Kyenesis 24
24
Isak Layɔ Rebeka
1Abraham labe aafũ alɛɛ kpi, Saate kafɔɔ lawii nwɔ lɛyɔɔ di asaa amuu suoto. 2Ninfɛ di Abraham latɔkɔ leyo nɔɔ kamɛ kpɛmblatɛ nɔɔfole, nnwɔ niayila nwɔ ni di asaa amuu kanya alɛ, <<Yɔ kɔnɛɛ lɛfɔ fatika mi di kutĩ#24.2 nle mmle kotuo ntam ɔka. 3Komiɛ nlɛ ka ntam fatɛɛ di Saate wɔ ninle ni osi ku kasɔ Yaa leyooto kamɛ falɛ, flabayɔ ɔsanko di Kanaan batii basankobi ba kamɛ nsi ni fata obisuɔtɔbi nii. 4Kafɔɔ fabakyɛ okpoo nii di ami omu batii nii kamɛ fanaayɔ ɔsanko ninfa fanta obi nii Isak.>>
5Ninfɛ di kpɛmblatɛ nwu lakaalɛ nwɔ alɛ, <<Ni nse ɔsanko nwu dilootuna alɛ ootikankoe anwa kasɔ ka mmle mɔ? Ni kakplesa obi lɛfɔ nwu nkyesee kasɔ ka fɛɛkye ni?>>
6Ninfɛ di Abraham latɔkɔ nwɔ alɛ, <<Nyu falɛ faakplesa obi nii fakyesee nfa.>> 7<<Saate Yaa di osi, nnwɔ niadiki mi ni di teemi leyo ku okpoo nii niakakatɛkoe aabuɛ aatɛ ku ami alɛ, <Banantii lɛfɔ mayɔ kasɔ ka mmle nta,> abakyesee Yaa tɔkyɛntɛ nɔɔ nleko fɔ katũ alɛ faawɛ ɔsanko ninfa fanta obi nii. 8Nse ɔsanko nwu dietuna alɛ ootikanko fɔ aan-wa yi, ni nnɛɛ lɛfɔ aku nkpaa lɛfɔ aku. Kafɔɔ tankplesa obi nii faakyesee nfa.>> 9Nioso kpɛmblatɛ nwu nkpo layɔ kɔnɛɛ nɔɔ aatika di saate nɔɔ Abraham kutĩ, ni aaka ntam aatɔɔ di ɔlaa wɔ mmle suoto nɛ.
10Ninfɛ di kpɛmblatɛ nwu nkpo layɔ saate nɔɔ Abraham kapu bapɔnkɔ lefosi ku asaa nɔɔ biene ate ate, ninfɛ aayefe osuku aasifi Mesopotamia di Nahor okpoo nɛ. 11Ninfɛ aata kapu bapɔnkɔ nwu nkpo lapɛ akunkyi di ditubiɔ ninwii ɔlɔɔkɔ di okpoo lɔɔkɔ nɛ. Kɔtɔɔfɔ diale, di obe wɔ di basanko nkyɛ ni katu.
12Ni aapɛ ɔlaa aata Yaa alɛ, <<Oo SAATE, saate nii Abraham Yaa, lekoto, ta diwa kaanya ditɛɛ miɛ wɔ mmle, faale saate nii Abraham sifutulɛ. 13Nyu, n-yɛ di ntu kataakɔ ka mmle ɔlɔɔkɔ, di okpoo wɔ mmle basanko kɔwa ni ntu odu. 14Ta diwa alɛ kakpeelebitɛ ka kamatɔkɔ nlɛ, <Lekoto tikɛɛ ntu nnyi>, ababuɛ ni alɛ, <Nyi, kamadu nta kapu bapɔnkɔ lɛfɔ kafɔɔ mannyi ni yi>- nnwɔɔ nimale ɔsanko wɔ feediki fɛɛta ni kpɛmblatɛ lɛfɔ Isak nɛ. Nle mmle nimatɛɛ ntofo nlɛ feele saate nii sifutulɛ nɛ.>>
15Fiɛ aaloo ni ɔlaa ɔpɛ ɔta Yaa, ni di Rebeka lakye aakyɔɔ aatika dibukii di nimuusi. Betuel obisankobi aale, nwɔ niale ni Abraham obilɛma suɔtɔbi Nahor ku ɔsɔfɔ nɔɔ Milka obi. 16Ɔsankobi nwu latɛ aalɛ sekpeele di osuɔtɔ kuonwii diitenko ni diidii. Ni aakyɛ ntu kataakɔ nwu aalaadu ntu ku dibukii nɔɔ aakple nɛ.
