ESODƆS 8
8
1Ninfɛ di SAATE nwu latɔkɔ Mose alɛ, “Tɔɔkyɛ Farao nfũ faalatɔkɔ nwɔ falɛ, ‘Nnya ɔlaa wɔ di SAATE nwu kobuɛ ni: Ta batii nii basifi, baalaasumu mi. 2Nse feesĩ ma ɔta osifi, ni kamata basua ndie mafũ kale lɛfɔ ka mmle kamuu. 3Basua kamayii Nile okle nwu kamɛ. babadie ninfa manwa leyo lɛfɔ, mambuo leyo tenle lɛfɔ kamɛ, mantika di atensaa lɛfɔ suoto, mambuo di banɔɔfotii lɛfɔ ayo kamɛ ku batii lɛfɔ ayo kamɛ. babayefe mambuo di bloblo nfiɛkɔ lee ku nnaafũ lee nkpetekɔ. 4Basua nwu kamatɔɔkakatafɔ ku batii lɛfɔ ku banɔɔfotii lɛfɔ bamuu.’”
5Ninfɛ di SAATE nwu latɔkɔ Mose alɛ, “Tɔkɔ Aron falɛ, ‘Yɔ ɔkyɛnwoso lɛfɔ faklee kɔɔnɛɛ fakyɔɔ di seklemii ku situkplo ku apanta faata basua badie bawa Egipte kasɔ suoto.’”
6Nioso Aron layɔ kɔnɛɛ nɔɔ aakyɔɔ di Egipte ntu mmuu suoto, ni di basua ladie baawa babatĩi kasɔ nwu nɛ. 7Kafɔɔ bafablatɛ lɛma nwu nkpo lawa baababla nnya nkpo nwu okle di lewofa lɛma sɛsaabla kamɛ, mma kafɔɔ baabla basua ladie baawa Egipte kasɔ suoto.
8Ninfɛ di Farao lakpee baalɛɛ Mose ku Aron baatɔɔ ni aatɔkɔ ma alɛ, “Bipɛ ɔlaa bita SAATE nwu aata basua nwu badie di ami ku batii nii nfũ basifi, ni kamata batii lɛfɔ nwu nsifi manaata ole manta SAATE nwu.”
9Ninfɛ di Mose latɔkɔ Farao alɛ, “Afɔ tɛɛ obe wɔ foomiɛ falɛ mpɛ ɔlaa nta ni afɔ ku banɔɔfotii lɛfɔ ku batii lɛfɔ alɛ basua nwu kadie ni di afɔ ku batii lɛfɔ ayo, diediki mba ninsi ni di Nile okle kamɛ ninamadie.”
10Ninfɛ di Farao latɔkɔ nwɔ alɛ, “Kɔsɛɛ.”
Mose latɔkɔ nwɔ alɛ, “Dibawa kaanya ninta fɔ fɛ mmle okle fɛɛkaalɛ nii, ni fabatofo falɛ otii kuonwii nsinnaa fɛle SAATE Yaa loo nɛ. 11Basua nwu nkpo kamadie di ɔkyɛlɛ fɔ ku ayo lee, babadie di banɔɔfotii lɛfɔ ku batii lɛfɔ nfũ; kafɔɔ babakple mansiɛ di Nile okle kamɛ.”
12Obe wɔ di Mose ku Aron ladie di Farao nfũ baasifi nii, Mose lapɛ ɔlaa aata SAATE nwu di basua nwu aata baawa ni di Farao suoto. 13Ninfɛ di SAATE nwu labla fɛ mmle okle di Mose lakaalɛ ni nɛ. Nioso basua nwu di ayo, nflɔnkɔ ku afe lakpi. 14Baasiisa ma akudi akudi abinte diata alɛ kasɔ nwu kamuu latokpete osie kanya. 15Kafɔɔ obe wɔ di Farao lanya alɛ ditodiyɔɔ ni kɛɛkɛ, ni aakple aawɛnsa otu nɔɔ osie nɛ. Atanu Mose ku Aron ɔlaa fɛ mmle okle di SAATE nwu labuɛ nii.
