranakan dari negeri Mesiren. Ialalo aso di’en arung iramiang turun-manurun sampai mondok lo’a anak ipuit, lo’a anak ituntung. 18Jaji mondok bulan satu, tanggal ampat belasen pamamalamen, inang barik mulainin angkaan roti yang na’anen araragiin. Dari pamalam aso dinen sampai mondok lo’a aso kadua pulo’ satuun pamalamen, na’ankin pande angkaan jalu araragiin. 19Tuju aso launna na’an pande idua’ang ragi ilalam saonin. Kole’a intain angkaanen jalu araragiin, tau dinen arung ilaanang lo’a ambata anak kanturunanna baki’ Israelen. Kapi tau okanen banuaka’, kapi asli banuaka’, na’an pande ianggap lagi’ anak kanturunanna. 20Ada’kin angkaanen jalu araragiin launna dinen. Disa poang kosan lalako’in na’ankin pande angkaan ragiin. Roti ikaanen launna dinen arung kosan ragina.” Awan dinen lalo jaruma i Yahuwe yang dapamondokangen kole’a baki’ Musa lo’a tau Israelen.
21Maminna dinen barik dasuro’ kombong ambata toa-toa Israelen kole’a baki’ Musa. Maminna kombong laloang manjarum lo’da’, “Na di’en, ala ikin maira kayan anak domba. Arung isambeli barik itiang maramiang Aso Palaloien,” ingka kenang lo’da’. 22“Jaji maminna isambeli, kapulungang ikin dara’a ilalam basikomen. Maminna dinen barik, ala ikin daun hisopen dinen. Daun hisopen barik arung isalapang ilalam dara’ dombaan dinen laloang ilulukang di kadenganna mambanganen dua bali nanna lentanganna yang iboen. Ti’ mamin ilulukang lo’a mambanganen, na’an pandekin minsaluan lagi’. Serapi na’an pande minsaluan sampai mondok imbara asoon. 23Kole’a malam dinen i Yahuwe to’ malamba’i maira mambangan sasara negeri Mesir itiang mauno’ lo’a tau Mesiren. Jaji ti’ mamin mondok lo’a mambangannin, ti’ laloang dakita andian dara’ ilulukang inang, na’ankin daintamai. Na’an daparuarang intama inang malaikat malao’iin ukum mateen dinen itiang mauno’ lo’in.
24“Jaji rami di’en arung padari adatin rabarik yang ipakaien ikin turun-manurun sampai mondok lo’a anak ituntung. 25Maminna mondok ona’ lalako’ di tana’ dabayaangen kole’a i Yahuwe, yang to’ dameang dinen lo’in, arung ilola’ani lapoang adat ramiin di’en. 26Jaji nanga iramianga ikin ati’en andian anakin mangatoanang lo’in, Tiang ai ramika’ di’en? ti’en ingka, 27arungkin manjarumang ratina. Rami di’en daiki’ mamola pamindaraka’ lo’a i Yahuwe itiang parandam lo’a aso Palaloiinjo dinen, nanga dalao’ ukumanen lo’a tau Mesirenjo dinen. Kole’a dalaloi saoka’ anak kanturunanna baki’ Israel. Na’anki’ daintamai, ikin kenang manjarumen lo’a araanakin,” ingka kenang jaruma baki’ Musa manjarumang paba’ina i Yahuwe lo’a gulungan urang Israelen.
Jaji maminna akaus manjaruma awan dinen laloang tunduk samuana ambata tau Israelen dinen manyemba lo’a i Yahuwe. 28Mamin dinen laloang dalola’ani awan bua jaruma i Yahuwe yang dapamondokangen malaloi baki’ Musa nanna baki’ Harun.
29Jaji malam dinen tanga’ malamen, mondok lalo i Yahuwe malamba’i tau Mesiren. Mate kausa gulungan anak danginanda’, dari anaka raja yang mangkamen dinen, mondok lo’a tau tagurungen ilalam sao ukumanen, mondok lo’a ambata gulungan inatangen. Mate kausa anak danginanda’. 30Jaji asading barik malam dinen rajaan nanna ambata gulungan anak buana, nanna ambata gulungan suang negerina, anangis kausana. Bakaya jaji unyi anangisen sasara negeri Mesir dinen, kole’a andian maira sao anak yang mateen. Kosan sera sao yang kosanen.
