Kyenesis 34
34
Dina Ku Sekem Batii
1Dii ninwii Yakob ku Lea obisankobi Dina, lakyɛ alɛ ɔɔlaasɛɛsa basanko bawo ninkpe ni di lɛba le basi nii. 2Obe wɔ di Hamor wɔ ninle ni Hiwi otii, aale ni kasɔ nwu nkpo ɔka obisuɔtɔbi Sekem lanyɔɔ nii, aayɔ osie aatenko nwɔ. 3Yakob obi Dina nwu ɔlaa lakpanko nwɔ di otu, ni aatoomiɛ nwɔ nɛ. 4Nioso Sekem latɔkɔ ote Hamor alɛ, <<Kaalɛ okpeele wɔ mmle fatɛɛ n-yɔ.>>
5Obe wɔ di Yakob lanu alɛ bɛɛyɔ osie beetenko ni obisankobi nɔɔ Dina yi, babisuɔtɔbi nɔɔ latɔɔkpa babɔkɛɛ nɔɔ leepoo kamɛ; nioso aalo kanana dialaase di obe wɔ baawa ni leyo.
6Ni di Sekem ote, Hamor lakyɛ aalaakakatɛko Yakob nɛ. 7Di Yakob babisuɔtɔbi lakple ni di babɔkɛɛ kakpakɔ babanu ni ɔlaa wɔ niawa nii. Ɔfɔɔ lasifi ma, baanya ɔblɔ osie kanya, diekye Sekem labla anunsɔsaa di Israel suoto, aayɔ osie aatenko ni Yakob obisankobi. Lɛsaale ninankaatɛ alɛ baabla nii.
8Kafɔɔ Hamor latɔkɔ ma alɛ, <<Nwaako obisuɔtɔbi nii mbɔmbɔ Dina. Lekoto biyɔ nwɔ bitɔɔ ayɔ. 9Bita owo ku aye butɔɔyɔ bawo batii; biyɔ babisankobi lee bita babisuɔtɔbi loo bayɔ, di awo kafɔɔ buɔyɔ babisankobi loo buta babisuɔtɔbi lee bayɔ. 10Biafuo osiɛ di kamɛ loo; kasɔ ninte ye di anu nɛ. Bisiɛ ninka suoto, biesunsũ asaa, biɛwɛ asaa kaasɔ nwu suoto.>>
11Ni di Sekem latɔkɔ Dina ote ku babilɛma suɔtɔbi alɛ, <<Bile mi sibualɛ, ni mata ye lɛsaa lele biɛkaalɛ. 12Bitɔkɔ mi disi asaa ku ɔkafɔɔ asaa ya ninwako ni fɛ mmle dikaatɛ ni, mata amuu nta ye. Aye biyɔ okpeele nwu bitɛɛ n-yɔ.>>
13Kafɔɔ ta nle aabla ni anunsɔsaa ku obilɛma sankobi Dina oso, Yakob babisuɔtɔbi lakyɔnkyɔ Sekem ku ote Hamor. 14Baatɔkɔ ma alɛ, <<Bulaafuo lɛsaa le mmle ɔbla; bulaafuo obiloo sankobi ɔyɔ ɔta osuɔtɔ wɔ ninankyɛlɛnsa ni suoto. Dibabla sinunsɔ ninta wo. 15Buɔta ye disibu loo di osuku wɔ mmle suoto: nnwu ninle alɛ biate fɛle awo okle alɛ baakyɛlɛnsa basuɔtɔ bamuu suoto. 16Ni bubayɔ babisankobi loo munta ye, di awo kafɔɔ mun-yɔ babisankobi lee. Ni bubasiɛ ye kaamɛ mumbla batii banwii ku aye. 17Kafɔɔ nse bienu kasɔ biɛkyɛlɛnsa suoto yi, ni bubakpaa obiloo sankobi munsifiko.>>
18Hamor ku obisuɔtɔbi Sekem latunako ma ku ɔlaa nwu. 19Kunkye di okosopo nwu mantɛ manta ni dibu di ote leyo batii bamuu kamɛ latuna aalaabla di mmle baabuɛ nii kanya. Diekye Yakob obisankobi nwu lasiɛ nwɔ di otu. 20Nioso Hamor ku obisuɔtɔbi Sekem lakyɛ okpoo lɛma lɛkpaka baalaakakatɛ baata okpoo lɛma basuɔtɔ. 21Baatɔkɔ ma alɛ, <<Basuɔtɔ ba mmle basiɛwo nwaa bale batawo. Bita ma basiɛ di kasɔ loo suoto, baasunsũ asaa; kasɔ mpɔ kakpete baasiɛ nii. Bubafuo babisankobi lɛma ɔyɔ, mma kafɔɔ man-yɔ bale wo. 22Kafɔɔ batii ba mmle manu kasɔ mansiɛwo kaamɛ mumbla batii banwii, nse basuɔtɔ loo letuna bɛɛkyɛlɛnsa suoto fɛle mmle okle di mma bamu bɛɛbla nii. 23Babɔkɛɛ sele lɛma, lɛsaawɛ lɛma ku babɔkɛɛ bamba lɛma makple wo bale. Nioso bita bunu kasɔ buta ma, baasiɛ kaamɛ loo.>>
24Basuɔtɔ ba bamuu niadie baakyɛ ni okpoo lɛkpaka nwu latuna di ɔlaa wɔ di Hamor ku obisuɔtɔbi Sekem labuɛ nii. Nioso baakyɛlɛnsa osuɔtɔ biala suoto di okpoo kplɛ nwu kamɛ.
25Di dii tiɛfa, di nkɔ lɛma nwu latoobuo ma nii, Yakob basuɔtɔbi banyɔ, Simeon ku Lewi, bale ni Dina babilɛma suɔtɔbi layɔ mpamii lɛma baalaadieko okpoo nwu, baalo osuɔtɔ biala. 26Baalo Hamor ku obisuɔtɔbi Sekem ku kapamii. Ni baakpaa Dina baadieko di Sekem leyo ni baadie di okpoo nwu nɛ. 27Ninfɛ di Yakob babisuɔtɔbi bule lakyɛ okpoo nwu kamɛ di nfũ baakpi nwu nkpo latente ni baalaayɔ asaa lɛma, di nfũ baakpɔnɔfɔsa ni obilɛma sankobi nɛ. 28Baayɔ batii nwu bafoso, batie, banankyue, babɔkɛɛ ba nintuka ni atoo ku lɛsaa lɛma biala di okpoo nwu kamɛ ku afe lɛma. 29Baayɔ lɛsaawɛ lɛma ku basanko ku babi. Baayɔ lɛsaa biala di ayo lɛma baasifiko.
30Ninfɛ di Yakob latɔkɔ Simeon ku Lewi alɛ, <<Bitɔɔwako ɔlaa kplɛ di suoto nii, biɛtɛɛ ntɔɔbla otii kpile lɛta Kanaan batii ku Peres batii ba ninsi ni kaasɔ ka mmle suoto. Buɔpɔ, ni nse beesi kanya bɛɛtaka di suoto nii, ni babawɔɔsa ami ku leyo nii kamɛ batii.>>
31Kafɔɔ baadiki kanya alɛ, <<Ni dikaatɛ alɛ aabla obiloo sankobi fɛle sɔnɔkpeetɛ?>>
Currently Selected:
Kyenesis 34: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
