Kyenesis 32
32
Yakob Lalolaa Suoto Aakyakako Esau
1Yakob kafɔɔ lasifi osuku nɔɔ, ni di Yaa batɔkyɛntɛ lakyakako nwɔ nɛ. 2Obe wɔ di Yakob lanya ma nii, ni aabuɛ alɛ, <<Nnya Yaa kasiɛkɔ!>> Nioso aatika lɛba nwu leyooto alɛ Mahanaim#32.2 Mahanaim leɛsɔdiki ninle nsiɛkɔ nnyɔ.
3Yakob lakpee batɔkyɛntɛ aalesa katũ alɛ balaanya obilɛma Esau di Seir kasɔ suoto di Edom kale. 4Aatɔkɔ ma alɛ: <<Nnya ɔlaa wɔ biɛtɔkɔ ni saate nii Esau bilɛ: <Kpɛmblatɛ lɛfɔ Yakob alɛ, ntoosiɛ di Laban ɔkyɛ, ni lɛka ninfa diɛbase bia nua nɛ. 5Nkpe banankyue ku babɔkɛɛ ba nintuka ni atoo ku bafoso ku batie, basuɔtɔ bakpɛmblatɛ ku basanko bakpɛmblatɛ. Nunua saate nii, kɔta fɔ kanya nlɛ nyɛɛ nyaami di anu lɛfɔ.> >>
6Obe wɔ di batɔkyɛntɛ nwu lakple baawa ni Yakob nfũ, baatɔkɔ nwɔ alɛ, <<Buakyɛ bualaanya obilee Esau, nioso nfɛ ɔɔwa amakyakako fɔ ku basuɔtɔ alafa ana.>>
7Nioso lɛyɛkɛ ku difu lata Yakob lasɛ batii ba niawɛ ni di ɔkyɛ nɔɔ di akyuu anyɔ, nkpo kafɔɔ aasɛ bafoso, batie, banankyue ku kapubapɔnkɔ nɛ. 8Aanyu alɛ, <<Nse Esau lɛwa ɛɛbakpɛko dikudi ninwii, ni ninwii le niebu ni katoso.>>
9Ni di Yakob lɛpɛ ɔlaa alɛ, <<O teemi Abraham Yaa, teemi Isak Yaa, O Saate, afɔ niatɔkɔ mi falɛ, <Kple fasifi kale lɛfɔ ku batii lɛfɔ nfũ, mata ninlɛ fɔ,> 10ninsiɛko sifutulɛ ku onukwale wɔ feetuo ni kpɛmblatɛ lɛfɔ. Ɔkyɛnwoso lete niawɛ mi di obe wɔ lataalɛ ni Yordan okle, kafɔɔ nunua ntɔɔbla akudi anyɔ. 11Kɔpɛ ɔlaa, diki mi di obiloo Esau nnɛɛ, diekye kɔyɛkɛ nlɛ abawa amakpɛkoe ku basɔfɔ nii ku babi nii bamuu. 12Kafɔɔ feebuɛ falɛ, <Nwaako mata ninlɛ fɔ, nta banantii lɛfɔ nkpɛ fɛle lekpo ɔtɛnsia wɔ manamafuo ni ɔka.> >>
13Nioso kakyɛ nwu aate ninfa, ni aadiki akyɛsaa awo di asaa nɔɔ ya ninkpe nwɔ ni kamɛ alɛ abata obilɛma Esau: 14batie sanko alafa anyɔ ku ntiekpaa afosi anyɔ ku bafoso sanko alafa anyɔ ku akunumuu afosi anyɔ, 15kapubapɔnkɔ afosi atiɛ ku abi ku banankyue sanko afosi ana ku banankyue suɔtɔ lefosi ku babɔkɛɛ ba nintuka ni atoo basanko afosi anyɔ ku basuɔtɔ le lefosi. 16Ni aayɔ ma aakpee di bakpɛmblatɛ nɔɔ nnɛɛ, dikudi biala ku nyuntɛ, ni aatɔkɔ bakpɛmblatɛ nɔɔ nwu alɛ, <<Bile mi katũ, biɛta sebo site di dikudi biala ntɛɛ.>>
