Kyenesis 25
25
Abraham Banantii Bamba
1Abraham lakple aayɔ ɔsanko bamba, leyooto nɔɔ niale Ketura. 2Aalofo babi ba mmle aatɔɔ. Mma niale Simran, Yoksan, Medan, Midian, Isbak ku Sua. 3Yoksan lalofo Seba ku Dedan. Dedan banantii niale Asuri batii, Letusi batii ku Leumi batii. 4Midian babisuɔtɔbi niale Efa, Efer, Hanok, Abida ku Eldaa. Mma mmle bamuu niale Ketura banantii nɛ.
5Abraham layɔ lɛsaa biala niawɛ nwɔ ni aata Isak. 6Kafɔɔ obe wɔ aawɛ ni nkpa, aata ɔsɔnɔ nɔɔ babi atasaa, ni aatososa ma di Isak suoto aasifiko kufĩ katũnkɔ kasɔ suoto.
7Alɛɛ ya amuu di Abraham lafũ ni niale alɛɛ kɔlafa afosi akuɛnsĩ alɛɛ anɔɔ. 8Abraham labe aakpasɔ aafũ alɛɛ kpi fiɛ aakpi aasifi bawa nɔɔ anɛ nfũ. 9Babisuɔtɔbi nɔɔ Isak ku Ismael lakookaa nwɔ di Mekpela ofuɔntuu nwu niatɛɛtɛɛ ni Mamre, di Efron obisuɔtɔbi Sohar Hiti otii nwu kofe. 10Kofe ko di Abraham laya ni di Hiti otii nwu nfũ. Nfa baakookaa Abraham ku ɔsɔfɔ nɔɔ Sara nɛ. 11Di Abraham kakpimaa yi, Yaa lawii obi nɔɔ Isak lɛyɔɔ, aasiɛ di Beer Lahai Roi.
Nya Ismael Banantii Ninle Mma Mmle Nɛ.
12Nnya mma mmle ninle Ismael, Abraham obisuɔtɔbi wɔ di Egipte ɔsanko Hagar, Sara ɔlanle lalofo aata ni Abraham banantii nɛ.
13Nnya Ismael babisuɔtɔbi ayooto ninle n-ya mmle di mmle kanya baalofo ma ni nɛ. Nebaiot niale obi kasale, fiɛ di Kedar, Adbeel, Mibsam, 14Misma, Duma, Masa, 15Hadad, Tema, Yetur, Nafis ku Kedema. 16Mma mmle niale Ismael babisuɔtɔbi ku ayooto lɛma nɛ. Lefosi nfaabi nnyɔ baka baale, di nsiɛkɔ lɛma ku akpaayo lɛma mpɛkɔ kanya. 17Ismael labe aafũ alɛɛ kɔlafa afosi atiɛ alɛɛ akuɛnsĩ fiɛ aakpi aasifi bawa nɔɔ anɛ nfũ. 18Banantii nɔɔ lasiɛ diayɔ ni di Hawila ntɛɛ nwu dialaase di Sur, diɛtɛɛtɛɛ ni Egipte kɔmɛ diofe ni Asur. Baasiɛ nkpa yakayaka di babilɛma bamuu suoto.
Esau Ku Yakob Lelofo
19Nnya nle mmle ninle Isak, Abraham obisuɔtɔbi banantii ɔlaa nɛ.
Abraham lalofo Isak. 20Obe wɔ di Isak lafũ ni alɛɛ afosi ana ni aayɔ Rebeka, Betuel obisankobi nɛ, aale ni Aram otii wɔ niakye ni Padan Aram#25.20 Mosopotamia dile ni Laban ɔsankobilɛma.
21Isak lapɛ ɔlaa aata Saate di ɔsɔfɔ disi, diekye ɔlɛma aale. Ni di Saate nwu latũna nwɔ nɛ. Ni di ɔsɔfɔ Rebeka lalaka lɛmɛ nɛ. 22Babifɔɔle nwu latɔkpɛko bawo kaafutu, ni aabuɛ alɛ, <<Be oso di nle mmle kɔwa mi di suoto nkpo?>> Ni aakyɛ aalaawolaa kamɛ di Saate nfũ nɛ.
23Ni di Saate latɔkɔ nwɔ alɛ,
<<Nnle nnyɔ ninsi fɔ di olofofɔtɔ kamɛ.
batii banyɔ ba mmle niekye ni kamɛ lɛfɔ mabla baawo;
onwii kamawɛ osie anlenkee owo nɔɔ
ɔnɔɔfo le kafɔɔ kamasumu obisɔnle.>>
24Obe wɔ di obe lawo alɛ aalofo nii, atabi suɔtɔbi niasiɛ nwɔ di olofofɔtɔ. 25Ɔkasale wɔ niadie ni lasɛɛ bɔmbɔ, suoto nɔɔ simuu kafɔɔ late fɛle sinwini akpeele, nioso baatika nwɔ leyooto alɛ Esau. 26Nni kamaa, baalofo obilɛma aaklee Esau di lɛnankpo kpinkpi; nioso baatika nwɔ leyooto alɛ Yakob. Isak lafũ alɛɛ afosi akuɔ fiɛ di Rebeka lalofo ma.
27Obe wɔ di babi nwu nkpo labamuɔ nii, Esau labakple kpantɛ kplɛ, obe lele asi leepoo kamɛ. Kafɔɔ Yakob labla obi buɛɛ obe lele asi leeyo. 28Isak labɔmbɔ sina owee nioso aabɔmbɔ Esau, kafɔɔ Rebeka labɔmbɔ Yakob.
29Dii ninwii Yakob latɔɔwa alesaa, ni di Esau lakye lepoo kamɛ aawa, aatookpi kɔka. 30Ni aatɔkɔ Yakob alɛ, <<Pɛsɛwa faatikɛɛ alesaa sɛɛle lɛfɔ nwu awo nle! Kokpi kɔka!>> (Nkpo oso baakple baatɔɔlɛɛ nwɔ alɛ Edom#25.30 lɛsɔdiki ninle lɛsɛɛle nɛ.)
31Ninfɛ di Yakob latɔkɔ nwɔ alɛ, <<Sunsũ selofo nɔɔfo lɛfɔ fatɛɛ fiɛ.>>
32Ni di Esau labuɛ alɛ, <<Nnya okpi nfɛ kokpi nɛ, be ninle selofo nɔɔfo?>>
33Kafɔɔ Yakob labuɛ alɛ, <<Ka ntam fatɛɛ fiɛ.>> Nioso aaka ntam aatɔɔ, ni aasunsũ selofo nɔɔfo nɔɔ aata Yakob nɛ.
34Ninfɛ di Yakob latɔɔ kayoonkyɛɛ ku sũkũ aale nɛ. Ni aale, aanyi, ni aataka aasifi nɛ.
Nioso Esau ditabu selofo nɔɔfo nɔɔ.
Currently Selected:
Kyenesis 25: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
