Kyenesis 27
27
Isak Lawii Yakob Lɛyɔɔ
1Obe wɔ di Isak ntoobe ɛɛkpasɔ eebiɛ anu onosinya nii, ni aalɛɛ obisuɔtɔbi nɔɔ nɔɔfole Esau aatɔkɔ nwɔ alɛ, <<Obi nii>>,
ni aatuna alɛ, <<Nnyɛɛ!>>
2Ninfɛ di Isak latɔkɔ nwɔ alɛ, <<Ntoobe, nin-ye dii le kamakpi nii. 3Nioso lolaa suoto, faayɔ akpakyaa lɛfɔ, kɔtaa ku kubi, faatɔɔkyɛ lepoo kamɛ falaalo bɔkɛɛ fawakoe. 4Faabawa alesaa ya nimbɔmbɔ ni nwaa fawakoe nle, nin-wii fɔ lɛyɔɔ fiɛ ninkpi.>>
5Di Isak latɔɔtɔkɔ ni obi nɔɔ Esau ɔlaa nwu nkpo yi, Rebeka lanu. Nioso obe wɔ di Esau lasifi ni lepoo kamɛ alɛ ɔɔlaakpa anwa nii, 6ninfɛ di Rebeka latɔkɔ obisuɔtɔbi nɔɔ Yakob alɛ, <<Lanu teefɔ kɔtɔkɔ obilee Esau alɛ, 7<Laalo bɔkɛɛ faabawa alesaa ya nimbɔmbɔ ni fawakoe nle, nin-wii fɔ lɛyɔɔ di Saate anu fiɛ ninkpi.> 8Nioso obi nii, nu ɔlaa wɔ kɔtɔkɔ fɔ ni faabla nkpo: 9Tɔɔkyɛ babɔkɛɛ lɛfɔ kamɛ, faalaamufũ kutiebii ko ninlɛ ni kɔnyɔ fawakoe ninwa alesaa ya di teefɔ mbɔmbɔ ni ntɔɔ, fɛ mmle okle ammiɛ alɛ bɛɛwa nya ni. 10Ni faayɔ fakyɛnko teefɔ ale, aawii fɔ lɛyɔɔ fiɛ aakpi.>>
11Ninfɛ di Yakob latɔkɔ ɔya Rebeka alɛ, <<Kafɔɔ obiloo Esau sinwini otii ale, kafɔɔ ami suoto nii nte plɔplɔ. 12Loobia teemi makpanko mi suoto annyu. Ni dibawa alɛ ɔkyɔnkyɔ kɔkyɔnkyɔ nwɔ, naafũ lɛkpaani di obe wɔ komiɛ ni lɛyɔɔ.>>
13Ninfɛ di ɔya latɔkɔ nwɔ alɛ, <<Obi nii, lɛkpaani nwu nkpo diwa mi di suoto. Afɔ bla di ɔlaa wɔ kɔtɔkɔ fɔ ni suoto. Tɔɔkyɛ falaamufũ ma fawakoe.>>
14Nioso aasifi aalaamufũ ma aawako ɔya, ni aawa alesaa ya di ote mbɔmbɔ ni aatɔɔ nɛ. Fɛ mmle okle ammiɛ alɛ bɛɛwa nya ni nɛ. 15Ninfɛ di Rebeka layɔ obisuɔtɔbi nɔɔ nɔɔfole Esau akpeele biene ya niate ni di ɔkyɛ nɔɔ leeyo aakpee obisuɔtɔbi nɔɔ bisɔnle Yakob nɛ. 16Ninfɛ aayɔ batie akũ nwu ku sinwini aatĩi nwɔ nnɛɛ ku simu aba ya niaplɔplɔ ni nɛ. 17Ninfɛ aayɔ alesaa biene nwu aata obisuɔtɔbi nɔɔ Yakob ku bloblo wɔ aabla ni nɛ.
