Kyenesis 33
33
Yakob Ku Esau Lakyaka
1Ni di Yakob latakatɛsa anu aanyu, ni aanya Esau kɔwa ku basuɔtɔ alafa ana nɛ; nioso aasɛ babi aata Lea ku Rahel ku basanko bakpɛmblatɛ nɔɔ nwu banyɔ. 2Aayɔ bakpɛmblatɛ banyɔ nwu ku babi lɛma aalesa katũ, Lea ku babi latika, Rahel ku Yosef lakpi kamaa. 3Yakob lale lɛma katũ, di obe wɔ nfɛ ɔɔtɛɛtɛɛ ni obilɛma aase katũ nɔɔ kaasɔ sikuɛnsĩ.
4Kafɔɔ Esau latoso aalaaminiko nwɔ; aayɔ nnɛɛ nɔɔ aakpee nwɔ siimu ni aafĩfĩɔ nwɔ akpoo nɛ. Ni di banyɔ lɛma nwu baawi kaku nɛ. 5Ni di Esau latakatɛsa anu aanyu, ni aanya basanko nwu ku babi nɛ. Ni aakaalɛ alɛ, <<Bawe ninle mba mmle nɛ?>>
Ni di Yakob ladiki kanya alɛ, <<Mma ninle babi ba diefe ni di Yaa sibualɛ ɛɛta ni kpɛmblatɛ lɛfɔ nɛ.>>
6Ninfɛ di basanko bakpɛmblatɛ nwu ku babi lɛma labadu baase ntũ lɛma kaasɔ nɛ. 7Lea ku babi latika babase ntũ lɛma kaasɔ. Yosef ku Rahel lale bayɛntɛle, mma kafɔɔ babase ntũ lɛma kaasɔ.
8Esau lakaalɛ alɛ, <<Batii ku babɔkɛɛ akudi ya amuu lɛkyakako ni kasɔ mɔ?>>
Ni di Yakob ladiki kanya alɛ, <<Di mmle kawɛ ni sibualɛ di saate nii anu.>>
9Kafɔɔ Esau latɔkɔ nwɔ alɛ, <<Obiloo, n-ya ninkpe mi ni mpɔ. Afɔ yɔ n-ya ninkpe fɔ ni.>>
10Ninfɛ di Yakob alɛ, <<Lekoto, oowo, se mawɛ sibualɛ di anu lɛfɔ, fũ akyɛsaa nii ya mmle. Diekye fatoofũ mi ni ku sibualɛ oso, nunua ɔnya kɔnya fɔ fɛ Yaa anu kɔnya. 11Fũ akyɛsaa ya bɛɛyɔ bɛɛwako fɔ ni, diekye Yaa lewii mi lɛyɔɔ ɛɛtɛɛ asaa ya niefĩ mi nii.>> Ta Yakob lanyinka nwɔ ni oso, aafũ asaa nwu.
12Ninfɛ di Esau labuɛ alɛ, <<Ta buɔtɔɔkyɛ; kamatikanko fɔ.>>
13Kafɔɔ Yakob latɔkɔ nwɔ alɛ, <<Afɔ omu faye, saate nii, dikpeni buololaa babisɔ nwu ku bakɔkɛɛ balofotɛ ku abi lɛma buonyu nwaa. Nse buɔkpakpayi ma osie kanya di dii ninwii kamɛ ni babɔkɛɛ bamuu makpi. 14Nioso lekoto saate nii, le kpɛmblatɛ nɔɔ katũ, di ami ku babisɔ nwu ku babɔkɛɛ nwu butɛ suoto buɔbatũ saate nii di Seir.>>
15Ni di Esau labuɛ alɛ, <<Ni tɛɛ ndiɛ basuɔtɔ nii bawo di ɔkyɛ lɛfɔ.>>
Kafɔɔ Yakob alɛ, <<Nnwu kuofĩ, afɔ tɛɛ nwɛ sibualɛ di anu lɛfɔ, saate nii.>>
16Nioso Esau layefe osuku aakple aasifi Seir. 17Kafɔɔ Yakob lasifi Sukot kasɔ, nfa aatofo leyo aata suoto, aapɛ akpaayo aata babɔkɛɛ nɔɔ. Nni oso bɔɔlɛɛ lɛba nwu alɛ Sukot#33.17Sukot lɛsɔdiki ninle alɛ akpaayo nɛ.
18Di Yakob ladie ni di Padan Aram,#33.18lɛsɔdiki ninle Mesopotamia nɛ aakyɛ aalaabuo Sekem okpoo di Kanaan kasɔ ni aapɛ akpaayo di okpoo nwu ɔlɔɔkɔ nɛ. 19Ni aaya kasɔ di Sekem ote Hamor babisuɔtɔbi nfũ ku koto fututu kɔlafa, nfa aapɛ akpanta nɔɔ nɛ. 20Nfa aapɛ oleɔta akyikye, ni aalɛɛ lɛba nwu alɛ El-Elohe Israel#33.20El-Elohe Israel lɛsɔdiki ninle alɛ, Yaa, Israel batii Yaa ee Israel batii Yaa wɔ ninlenke nii. nɛ.
Currently Selected:
Kyenesis 33: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