17Aatɔkɔ kpɛmblatɛ wɔ niale ni katũ alɛ, <<Se obiloo Esau lɛkyakako fɔ ɛɛkaalɛ alɛ, <Owe ninle fɔ saate, ɔfɛ foofe, owe nimba babɔkɛɛ ba mmle bamuu ninle ni katũ?> 18ni faatɔkɔ nwɔ falɛ, <Kpɛmblatɛ lɛfɔ Yakob nimba ma. Bakyɛle bale beekyesee saate nii Esau, Yakob nkpi wo kamaa ɔɔwa.> >>
19Nkpo kafɔɔ aatɔkɔ ɔnyɔɔfa ku otiɛfa ku babule ba bamuu niatikanko ni akudi nwu alɛ: <<Nse biɛkyakako Esau yi, bibuɛ ɔlaa nwu onwii bitɔkɔ nwɔ. 20Binyu bilɛ biebuɛ bilɛ, <Kpɛmblatɛ lɛfɔ Yakob nkpi wo kamaa ɔɔwa.> >> Diekye aanyu alɛ, <<Mayɔɔsa nwɔ otu ku akyɛsaa ya mmle ninle ni katũ kɔkyɛnko nwɔ nii; ni sɛmaa se lɛnyɔɔ loo bia abafũ mi.>> 21Nioso Yakob akyɛsaa lale nwɔ katũ, kafɔɔ kakyɛ nwu nnwɔɔ omu aate di kasiɛkɔ lɛma nwu.
Yakob Lakpɛ Ku Osuɔtɔ Onwii Di Peniel
22Kakyɛ nwu Yakob lataka aakpaa basɔfɔ nɔɔ nwu banyɔ, basanko bakpɛmblatɛ nɔɔ banyɔ ku babisuɔtɔbi nɔɔ lefosi onwii nwu, ni baataalɛ Yabok okle nɛ. 23Aataalɛsa ma okle nwu aaloo nii, ni aataalɛsa asaa nɔɔ ya ninkpe nwɔ ni amuu kafɔɔ nɛ. 24Nioso Yakob lete nfɛ niabu, ni di osuɔtɔ onwii lakpɛko nwɔ kale ko niasɛ. 25Obe wɔ di osuɔtɔ nwu lanya alɛ oloofuo nwɔ ni olenkee, ni aakpanko Yakob lekyekensi nɛ, ta kakpɛ nwu oso lekyekensi nɔɔ lakpa. 26Ni di osuɔtɔ nwu labuɛ alɛ, <<Tɛɛ nsifi, diekye kale ntɔɔsɛ.>>
Kafɔɔ Yakob ladiki kanya alɛ, <<Namata fɔ fasifi diediki feewii mi lɛyɔɔ fiɛ.>>
27Ni di osuɔtɔ nwu lakaalɛ nwɔ alɛ, <<Lɛ manlɛɛ fɔ?>>
ninfɛ aabuɛ alɛ <<Yakob.>>
28Ni di osuɔtɔ nwu labuɛ alɛ, <<Leyooto lɛfɔ dilɔbasinle Yakob, kafɔɔ Israel, diekye fatɔɔkpɛko Yaa ku batii feeleenkee ma.>>
29Ni di Yakob labuɛ alɛ, <<Lekoto tɔkɔ mi leyooto lɛfɔ.>>
Kafɔɔ aadiki kanya alɛ, <<Be oso fɔɔkaalɛ mi leyooto?>> Ni aawii nwɔ lɛyɔɔ ninfa nɛ.
30Nioso Yakob lata lɛba nwu leyooto alɛ Peniel, diekye aabuɛ alɛ, <<Ntɔɔnya Yaa anu ku anu kafɔɔ lekple nkpe nkpa.>>
31Kufĩ latũ nwɔ fiɛ aadie di Peniel, ta lekyekensi nɔɔ oso aatookpintĩ. 32Nioso diɛbase ni bia mmiɛ Israel batii diloowee okũ wɔ ninkle ni di bɔkɛɛ lekyekensi, diekye baakpanko Yakob okũ wɔ ninkaako ni lekyekensi.
Currently Selected:
Kyenesis 32: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