18Ninfɛ di Yakob lakyɛ ote nfũ aalaabuɛ alɛ, <<Teete nii.>>
Ni aatuna alɛ, <<Obi nii, afɔ ɔmɛnle lɛma fale?>>
19Ni di Yakob labuɛ alɛ, <<Ami obi nɔɔfo lɛfɔ Esau dile. Fɛ mmle faatɔkɔ mi nii, nni ntɔɔlaabla nɛ. Lekoto taka fasiɛ, faawee lepoo kamɛ sina, faawii mi lɛyɔɔ.>>
20Ninfɛ di Isak lakaalɛ obi nwu alɛ, <<Lɛ diɛpɛ fɔ sɛwa nkpo obi nii?>>
Ni aatɔkɔ nwɔ alɛ, <<Saate Yaa lɛfɔ nwu niɛkyakaakoe.>>
21Ninfɛ di Isak latɔkɔ Yakob alɛ, <<Kpukuti fatɛɛtɛ mi ninkpanko fɔ nnyu, obi nii, ninnyu nse nwaako obisuɔtɔbi nii Esau dile ɛɛ, diele nnwɔɔ.>>
22Ninfɛ di Yakob lakpukuti aatɛɛtɛɛ ote Isak nɛ, ni aakpanko nwɔ aabuɛ alɛ, <<Yakob sɛlɔ sile, kafɔɔ nnɛɛ mmi, Esau nnɛɛ dile.>> 23Atatofo nwɔ, diekye nnɛɛ nɔɔ layila sinwini fɛ obilɛma Esau nle; nioso aawii nwɔ lɛyɔɔ. 24Ni aakaalɛ nwɔ alɛ, <<Nwaako obi nii Esau dile?
Ni aadiki kanya alɛ, <<Yii, ami dile.>>
25Ninfɛ aabuɛ alɛ, <<Obi nii, wakoe lepoo kamɛ sina lɛfɔ nwu sewo nwee, nin-wii fɔ lɛyɔɔ.>>
Ninfɛ di Yakob lawako nwɔ sina nwu aawee nɛ; ni aawako nwɔ nta nwo kafɔɔ aanyi nɛ. 26Ninfɛ di ote Isak latɔkɔ nwɔ alɛ, <<Wa ninfũ obisuɔtɔbi nii, fabafĩfiɔ mi kokpoo.>>
27Nioso aakyɛ ɔkyɛ nɔɔ ni aafĩfiɔ nwɔ kokpoo nɛ. Di obe wɔ di Isak lanu nwɔ ni akpeele nwu ofũfũ yi, ni aawii nwɔ lɛyɔɔ aabuɛ alɛ,
<<Awo, obi suɔtɔbi nii lekpete
nte fɛ kofe ko di
Saate nwu lewii ni lɛyɔɔ.
28Yaa ata fɔ oblokyi di osi,
aata kasɔ lɛfɔ kalɛ asaa
aata fɔ atitabi ku nta fɔle kpinwu.
29Nnle basumu fɔ
baatii kafɔɔ bawa kasɔ bata fɔ.
Faale sɛsaate di babilee suoto
yaafɔ babi kafɔɔ baawa kasɔ bata fɔ.