17Ninfɛ di kpɛmblatɛ nwu nkpo lapɛsɛwa aalaadu nwɔ ni aatɔkɔ nwɔ alɛ, <<Lekoto, tikɛɛ ntu kɛɛkɛ di dibukii lɛfɔ nwu kamɛ nnyi.>>
18Ni aatɔkɔ nwɔ alɛ, <<Saate nii, nyi.>> Ninfɛ aapɛsɛwa aasoosa dibukii nwu nkpo aaklee ninnɛɛ kamɛ aatɔɔ ntu aanyi nɛ.
19Obe wɔ aatɔɔ ntu aanyi aaloo nii, ni aabuɛ alɛ, <<Kamadu ntu nta kapu bapɔnkɔ lɛfɔ kafɔɔ mannyi, ninaase di obe wɔ di bamuu lɛma beeloo ni onyi.>> 20Nioso aapɛsɛwa aanyɛɛnɛ ntu bule aakpete di babɔkɛɛ ntu ninyinsaa kamɛ, ni aatoso aasifi ditubiɔ nwu aalaadu ntu aakyakaa nɛ. Nioso aadu ntu aata kapu bapɔnkɔ nɔɔ nwu bamuu. 21Kpɛmblatɛ nwu nkpo ditabuɛ ɔlaa kuonwii, aayila aatoonyu nwɔ alɛ, oonyu nse Saate nwu lɛta osuku nwu lɛlɛ nwɔ ɔkyɛ.
22Di obe wɔ di kapu bapɔnkɔ nwu ntooloo ni ntu onyi yi, ni di osuɔtɔ nwu ladiki koto sɛɛle onwu lɛkɔnii aakpee nwɔ di onwu, ni aayɔ koto sɛɛle nnɛɛtũ nkɔnii aakpee nwɔ nɛ. 23Ninfɛ aakaalɛ nwɔ alɛ, <<Owe obisankobi fale? Lekoto tɔkɔ mi, leyo nkpe di teefɔ leyo munko batii nii bubate ni kakyɛ ka mmle?>>
24Ninfɛ aatɔkɔ nwɔ alɛ, <<Betuel obisankobi nle, dile ni obisuɔtɔbi wɔ di Milka lalofo aata ni Nahor.>> 25Ni aabuɛ aakyakaa alɛ, <<Bukpe sɛsɔ ku babɔkɛɛ aku kpi diɛta kapu bapɔnkɔ lɛfɔ, ayo kafɔɔ nkpe biate nii.>>
26Ni di osuɔtɔ nwu lapɛ akunkyi aasumu Saate nɛ. 27Aabuɛ alɛ, <<Baatansa Saate, saate nii Abraham Yaa wɔ ninansĩ ni sifutulɛ ku onukwale nɔɔ odiki otuo saate Abraham. Diekye Saate nwu lɛkpaa mi ɛɛwako saate nii banantii nɔɔ nfũ.>>
28Ɔsankobi nwu latoso aalaatɔkɔ ɔya anɛ leyo kamɛ batii sɛlaa se mmle. 29Rebeka lawɛ obilɛma suɔtɔbi onwii baatɔɔlɛɛ ni Laban, ni aapɛsɛwa aadie aakyɛ osuɔtɔ nwu nfũ di ntu kataakɔ nwu katũ nɛ. 30Obe wɔ aanya ɔnya onwu lɛkɔnii ku nnɛɛtũ nkɔnii di obilɛma sankobi nnɛɛtũ, fiɛ aanu ɔlaa wɔ di Rebeka labuɛ alɛ osuɔtɔ nwu latɔkɔ nwɔ nii, ni aadie aakyɛ osuɔtɔ nwu nfũ aalaanyɔɔ ayɛ di kapu bapɔnkɔ nɔɔ nwu ɔlɔɔkɔ di ntu kataakɔ nwu katũ nɛ. 31Ni aatɔkɔ nwɔ alɛ, <<Wa, afɔ wɔ di Saate lewii ni lɛyɔɔ, be oso fayɛ kaayi ninfũ?>> Ntoololaa leyo lɛta fɔ ku lɛba kafɔɔ lɛta kapu bapɔnkɔ lɛfɔ.>>
32Nioso osuɔtɔ nwu lasifi leyo nwu, ninfɛ baatekete atoo di kapu bapɔnkɔ nwu suoto nɛ, ni baata ma sɛsɔ ku babɔkɛɛ aku baawee nɛ. Ni baakusii ntu baata Abraham kpɛmblatɛ nwu nkpo ku batii nɔɔ baafoto nkpaa nɛ. 33Ni baase ma alesaa alɛ bale nɛ; Kafɔɔ aabuɛ alɛ, <<Namale alesaa diɛlaase di obe wɔ ntoobuɛ lɛsaa le oso nkyɛ nii.>>
Ninfɛ di Laban labuɛ alɛ, <<Ni tɔkɔ woɛ.>>
