Palapasang 11

Dalao’i tula kasapulo’en, mate ambata anak yang atoaan

1Jaji manjarum i Yahuwe lo’a baki’ Musa, “Na di’en Musa’e,” ingka kenang, “sakali poangpi bea kupamondokang tula lo’a raja Mesir nanna negerina. Maminna dinen tetapkin daparuarang lamba’ minsaluan dari negeri di’en. Labi dari pada daparuarangkin, lamba’in ona’ to’ dauserkin jaji lasana to’ manyuro’a lo’in mamalin dari negerina. 2Jaji jarumi ona’ ira suang gulungannu. Ira ambata babainyeen, ambata gulungan babakaan arung lamba’ lo’a tau lalako’en sibiringanen nanna. Arung ira mamita ambata gulungan barang amas, ambata barang pirak lo’a urang Mesiren,” ingka kenang manjaruma i Yahuwe lo’a baki’ Musa.

3Jaji gulungan urang Israelen dinen dakamainya’i bua kole’a urang Mesiren. Kole’a i Yahuwe mamin paloe’i ateda’. Baki’ Musapi dinen bakaya dakamainya’i tauna. Maam tapat asanna sasara negeri Mesir. Maam ambata gulungan anak buana rajaan ka’ kenanga, maam tau bayu’en ka’ kenanga. Mainya’ kausa lo’a.

4Jaji manjarum baki’ Musa inang de’i di arona rajaan, “Na, malam di’en kira-kira tanga’ malam daia to’ lamba’, ingka dinen i Yahuwe. To’ malamba’i kausa negeri Mesir di’en. 5Samuana anak atoan sasara negeri Mesir malam di’en to’ mate. Dari anak atoana rajaan, mondok lo’a anak atoana pangkamin babainyeen dinen yang manggiling tepungin, samuana to’ mate. Mondok ambata anak atoana inatangin to’ akaus mate malam di’en. 6Bakaya ona’ unyi anangisa tauen sasara negeri Mesir malam di’en. Na,an kala’ idalinga launna di’en, dari ijoloon sampai mondok lo’a ona’en. 7Poangsi di antarana anak kanturunanna baki’ Israelen kosan jalu mangaruun. Asu dampe na’an barani mangkang lo’da’, kapi lo’a mantuariin, kapi lo’a inatangda’. Daparangka’i mainto’ itamuna iko kole’a laan mamelena i Yahuwe lo’a urang Mesiren, laan lo’a urang Israelen. 8Ona’ malam di’en, gulungan ambata anak buanu di’en to’ mondok lo’ku’ laloang to’ tunduk ijolona aroku’ mawa jarum di’en. Lamba’kin alit, ikin nanna ambata gulungan urangin, ingka kenang ona’. Baru’ dinen daiak to’ lamba’ maruar dari negerinu di’en,” ingka kenang manjaruma baki’ Musa lo’a rajaan. Mamin dinen lamba’ barik marantang unjang kosanna raja Mesir dinen nanna arasina. Badale’-dale’ arasina dinen di batak nyawana.

9Jaji kenanga memen jaruma i Yahuwe lo’a baki’ Musa, “Na, di’en raja Mesiren, ingka, alibak manaantalinga lo’u. Ratina kenang kupolana mainto’ dinen bayu’a ambata panyunyua kupolaan di negeri Mesir di’en, mainto’ bayu’ insang bayu’ panyunyuaku’,” ingka kenang memen. 10Jaji kenang lalo adarina. Baki’ Musa nanna baki’ Harun mamola ambata gulungan panyunyuaan dinen di arona rajaan. Poangsi mamin atena rajaan dapangkarasang kole’a i Yahuwe. Jaji alibak daia paruarang lo’a ambata anak kanturunanna baki’ Israel dinen lamba’ minsaluan dari negerina.

Currently Selected:

Palapasang 11: EBE

Highlight

Copy

Compare