Mba niɛkpaani fɔ nii, bakpaani ma
mba kafɔɔ niewii fɔ ni lɛyɔɔ, bawii ma lɛyɔɔ.>>
30Di obe wɔ di Isak laloo oloo Yakob lɛyɔɔ owii, di Yakob ladie di ote anu aasifi ni yi, ni di obilɛma Esau kafɔɔ lakye kakpankɔ aawa nɛ. 31Nnwɔɔ kafɔɔ aalaawa alesaa biene, ni aayɔ aakyɛnko ote nɛ. Ni aatɔkɔ nwɔ alɛ, <<Teete nii, taka fasiɛ faawee lepoo kamɛ sina sewo, faawii mi lɛyɔɔ.>>
32Ninfɛ di ote Isak lakaalɛ nwɔ alɛ, <<Afɔ owe fale?>>
Ninfɛ aatɔkɔ nwɔ alɛ, <<Ami ninle obisuɔtɔbi lɛfɔ kasale Esau nɛ.>>
33Isak layɛkɛ aakyako otũtũkũ ni aabuɛ alɛ, <<Ni owe ninle kpantɛ wɔ niɛlaakpa ɛɛwakoe ni lepoo kamɛ sina, ntoowee simuu kafɔɔ lewii nwɔ lɛyɔɔ fiɛ fatɔɔwa? Nwaako kafɔɔ babawii nwɔ lɛyɔɔ!>>
34Obe wɔ di Esau lanu ni ote ɔlaa wɔ aabuɛ nii, ni aafaa kaku ku kudu osie kanya aatɔkɔ ote alɛ, <<Teete, amii, wii mi lɛyɔɔ!>>
35Kafɔɔ aatɔkɔ nwɔ alɛ, <<Obilee lɛwa ɛɛbakyɔnkyɔ mi eefũ fɔ lɛyɔɔ.>>
36Esau labuɛ alɛ, <<Nle mmle ninle lɛnyɔɔfa ɔɔtafaa mi ni nɛ. Diɛɛbla ɔkpɛ alɛ leyooto nɔɔ ninle Yakob. Eefũ mi selofo nɔɔfo, nunua kafɔɔ atookple eefũ mi lɛyɔɔ. Ninfɛ aakaalɛ alɛ, <<Ni faabu lɛyɔɔ kuniwii fatɛ mi?>>
37Ninfɛ di Isak latɔkɔ Esau alɛ, <<Ntɔɔbla nwɔ saate di suoto lɛfɔ, ntɔɔbla banantii nɔɔ bamuu kafɔɔ bakpɛmblatɛ nɔɔ. Lɛyɔ atitabi ku nta kafɔɔ lɛtɔɔ. Ni be nfɛ kamakple nfuo fɔ ɔbla ɔta, obi nii?>>
38Ninfɛ di Esau lakaalɛ ote alɛ, <<Teete nii, ni lɛyɔɔ ninwii ko ninkpe fɔ? Amii wii mi lɛyɔɔ teete! Ninfɛ di Esau lawi kaku osie kanya nɛ.
39Ninfɛ di ote Isak latɔkɔ nwɔ alɛ,
<<Kasiɛkɔ lɛfɔ
kamakyo di kasɔ ka mmle lɛlɛ suoto,
kankyo di osi oblokyi suoto.
40Kapamii lɛfɔ suoto fabasiɛ nkpa
fabale obilee kpɛmblatɛ.
Nse fɛɛtaka feeyila nwɔ di suoto
fabadie nwɔ
kaalɔ.>>
Yakob Latoso Aasifi Laban Nfũ.
41Esau lakpee Yakob di otu kamɛ ta lɛyɔɔ le di ote layɔ aatɔɔ ni oso. Ninfɛ aabuɛ di otu nɔɔ kamɛ alɛ, <<Teemi okpibee diesinkyo, nse nfɛ busi kaku yi, ni kamalo Yakob.>>
42Di obe wɔ baatɔkɔ ni Rebeka ɔlaa wɔ di obi nɔɔ nɔɔfole Esau labuɛ nii, ninfɛ aakpee baalɛɛ Yakob baatɔɔ ni aatɔkɔ nwɔ alɛ, <<Nyu lo, obilee Esau ntɔɔbla disibu alɛ abalo fɔ. 43Nioso obi nii, nu ɔlaa wɔ kɔtɔkɔ fɔ ni: Toso wla fasifi obiloo suɔtɔbi Laban nfũ di Haran. 44Falaasiɛ ninfa kɛɛkɛ, diɛlaase di obe wɔ di obilee ɔblɔ mayɔɔ ni. 45Nse obilee ɔblɔ ntɔɔyɔɔ nwɔ atoodiɛ lɛsaale faabla nwɔ ni yi, kamatika fɔ kanya fankple fanwa. Obe oso di banyɔ lee biakpi mi di dii ninwii nkpo?>>
46Ninfɛ di Rebeka latɔkɔ Isak alɛ, <<Nkpa osiɛ ntootuudi mi ta Esau basɔfɔ, Hiti basanko nwu nkpo oso. Nse Yakob lediki ɔsanko di kasɔ ka mmle suoto di Hiti basanko kamɛ fɛ mma mmle, ni diesinsiɛko alɛ kasiɛ nkpa.>>
Currently Selected:
Kyenesis 27: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