34Ninfɛ aatɔkɔ ma alɛ, <<Abraham kpɛmblatɛ nle. 35Saate lewii saate nii Abraham lɛyɔɔ osie kanya atookple saawɛntɛ. Ɛtɔɔ bafoso ku banankyue, koto fututu ku koto sɛɛle, balanle sanko ku basuɔtɔ, kapubapɔnkɔ ku babɔkɛɛ ba nintuka ni atoo. 36Saate nii ɔsɔfɔ Sara lalofo obisuɔtɔbi aatɔɔ di obe wɔ atoobe ɛɛkpasɔ nii, ni ɛɛyɔ atesaa nɔɔ amuu ɛɛta obi nɛ. 37Ninfɛ di saate nii latɛɛ laka ntam labuɛ nlɛ, <<Flabayɔ ɔsanko fata obisuɔtɔbi nii di Kanaan batii basankobi kamɛ, batii ba kasɔ nsi nii. 38Tɔɔkyɛ teemi leyo kamɛ di kafaabi nii kamɛ, falaayɔ ɔsanko ninfa fata obisuɔtɔbi nii.>
39<<Ninfɛ lakaalɛ saate nii nlɛ, <Ni nse ɔsanko nwu dietũna alɛ ootikankoe anwa mɔ?>
40<<Ni aadiki kanya alɛ, <Saate wɔ anu ntɔɔkyɛ nii, kamakyesee fɔ Yaa tɔkyɛntɛ nɔɔ anta osuku nwu ɔkyɛ nlɛ kunta fɔ. Alɛ faawɛ ɔsanko fanta obisuɔtɔbi nii di ami omu kafaabi di teemi leyo kamɛ. 41Ni nse fɛɛkyɛ kafaabi nii kamɛ ni fatoodie di ntam be fɛɛka fɛɛtɛɛ nii, nse kuntɛ beesĩ ɔsanko nwu nkpo ɔyɔ ɔta fɔ yi, ni fatoodie di ntam nwu fɛɛka fɛɛtɛɛ ni kamɛ.>
42<<Nioso obe wɔ lɛwa ni ntu kataakɔ nwu katũ miɛ, ni lɛpɛ ɔlaa lɛta Yaa lebuɛ nlɛ, <O Saate, afɔ ninle saate nii Abraham Yaa, nse dilɛfɔ, lekoto faata osuku wɔ nkyɛ ni kulɛ kutɛɛ. 43Nya n-yɛ ninfũ di ntu kataakɔ ka mmle katũ, nse kakpelebitɛ lɛwa ntu odu lɛtɔkɔ nwɔ nlɛ, <<Lekoto tikɛɛ ntu kɛɛkɛ di dibukii lɛfɔ nnyi>> yi, 44nse ɛɛtɔkɔ mi alɛ, <<Nyi, kamadu kafɔɔ nta kapu bapɔnkɔ lɛfɔ kafɔɔ mannyi>> yi, ni faatɔɔ ale nnwɔ di Saate lediki ɛɛta ni saate nii obisuɔtɔbi.>
45<<Fiɛ laloo ni ɔlaa ɔpɛ ɔta Yaa di otu nii kamɛ, ni di Rebeka lakyɔɔ aatika dibukii di nimuusi. Ni aasifi ntu kataakɔ nwu katũ aalaadu ntu nɛ. Ni latɔkɔ nwɔ nlɛ, <Lekoto tikɛɛ ntu nnyi.> 46<<Nfanwu, ni aasoosa dibukii nwu aabuɛ alɛ, <Nyi, kamadu ntu nwu nta kapu bapɔnkɔ lɛfɔ kafɔɔ mannyi.> Nioso lanyi, ni aadu ntu nwu kafɔɔ aata kapu bapɔnkɔ nwu nɛ.
47Ninfɛ lakaalɛ nwɔ nlɛ, <Owe obisankobi fale?>
<Ni aatɔkɔ mi alɛ, Betuel, obisuɔtɔbi wɔ di Milka lalofo aata ni Nahor obisankobi nle.>
Ninfɛ layɔ lɛkɔnii lasaka nwɔ di onwu, layɔ nnɛɛtũ nkɔnii kafɔɔ lakpee nwɔ di nnɛɛtũ nɛ. 48Ninfɛ lapɛ akunkyi kaasɔ lasũmu SAATE nɛ. Latansa SAATE nwu, saate nii Abraham Yaa wɔ nialeko mi ni katũ di osuku biene suoto lɛwɛ saate nii obilɛma suɔtɔbi ɔwa sankobi lɛta ni obisuɔtɔbi nɔɔ. 49Nioso nunua nse bibale saate nii sifutulɛ minle onukwale mintɔɔ yi, ni biɛtɔkɔ mi. Nse bilootuna kafɔɔ yi, biɛtɔkɔ mi, nintofo mmle nfɛ kabla ni.>>
50Ninfɛ di Laban ku Betuel labuɛ alɛ, <<Ɔlaa wɔ mmle Saate nfũ kuokye; nioso ɔlaa kuonwii nnaa wo buabuɛ nii. 51Nyu lo, nnya Rebeka nin-yɛ nɛ, kpaa nwɔ fasifiko aalaayɔ saate lɛfɔ obisuɔtɔbi fɛ mmle okle di Saate lebuɛ ni.
