Kyenesis 26
26
Isak Ku Abimelek
1Kɔka kunwii lakpɛ di kasɔ nwu nkpo suoto, fɛ nko niakpɛ ni di Abraham obe kamɛ. Nioso Isak lasifi Filisti batii ɔka Abimelek nfũ di Gerar. 2Ninfɛ di Saate ladiki suoto aatuo Isak, ni aatɔkɔ nwɔ alɛ, <<Tandie faasifi Egipte, siɛ di kasɔ ka suoto lɛtɔkɔ fɔ nlɛ siɛ ni. 3Siɛ kaasɔ ka mmle suoto kɛɛkɛ, kamasiɛko fɔ, n-wii fɔ lɛyɔɔ. Diekye afɔ ku banantii lɛfɔ kamayɔ nsɔ be mmle mmuu nta. Kamabla di ntam be laka lata ni teefɔ Abraham. 4Kamata banantii lɛfɔ mpɔ fɛ awɛntrɛbi di kolo, kamayɔ nsɔ be mmle mmuu nta ma, diefe ni baanantii lɛfɔ suoto babawii nnle mmuu lɛyɔɔ kaasɔ ka mmle suoto. 5Diekye Abraham lakyɔɔ mi ɔlaa atoko, aale mi kufiofa aakyɛ di sisuku se latuo nwɔ ni, asaa otuo ku sɛlaa se latɔkɔ nwɔ nii.>> 6Nioso Isak lasiɛ di Gerar.
7Obe wɔ di basuɔtɔ ba niawɛ ni ninfa lakaalɛ nwɔ ni ɔsɔfɔ disi yi, aatɔkɔ ma alɛ, <<Ɔsankobi loo ale,>> diekye aatɔɔyɛkɛ alɛ aabuɛ alɛ, <<Ɔsɔfɔ nii ale.>> Diekye aanyu alɛ, <<Basuɔtɔ nwu di lɛba le mmle malo mi ta Rebeka oso, diekye alɛ sekpeele.>>
8Obe wɔ di Isak ntoosiɛ ninfa diɛklɛ nii, dii ninwii, Abimelek Filisti batii ɔka lanya aafenko di sɛfle mmle okle di Isak ku ɔsɔfɔ Rebeka latookpee ni kɔkyɔ. 9Nioso Abimelek lakpee Isak otii aakaalɛ nwɔ alɛ, <<Nwaako ɔsɔfɔ lɛfɔ ale! Obe oso foobuɛ falɛ, <Obiloo sankobi ale>?>>
Ninfɛ di Isak ladiki kanya alɛ, <<Diekye lenyu nlɛ babalo mi ta nnwɔɔ oso.>>
10Ninfɛ di Abimelek labuɛ alɛ, <<Obe lɛsaa fɛɛbla wo nkpo? Nse osuɔtɔ owo ntabatenko ɔsɔfɔ lɛfɔ ninkple wo dibuo kplɛ di suoto.>>
11Nkpo oso Abimelek lakpee batii nwu bamuu kufiofa alɛ, <<Otii lele niɛbla osuɔtɔ wɔ mmle ee ɔsɔfɔ amumu, nwaako babalo nwɔ.>>
12Ni di Isak lapɛ asaa di kasɔ nwu nkpo suoto lɛɛlɛɛ nwu nkpo kamɛ nɛ, aafee asaa nwu nkpo lɛɛpɔ kamɛ, diekye Saate lawii nwɔ lɛyɔɔ. 13Osuɔtɔ wɔ mmle labakple saawɛntɛ, lɛsaawɛ nɔɔ kafɔɔ sitũ ko diatoofe dialaase di obe wɔ aabakple ni saawɛntɛ kplɛ. 14Aawɛ kafɔɔ bafoso, banankyue ku bakpɛmblatɛ kpinwu diata alɛ diabakple Filisti batii onunsɛɛ di suoto nɔɔ. 15Nioso ntu abiɔ ya amuu di ote bakpɛmblatɛ lakutu ni di obe wɔ di Abraham lawɛ ni nkpa, Filisti batii lakyɛ baalaakutu kɔtɛ baatĩi nya.
16Ninfɛ di Abimelek latɔkɔ Isak alɛ, <<Die wo kaasɔ fasifi; diekye fatoosii osie ɔwɛ olenkee wo.>>
17Nioso Isak ladie ninfa aasifi aalaapɛ akpaayo di Gerar ɔtaata kasɔ aasiɛ ninfa. 18Ni di Isak lakple aalaadiki ntu abiɔ ya baakutu ni di obe wɔ di ote Abraham lawɛ nii, di Filisti batii latĩi nya ni di ote Abraham kakpimaa. Ni aakple aata nya ayooto ya di ote lata nya ni nɛ.