Urang Israelen dasuro’ minsaluan dari negeri Mesir
31Jaji asading rajaan dinen laloang malam dinen bua daparintana dinen baki’ Musa, “Mamalinkin dari antarana urangam, se’. Maruarkin nanna ambata anak kanturunanna i Israel dari negeri Mesir. Manyembakin barik lo’a i Yahuwe awan bua jarumin mamitaan lo’ku’. 32Awa kambing, domba, sapinin. Awa kausa bua awan jarumin. Kenang daiak di’en do’aangak bea pamondokang berkat lo’ku’,” ingka kenang jarum parintana.
33Ambata gulungan tau Mesirenpi dinen tamba bea manjuluang lo’da’ manyuro’ babariar lamba’ marantang negerida’. “Ti’kin na’an babariar,” ingka, “ungka’enkam akaus mate,” ingka kenang jarumda’. 34Jaji barik tarangkat ira karuru-karuru. Ambata roti yang maminen dagudak dinen laloang daawa. Na’an lagi’ sempat dameang dinen ragiin. Dabalokon poang nanna kainen ilalam panoanna dinen laloang dasan. 35Dalola’ani bua de’i awan bua jaruma baki’ Musa, dapita ambata gulungan amas, piraken, ambata kain yang maamen lo’ urang Mesiren. 36Ira dinenpi mainya’ bua manawa’i kole’a mamin andian Alatala paloe’i ateda’. Awan dinen darampasa barik ambata urang Mesiren kole’a urang Israelen dinen.
37Jaji lamba’ barik ira ambata anak kanturunanna baki’ Israel dinen, tarangkat di Ramses lamba’ lo’a Sukot. Bayu’a ira ambata tau lamba’en dinen andian anam ratus ribu mantuariin yang babakaan poang. Nampi iditung babainyeen nanna nangkanaken. 38Bayu’ bea tau bokanen yang tambaan nanda’, tau okanen kanturunanna baki’ Israel dinen. Inatanga bayu’ bea, ambata kambing, dombaan nanna sapiin. 39Jaji roti yang daawaan dinen laloang dabakar kole’da’ mamola roti na’anen araragi. Nampi daragi waktu nampina tangkata dinen kole’a daruru de’i dari Mesir. Karuru-karuru ira dinen mamusa. Na’an sempat dinen mangamasang bokal itiang palamba’anda’ dinen.
40Jaji lalako’a ira ambata anak kanturunanna baki’ Israel dinen di negeri Mesir, ampat ratus tiga pulo’ taun. 41Pas ampat ratus tiga pulo’ taun lalako’da’ inang, minsaluan barik anak katio’anna i Yahuwe bayu’en maruar dari negeri Mesir. 42Ialalo ratina urang Israelen ati’en maramiang parandam malam dinen, arung bajaga samalam-malam. Kole’a i Yahuwepi daia manjagai bea lo’da’ samalam-malam dinen itiang mawa minsaluanen lo’da’ dari negeri Mesir.
Adat rami Palaloien
43Jaji manjarum bapi i Yahuwe lo’a baki’ Musa nanna baki’ Harun, “Jaji adat rami Palaloien di’en, kosan tau okanen kanturunanna baki’ Israel yang pande tamba angkaan itiang maramiang aso dinen. 44Poangsi ti’ andian pangkam ibaliin ikin, ti’ mamin isunat, pande daia tamba angkaan itiang maramiang aso dinen. 45Ti’ tau mondoken atau tau bakuliin nannin, yang igajiin ikin, daia na’an pande tamba angkaan.
46“Na, angkaannin dinen, na’an pande iawa insaluan jalu kaan dinen. Arung ikaan ilalam saoen. Na’an pande apolo tolang dombaan. 47Samuanin anak kanturunanna baki’ Israel arung tamba kausa maramiang aso di’en.
48“Ti’ andian tau okanen urangin yang lalako’en antaranin yang bainginen to’ tamba angkaan maramiang aso di’en, samuana ambata babakaan yang sama lalako’en nanna arung akaus isunat. Baru’ daia pande tamba angkaan maramiang Aso Palaloien. Sama nanna warga negaraan rabarik, pande tamba angkaan. Poangsi tau nampiin isunat na’an pande tamba angkaan rami di’en. 49Kosan bedana. Sama adat ipakaien lo’a samuana, maam lo’a tau mondoken nanna tau iparanakangen di negerinin,” ingka kenang jaruma i Yahuwe lo’a baki’ Musa nanna baki’ Harun.
50Jaji dalola’ani bua kole’da’ ambata anak kanturunanna baki’ Israel dinen, awan bua parintana i Yahuwe lo’a baki’ Musa nanna baki’ Harun. 51Jaji aso dinen bua daawa ira bayu’en, ambata anak kanturunanna baki’ Israel dinen minsaluan dari negeri Mesir.
Currently Selected:
Palapasang 12: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