52Di obe wɔ di Abraham kpɛmblatɛ lanu ɔlaa wɔ baabuɛ nii, ni aapɛ akunkyi di Saate anu nɛ. 53Ninfɛ di kpɛmblatɛ nwu nkpo ladiki koto sɛɛle ku koto fututu anyɛnɛ ku abula ya niafũ ni kɔya aata Rebeka nɛ. Ninfɛ aayɔ asaa ya niafũ ni kɔya aata obilɛma suɔtɔbi ku ɔya kafɔɔ nɛ. 54Mmia nfɛ di Abraham kpɛmblatɛ nwu nkpo ku basuɔtɔ ba niakyɛ ni lale alesaa baanyi, ni baate ninfa kale lasɛ nɛ.
Obe wɔ baataka ni ku olesɛ, ni aabuɛ alɛ, <<Bidiki mi osuku nintɔɔkyɛ saate nii nfũ.>>
55Ninfɛ di Rebeka obilɛma suɔtɔbi ku ɔya labuɛ alɛ, <<Bitɔɔ asiɛ di ɔkyɛ loo fɛ ayi lefosi fiɛ aasifi.>>
56Kafɔɔ aatɔkɔ ma alɛ, <<Bitanfũ mi biasiɛsa ninfũ di obe wɔ di Saate ntɔɔta osuku lɛlɛ mi ni ɔkyɛ. Bidiki mi osuku nintɔɔkyɛ saate nii nfũ.>>
57Ninfɛ baabuɛ alɛ, <<Bita bulɛɛ ɔsankobi nwu nkpo buɔkaalɛ nwɔ nwu.>> 58Nioso baalɛɛ Rebeka ni baakaalɛ nwɔ alɛ, <<Footikanko osuɔtɔ nwu fansifi?>>
Ni aabuɛ alɛ, <<Yii kosifi.>>
59Nioso baadiki obilɛma sankobi Rebeka osuku aasifi ku ɔsanko wɔ nianyu nwɔ ni ku sibisɔ ku Abraham kpɛmblatɛ nwu ku basuɔtɔ nwu baasifi. 60Ninfɛ baawii Rebeka lɛyɔɔ baabuɛ alɛ,
<<Obi loo sankobi Rebeka, lofo fase, faasaa fase
di nkpe kamɛ;
di babi lɛfɔ bafũ
balo lɛma nsɔ babla nle ma.>>
61Ninfɛ di Rebeka ku ɔsanko kpɛmblatɛ nɔɔ lalolaa suoto baasiɛ kapu bapɔnkɔ lɛma baasifi ku basuɔtɔ nwu nkpo nɛ. Nioso kpɛmblatɛ nwu nkpo lakpaa Rebeka aasifiko.
62Di obe nwu Isak lakye Beer Lahai Roi ditubiɔ katũ aawa, diekye aasiɛ di Kanaan nkpaalɔ kasɔ. 63Dii ninwii kɔtɔɔfɔ Isak ladie aasifi lepoo alɛ ɔɔlaabu sɛlaa sewo disi. Obe wɔ aatakatɛsa anu aanyu nii, aanya kapu bapɔnkɔ kɔwa. 64Rebeka kafɔɔ latakatɛsa anu aanyu ni aanya Isak nɛ. Ni aasoo di kapu pɔnkɔ nɔɔ suoto nɛ. 65Ni aakaalɛ Abraham kpɛmblatɛ nwu alɛ, <<Owe ninle osuɔtɔ nwu ninkye lepoo ɔɔwa wo ni ɔkyakako?>>
Ninfɛ di kpɛmblatɛ nwu latɔkɔ nwɔ alɛ, <<Saate nii dile. <<Nioso aayɔ anuditĩisaa aatĩi anu.
66Ninfɛ di kpɛmblatɛ nwu latɔkɔ Isak lɛsaa biala le aabla ni nɛ. 67Nioso Isak lakpaa nwɔ aasifiko ɔya Sara lɛkpaayo kamɛ, ni aayɔ Rebeka aakple nwɔ ɔsɔfɔ nɛ. Aabɔmbɔ nwɔ kafɔɔ nɛ. Nioso Isak otu nfɛ labate di ɔya kukpi suoto.
Currently Selected:
Kyenesis 24: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