19Isak bakpɛmblatɛ nɔɔ kafɔɔ lakutu ditubiɔ di ɔtaata nwu ni baatũ ntu biene nɛ. 20Kafɔɔ Gerar babɔkɛɛbakpatɛ labalɔnko Isak babɔkɛɛbakpatɛ baabuɛ alɛ, <<Ntu nwu nkpo nle wo dile!>> Nioso Isak latika ditubiɔ nwu leyooto alɛ, Esek,#26.20lɛsɔdiki ninle kalɔ diekye baalɔ ku nnwɔɔ. 21Ni baakple baakutu ditubiɔ bamba nɛ, kafɔɔ baakple baalɔ di nni nkpo suoto kafɔɔ. Nioso aatika ni leyooto alɛ Sitna.#26.21lɛsɔdiki ninle alɛ ɔtaka oyila di suoto 22Aadie ninfa aakple aalaakutu ditubiɔ bamba, nni nkpo kuonwii ditalɔ niini suoto. Ni aatika ni leyooto alɛ Rehobot,#26.22osuku ɔta aabuɛ alɛ, <<Nunua SAATE nwu ntɔɔta wo osuku alɛ dialɛ wo kaasɔ nwu suoto.>>
23Aadie ni ninfa, ni aasifi Beerseba nɛ. 24Kakyɛ nwu nkpo SAATE nwu ladiki suoto aatuo nwɔ, ni aabuɛ alɛ, <<Ami ninle teefɔ Abraham Yaa nwu nɛ. Tanyɛkɛ, diekye nsiko fɔ; kamawii fɔ lɛyɔɔ, nta banantii lɛfɔ kafɔɔ mpɔ ta kpɛmblatɛ nii Abraham oso.>>
25Nioso Isak lapɛ oleɔta akyikye ninfa ni aalɛɛ Saate leyooto ninfa nɛ. Ninfɛ aapɛ lɛkpaayo, ni di bakpɛmblatɛ nɔɔ lakutu ditubiɔ ninfa nɛ.
26Mmia kafɔɔ, Abimelek ku Ahusat otii wɔ ninka nwɔ nii ku Fikol wɔ niale nwɔ ni bakpɛtɛ kanyayilatɛ nɔɔfo, lakye Gerar baakyɛ Isak nfũ. 27Ninfɛ di Isak lakaalɛ ma alɛ, <<Be oso biɛwa mi ɔkyɛ, di obe wɔ biɛtaka bieyila mi ni di suoto bietososɛɛ ni?>>
28Ninfɛ baatɔkɔ nwɔ alɛ, <<Butɔɔnya buɔtɛ nsũ bulɛ Saate nsiko fɔ. Nioso buabuɛ bulɛ, <Dikpeni alɛ, buɔka bawo ntam.> Buonii kanya ku afɔ, 29alɛ flababla wo amumu, fɛ mmle okle di awoo butabla fɔ ni amumu, kafɔɔ bualolaa fɔ buaklee obe lele fiɛ buadiki fɔ ni osuku di atoko ɔkyɛ ole kamɛ. Nunua kamɛ ntɔɔkpa klekle alɛ Saate nwu ntoowii fɔ lɛyɔɔ.>>
30Nioso Isak lata baawa alesaa baatũ ma opunu, baale baanyi. 31Kaleesɛ ku kuyitatũ, baaka ntam baata baawo. Ni di Isak ladiki ma osuku, ni baasifi di atoko ɔkyɛ ole kamɛ nɛ.
32Dii nwu nkpo kale, Isak bakpɛmblatɛ nɔɔ lawa babatɔkɔ nwɔ ɔlaa di dibiɔ le baakutu ni alɛ, <<Butootũ ntu!>> 33Ninfɛ aatika ditubiɔ nwu leyooto alɛ Seba#26.33Seba lɛsɔdiki ninle ni alɛ, ntam ee akuɛnsĩ. nɛ. Nioso bɔɔlɛɛ okpoo nwu Beerseba #26.33lɛsɔdiki ninle atubiɔ ntam ee atubiɔ akuɛnsĩ bia miɛ nɛ.
34Obe wɔ di Esau lafũ ni alɛɛ afosi ana, ni aayɔ Hiti otii Beeri obisankobi Yudit ku Elon, Hiti otii obisankobi Basemat nɛ. 35Esau basɔfɔ ba mmle lata nkpa lawɛ osie diata Isak ku Rebeka.
Currently Selected:
Kyenesis 26: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
