Kyenesis 6
6
Batii Sikpile Ɔbla Kaayi.
1Obe wɔ baatii lakyako ni ɔpɔ kaayi ka mmle kamɛ baalofo basankobi baata ma nii, 2ni di Yaa babisuɔtɔbi#6.2Anwuna awo aale aate fɛ Yaa babisuɔtɔbi bawo lanya mmle okle di batii babisankobi nwu nkpo n-lɛ sekpeele, ni baayɔ mba ninlɛ ma. 3Ni di Saate labuɛ alɛ, <<Ninwuna nii dilɔbasinsiɛ di otii kamɛ dinaa ni kaloo, diekye suoto sina ninkpe nwɔ, alɛɛ nɔɔ ninkpa kamɛ male kɔlafa afosi anyɔ.>>
4Batii ba niayefe ni kasɔ baakyokyodikyo ni lawɛ kaayi di obe nwu nkpo kamɛ ku nni sɛmaa. Di obe wɔ di Yaa babisuɔtɔbi layɔ ni batii babisankobi nwu nkpo baalofo babi baata ma ni oso, mma niale saa basientɛ nwu ku mba niafũ ni leyooto nɛ.
5Obe wɔ di Saate lanya mmle okle di otii disi osie ntɔɔpɔ ni kaayi ka mmle kamɛ ku mmle okle di otu nɔɔ dibiesaa nimuu nle ni dikpile lete obe lele yi, 6diabuo Saate suoto alɛ aabla otii akpee kaayi ka mmle kamɛ, nioso aatoonu dibuo di otu nɔɔ kamɛ. 7Nioso Saate labuɛ alɛ <<Kamawɔɔsa otii wɔ lɛbla ni ndiki kaayi ka mmle kamɛ, otii ku babɔkɛɛ ku asaa ya ninkyɛ ni kaasɔ ka mmle suoto ku bakansiɛ ba ninflɛlɛtɛ nii, diekye diebuo mi suoto alɛ lɛbla ma.>> 8Kafɔɔ Noa labuo Saate anu.
Noa Suoto Ɔlaa
9Nnya Noa banantii ɔlaa ninle nwɔ mmle nɛ.
Noa lale otii tinini, lɛpɔɔ olo kuninwii ditatika nwɔ di suoto di batii ba kamɛ aasiɛ ni di obe nwu kamɛ. Aasumu Yaa. 10Noa lalofo babi batiɛ. Sem, Ham ku Yafet.
11Kayi nfɛ labalalaa di Yaa anu, kaayii pɔ ku amumu ɔbla. 12Yaa lanya mmle okle di kayi ntɔɔlalaa kate nii, diekye batii bamuu kaayi ntɔɔlalaasa lɛkyɛmbi lɛma. 13Nioso Yaa latɔkɔ Noa alɛ, <<Kamawɔɔsa batii ba mmle bamuu, diekye kasɔ kamuu ntooyii pɔ ku amumu lɛma ɔbla. Nioso mawɔɔsa ma ku kasɔ nwu. 14Nioso yɔ sewoso siene fawola lɛlakaa fata suoto faasɛ kamɛ ku ayo, faayɔ kɔmaa fatĩi kamɛ ku kayi. 15Nnya mmle okle faawola nini. Lɛlakaa nwu lɛkaana dibla nkpaa alafa ana afosi anɔɔ. Lɛblɛfɛ kafɔɔ dibla nkpaa afosi akuɛnsĩ nkpaa nnɔɔ, lɛɛtaka kafɔɔ dibla nkpaa afosi ana nkpaa nnɔɔ. 16Faaba ni, faadiki obo kɔkpaa kunwii ku ɔfã di osi. Faadiki kayoko di lɛlakaa nwu nkpo ɔlɔɔkɔ, faabla ni sitika sitiɛ, kalɔ, ntɛɛ ku osi. 17Diekye kamata ntu n-yii kasɔ ka mmle suoto ninlalaasa lɛsaa biala ninkpe nkpa koolo ko mmle kalɔ. Lɛsaa biala kaasɔ ka mmle makpi. 18Kamanii kanya ku afɔ, fababuo di lɛlakaa nwu nkpo kamɛ, minko babisuɔtɔbi lɛfɔ ku ɔsɔfɔ lɛfɔ ku babisɔfɔ lɛfɔ. 19Kpaa babɔkɛɛ ba ninkpe ni nkpa bamuu banyɔ banyɔ ɔsanko ku osuɔtɔ fakpee di lɛlakaa nwu nkpo kamɛ alɛ baawɛ nkpa ku afɔ. 20Bakansiɛ biala ku atembi lɛma, babɔkɛɛ biala ku atembi lɛma ku asaa ya ninkpe ni nkpa ankpɔkɔ ni kaasɔ suoto ku atembi lɛma banyɔ banyɔ fawako ɔkyɛ lɛfɔ alɛ baawɛ nkpa. 21Afɔ yi, siisa alesaa biala manle ni fakpee kaamɛ alɛ aale afɔ ku mma alesaa.>>
22Nioso Noa labla lɛsaa biala fɛ mmle okle di Yaa latɔkɔ nwɔ nii.
Currently Selected:
Kyenesis 6: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
