Kyenesis 8
8
Ntu Oyii Nwu Lasɔɔ
1Kafɔɔ Yaa lanya Noa ku lepoo kamɛ babɔkɛɛ bamuu ku babɔkɛɛ sele ba niawɛ ni di ɔkyɛ nɔɔ di lɛlakaa nwu kamɛ nyaami, ni aata kɔfɛɛfɔ lafɛ kaasɔ suoto ni di ntu lakyako ɔsɔɔ nɛ. 2Ni di kasɔ kamɛ ntu ku osi n-yoko ntu lasɛɛ nɛ, ni di kanto ladiɛ ɔnɔɔ nɛ. 3Ntu nwu lakyako ɔsɔɔ kaasɔ suoto buɛbuɛ, di ayi kɔlafa afosi-anɔɔ sɛmaa ntu nwu lasɔɔ. 4Di kɔwɛntɛ kuɛnsinle lefosi dii kuɛnsinle kamɛ, ni di lɛlakaa nwu nkpo lalatika di Ararat kobokote suoto nɛ. 5Ntu nwu nkpo lakple diatɔɔsɔɔ osie kanya dialaadu kɔwɛntɛ fosile kamɛ, di kɔwɛntɛ fosile nwu dii kasale kamɛ kobokote nwu nkpo osi lakyɔɔ klekle.
6Di ayi afosi ana sɛmaa Noa lasɛkɛtɛ sɛfele wɔ aadiki ni di lɛlakaa nwu nkpo suoto. 7Ni aadiki kwakwalobi onwii aasifi kayi nɛ, ni aatɔɔflɛlɛtɛ aatoofe katoo ku kala dialaase di obe wɔ di ntu nwu nkpo laloo ni ɔsɔɔ nɛ. 8Ninfɛ aadiki ablonuma aasifi kayi alɛ oonyu nse ntu nwu ntɔɔsɔɔ di kasɔ suoto nɛ. 9Kafɔɔ ablonuma nwu nkpo ditawɛ lɛba aasoo, diekye ntu late di kasɔ kamuu suoto, nioso aakple aasifi lɛlakaa nwu kamɛ di Noa nfũ. Ni aakyɔɔ kɔnɛɛ aakpaa nya aakpee di lɛlakaa nwu kamɛ nɛ. 10Aasoko ayi akuɛnsĩ sɛmaa ni aakple aadiki ablonuma nwu di lɛlakaa nwu kamɛ nɛ. 11Obe wɔ di ablonuma nwu lakple aawa ni ɔkyɛ nɔɔ ku kɔtɔɔfɔ yi, aatũ nnɔnyi kowoso lɛfata kɔɔnle di kanya! Ninfɛ di Noa latofo alɛ ntu nwu ntɔɔsɔɔ kaasɔ suoto nɛ. 12Ninfɛ aakple aasoko ayi akuɛnsĩ kafɔɔ nɛ, ni aakple aadiki ablonuma nwu nɛ, kafɔɔ atasinkple aawa ɔkyɛ nɔɔ.
13Dii le di Noa lafũ ni alɛɛ alafa akuɔ lɛlɛɛ ninwii di kɔwɛntɛ kasale dii kasale yi, ni di ntu nwu lasɔɔ dialoo kaasɔ suoto nɛ. Ninfɛ di Noa latikiti lɛlakaa nwu nkpo nsintɛɛ aanyu, ni aanya alɛ kasɔ ntookoso nɛ. 14Di ayi afosi anyɔ dii kuɛnsĩnle di kɔwɛntɛ nyɔɔfa kamɛ ni di ntu nwu laloo ɔsɔɔ kaasɔ nɛ.
15Ninfɛ di Yaa latɔkɔ Noa alɛ, 16<<Die di lɛlakaa nwu kamɛ, afɔ ku ɔsɔfɔ lɛfɔ ku babisuɔtɔbi lɛfɔ ku basɔfɔ lɛma. 17Faadiki lɛsaa biala le ninkpe ni nkpa di ɔkyɛ lɛfɔ di lɛlakaa nwu kamɛ. Bakansiɛ, babɔkɛɛ ku asaa ya amuu ninkpɔkɔ ni kaasɔ suoto alɛ baalofo mankpɛ man-yii kasɔ suoto.>>
18Nioso Noa ladie ku babisuɔtɔbi nɔɔ ku ɔsɔfɔ ku babisɔfɔ nɔɔ. 19Babɔkɛɛ bamuu ku asaa ya ninkpɔkɔ ni kaasɔ suoto ku bakansiɛ bamuu ku lɛsaa biala ninkyɛ ni kaasɔ suoto ladie di lɛlakaa nwu nkpo kamɛ, akudi akudi ku atembi lɛma.
20Ninfɛ di Noa lapɛ oleɔta akyikye aata Saate nɛ. Ninfɛ aayɔ babɔkɛɛ ba nieklekle ni bamuu bawo ku bakansiɛ ba nieklekle nii, ni aayɔ aata ɔfiɛ asaaɔta aata Saate ole di ninya suoto nɛ. 21Di Saate lanu ni ɔkɔnɔ biene nwu nkpo yi, ni aabuɛ di otu nɔɔ kamɛ alɛ, <<Diidii namasinkpaani kasɔ ka mmle ta otii oso, kuntɛ otii otu kamɛ dibiesaa nle dikpile diɛyɔ ni bia sibisɔ nɔɔ yi, diidii namasinwɔɔsa asaa ya ninkpe ni nkpa amuu fɛ mmle okle labla nii.
22<<Diɛyɔ ni di obe wɔ kaasɔ mate nii,
asaa ɔpɛbee ku ofiɛlɛbee,
lɛwɔɔfɔ ku difila,
kɔkyɛɛ ku kabiene,
kakũ ku kakyɛ
dilɔbaloo.>>
Currently Selected:
Kyenesis 8: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
Videos for Kyenesis 8
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Episode 29: Did a Meteor Really Trigger Noah’s Flood?
Under The Hood
Ep 32. Genesis 6-7: The Flood: A Heartbroken God Brings Justice and Mercy
The Bible Show