Kyenesis 7
7
Yaa Lata Ntu Layii kasɔ
1Ninfɛ di Saate latɔkɔ Noa alɛ <<Buo di lɛlakaa nwu nkpo kamɛ, afɔ ku leyo lɛfɔ batii bamuu, diekye lete lɛfɔ lɛnya nlɛ fale otii tinini di akyɛnfɔɔle lee ya mmle kamɛ nɛ. 2Kpaa babɔkɛɛ ba nieklekle ni biala ɔsa ku ɔsɔfɔ akyuu akuɛnsĩ, ku mba ninanklekle ni biala ɔsa ku ɔsɔfɔ akyuu anyɔ. 3Bakansiɛ biala kafɔɔ, kpaa ma ɔsa ku ɔsɔfɔ akyuu akuɛnsĩ, alɛ obiala lɛma ku atembi lɛma kawɛ nkpa kaasɔ ka mmle suoto. 4Diekye diɛyɔ ni di miɛ diesifi ni dii kuɛnsinle, mata kanto nnɔɔ kaasɔ suoto ayi afosi ana nkyɛ afosi ana, nwɔɔsa lɛsaa biala ninkpe ni nkpa lɛbla ni kaasɔ ka mmle suoto.>>
5Nioso Noa labla lɛsaa biala di Saate latɔkɔ nwɔ nii.
6Obe wɔ di kanto lanɔɔ aayii ni kasɔ yi, Noa ntoofũ alɛɛ alafa akuɔ. 7Di kanto kamanɔɔ an-yii ni kasɔ ka mmle oso, Noa ku babisuɔtɔbi nɔɔ ku ɔsɔfɔ ku babisɔfɔ nɔɔ labuo di lɛlakaa nwu nkpo kamɛ. 8Babɔkɛɛ ba nieklekle ni ku mba ninanklekle ni akyuu anyɔ, bakansiɛ ku asaa ya amuu ninkpɔkɔ ni kaasɔ suoto, 9basuɔtɔ ku basanko lawa Noa nfũ, baabuo di lɛlakaa nwu nkpo kamɛ fɛ mmle okle di Yaa latɔkɔ ni Noa. 10Di ayi akuɛnsĩ sɛmaa ntu oyii nwu lawa kaasɔ ka mmle suoto.
11Di Noa nkpa kamɛ, lɛlɛɛ le aafũ ni alɛɛ alafa akuɔ di lefosi dii kuɛnsinle di kɔwɛntɛ nyɔɔfa kamɛ, dii nwu nkpo ni di kasɔ kamɛ ntu mmuu lataa, ni di osi ntu n-yoko lasɛkɛtɛ nɛ. 12Ni di kanto lanɔɔ aakpete di kasɔ suoto ayi afosi ana ku nkyɛ afosi ana nɛ.
13Dii nwu nkpo kale ni di Noa ku babisuɔtɔbi nɔɔ, Sem, Ham ku Yafet diɛkyakaa ni di ɔsɔfɔ nɔɔ ku babisuɔtɔbi nɔɔ batiɛ nwu basɔfɔ labuo di lɛlakaa nwu kamɛ nɛ. 14Manko lepoo kamɛ babɔkɛɛ ku atembi lɛma ku babɔkɛɛ sele bamuu ku atembi lɛma ku asaa ya ninkpɔkɔ ni kaasɔ ku atembi lɛnya ku bakansiɛ bamuu ku atembi lɛma ku lɛsaa biala le ninkpe ni afoko. 15Kabɔkɔbii biala ninwuna nsi ka ni ku letembi nɔɔ akyuu anyɔ lɛma labuo di lɛlakaa nwu kamɛ ku Noa. 16Babɔkɛɛ ba niabuo ni di lɛlakaa nwu kamɛ lale osuɔtɔ ku ɔsanko ku lɛsaa biala ninkpe ni nkpa, fɛ mmle di Yaa latɔkɔ ni Noa. Ni di Saate lasɛɛ nwɔ aakpee kaamɛ nɛ.
17Ntu latooyii kasɔ suoto ayi afosi ana, di ntu nwu latɔɔpɔ nii, diakɛnkɛ lɛlakaa nwu nkpo diatika di ntu nwu osi. 18Di ntu nwu latooyii diatɔɔpɔ ni kaasɔ suoto, ni di lɛlakaa nwu nkpo latika di ntu nwu osi diatookyi nɛ. 19Ntu nwu latɛ diayii kasɔ nwaa, diatĩi abokote takale amuu di kolo kalɔ. 20Ntu nwu layii diatĩi abokote nsintɛɛ diakyofo dialenkee nkpaa afosi anyɔ. 21Lɛsaa biala niawɛ ni nkpa kaasɔ suoto, bakansiɛ, babɔkɛɛ sele, lepoo kamɛ babɔkɛɛ, asaa ya amuu ninkpɔkɔ ni kaasɔ suoto ku batii bamuu lawɔɔ. 22Lɛsaa biala ninnwuna di anwufie kamɛ di nkpa lasiɛ nini di kasɔ kosole suoto lakpi. 23Baawɔɔsa lɛsaa biala niawɛ ni nkpa kaasɔ suoto. Batii ku babɔkɛɛ ku asaa ya ninkpɔkɔ ni kaasɔ suoto ku bakansiɛ, baawɔɔsa ma kaasɔ suoto. Noa ku batii ba niasiɛ ni di lɛlakaa nwu kamɛ lete niabu.
24Ntu layii kasɔ suoto ayi kɔlafa afosi anɔɔ.
Currently Selected:
Kyenesis 7: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
