Kyenesis 28
28
Isak Lawii Yakob Lɛyɔɔ Aadiki Nwɔ Osuku Aasifi Laban Nfũ.
1Nioso Isak lalɛɛ Yakob aawii nwɔ lɛyɔɔ, ni aakpee nwɔ kufiofa alɛ, <<Tan-yɔ Kanaan batii ɔsanko. 2Pɛsɛwa faatɔɔkyɛ Padan Aram #28.2Mesopotamia di ɔwa lɛfɔ Betuel leyo kamɛ faalaadiki ɔsanko ninfa, di ɔfa lɛfɔ Laban basankobi kamɛ fayɔ. 3Yaa wɔ ninlenke ni awii fɔ lɛyɔɔ, aata fɔ falofo fakpɛ dilaase di obe wɔ feekple ni nnle kpinwu kote. 4Aawii afɔ ku banantii lɛfɔ lɛyɔɔ fɛ mmle okle aawii ni Abraham lɛyɔɔ, faafũ kasɔ ka mmle suoto fasi ni fɛ ɔfɔɔ kakple fɔ atesaa, kasɔ ka di Yaa lɛyɔ ɛɛta ni Abraham.>> 5Ninfɛ di Isak ladiki Yakob osuku aasifi Padan Aram, dile ni Betuel Aram obisuɔtɔbi Laban nfũ, nnwɔ ninle ni, Rebeka obilɛma suɔtɔbi ale ni Yakob ku Esau ɔfa.
Esau Lakple Aayɔ Ɔsanko Bamba.
6Di obe wɔ di Esau latofo alɛ Isak ntoowii ni Yakob lɛyɔɔ, aakyesee nwɔ ni Padan Aram alɛ aalaadiki ni ɔsanko ninfa, aatofo kafɔɔ alɛ di Isak lawii nwɔ ni lɛyɔɔ aatɔkɔ nwɔ alɛ, <<Tan-yɔ ni Kanaan batii ɔsanko>> yi, 7aatofo kafɔɔ alɛ Yakob lanu ote ku ɔya ɔlaa aasifi Padan Aram. 8Nioso Esau latofo alɛ ni Kanaan batii basanko diɛlɛ ote Isak. 9Nioso aasifi aalaayɔ Nebaiot obilɛma sankobi Mahalat ninle ni Abraham obisuɔtɔbi Ismael obisankobi aakyakaa di basɔfɔ suoto nɛ.
Yakob Lasɛ Kɔlaafɔ Di Betel.
10Yakob ladie di Beerseba ni aayefe osuku aasifi Haran nɛ. 11Obe wɔ aadu ni lɛba ninwii, kaale ntooloo nii, ni aate nfa nɛ, diekye kufĩ lamɛɛ. Ni aayɔ difuɔ ninwii ninfa, aayɔ disi aatika, ni aate nɛ. 12Ni aasɛ kɔlaafɔ aanya nkyɔdiɛ nnwii lakye osi diabase kaasɔ nɛ. Ni aanya Yaa batɔkyɛntɛ layie baatoosoo nɛ. 13Ninfɛ aanya Saate n-yɛ nwɔ di anu, ni aatɔkɔ nwɔ alɛ, <<Ami ninle ɔwa lɛfɔ Abraham ku Isak Yaa. Kamayɔ kasɔ ka mmle suoto fate ni nta afɔ ku banantii lɛfɔ. 14Banantii lɛfɔ kamapɔ fɛle kasɔ ka mmle kudu, bibakpɛ minaadu kufĩ katũnkɔ ku kamɛɛkɔ, katoo ku kala kasɔ. Diefe ni di afɔ ku banantii lɛfɔ suoto babawii batii bamuu kaasɔ ka mmle lɛyɔɔ. 15Nsiko fɔ, kakɔ lele kafɔɔ fabakyɛ kamanyu fɔ, kamakplesa fɔ kafɔɔ nwako kasɔ ka mmle suoto. Namadiɛ fɔ nnɛɛ diɛlaase di obe wɔ ntɔɔbla lɛsaa le labuɛ nlɛ kamabla nta fɔ nii.>>
16Obe wɔ di Yakob lasɛnkɛ ni sɛɛkyɔsĩ, ni aabuɛ alɛ, <<Nwaako Saate nsi ninfũ mmle, kafɔɔ nintofo.>> 17Nioso lɛyɛkɛ lapɛ nwɔ aabuɛ alɛ, <<Lɛba le mmle lɛyɛkɛ nsi! Yaa leyo ninle nfũ; Yaa kafa kayoko kale.>>
18Kaleesɛ ku kuyitatũ Yakob lataka, ni aayɔ difuɔ le aayɔ aatika ni disi, aase fɛ nsũ lɛtɛsaa, ninfɛ aanyɛɛnɛ nnɔnyi aakpete ni di suoto nɛ. 19Ninfɛ aalɛɛ lɛba nwu alɛ Betel#28.19lɛsɔdiki ninle Yaa leyo nɛ. Saa, okpoo nwu nkpo baatɔɔlɛɛ Lus nɛ.
20Ninfɛ di Yakob laka ntam aabuɛ alɛ, <<Nse Yaa kamasiɛkoe annyu mi di osuku wɔ kofe nii, antɛɛ alesaa nle antɛɛ aklesaa nii kafɔɔ, 21nkple nwa teemi leyo buɛɛ yi, ni Saate nwu kamale mi Yaa. 22Ni nsũ lɛtɛsaa difuɔ le mmle lese ni ninfũ, kamale lɛba le babasũmu fɔ nii. Ni asaa ya amuu fɛtɛɛ ni kafɔɔ kamata fɔ dikyuu fosile nɔɔ.>>
Currently Selected:
Kyenesis 28: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