Dibuo Tiɛfa: Kunikĩtĩ Layii Egipte Kasɔ Kamuu
16Ninfɛ di SAATE nwu latɔkɔ Mose alɛ, “Tɔkɔ Aron falɛ, ‘Yɔ ɔkyɛnwoso lɛfɔ fapɛ kudu kaasɔ,’ ni di Egipte kasɔ kamuu suoto yi, kudu makple kunikĩtĩ.” 17Baabla nkpo, di obe wɔ di Aron layɔ ɔkyɛnwoso nɔɔ di kɔnɛɛ aapɛ ni kudu kaasɔ yi, ni di kunikĩtĩ ladie kuayii batii ku babɔkɛɛ suoto nɛ. Kudu kumuu di Egipte kasɔ suoto lakple kunikĩtĩ. 18Kafɔɔ obe wɔ di Egipte bafablatɛ lamiɛ alɛ bɔɔbla ni kunikĩtĩ di lewofa lɛma sɛsaabla kamɛ yi, batafuo ɔbla. Kunikĩtĩ nwu layii batii ku babɔkɛɛ suoto baatoonyi ma.
19Ninfɛ di bafablatɛ nwu latɔkɔ Farao alɛ, “Nle mmle Yaa kɔnɛɛ ɔsaabla kule.” Kafɔɔ Farao otu lakple kuawɛ osie atanu ɔlaa, fɛ mmle okle di SAATE nwu labuɛ nii.
Dibuo Naafa: Basunsũ Lafũ Egipte Kasɔ Kamuu
20Ninfɛ di SAATE nwu latɔkɔ Mose alɛ, “Taka kɔsɛɛ ku kolesɛtũ faakyɛ flakyakako Farao di obe wɔ oofe ni okle katũ faatɔkɔ nwɔ falɛ, ‘Nnya ɔlaa wɔ di SAATE nwu kobuɛ ni alɛ: Ta batii nii basifi baalaasũmu mi. 21Nse faata batii nii basifi, ni kamata basunsũ sɛlambu nwa fɔ di suoto ku banɔɔfotii lɛfɔ suoto, manwa di batii lɛfɔ suoto ku ayo lɛma kamɛ. Basunsũ nwu kamayii Egipte batii ayo, bia ku kasɔ ka suoto basi nii.
22“‘Kafɔɔ di dii nwu nkpo kale, kamadiki Gosen kaamɛ nfũ di batii nii nsi nii; basunsũ ɔlambu kuonwii dilabakyɛ nfa. Ni fabatofo falɛ ami SAATE nwu nsi kaasɔ ka mmle nɛ. 23Kamakpee kasɛ di batii nii ku batii lɛfɔ ntɛɛ. Ɔsaabla wɔ niɛbla ni ɔkpɛ kamakye kasɔ kɔsɛɛ.’”
24Nioso SAATE nwu labla nle mmle. Basunsũ ɔlambu kplɛ kplɛ onwii lawa di Farao leyo ku banɔɔfotii nɔɔ ayo. Egipte kasɔ kamuu layii pɔ ku basunsũ.
25Ninfɛ di Farao lakpee baalɛɛ Mose ku Aron baatɔɔ ni aatɔkɔ ma alɛ, “Bitɔɔkyɛ biɛlaata ole bita Yaa lee di Egipte kasɔ ka mmle suoto.”
26Kafɔɔ Mose labuɛ alɛ, “Nni nkpo dilabalɛ. Diekye oleɔta wɔ bubata ni SAATE Yaa loo yi, dibakpɛ Egipte batii oyududu. Nse buɔta oleɔta wɔ ninkɔkpɛ ni oyududu di anu lɛma, blɔbasafɔ wo afuɔ? 27Dikpeni buɔkyɛ ayi atiɛ osuku di ɔfaafuu kamɛ, fiɛ buɔta ole buɔta SAATE Yaa loo, fɛ mmle eekpee wo ni kufiofa.”
28Ninfɛ di Farao labuɛ alɛ, “Kamata ye osuku minsifi minaata ole minta SAATE Yaa lee nwu di ɔfaafuu kamɛ, kafɔɔ bitankyɛ kakyonkɔ. Nunua bipɛ ɔlaa bitɛɛ nfɛ.”
29Ninfɛ di Mose ladiki kanya alɛ, “Nse lɛnya ledie di ɔkyɛ lɛfɔ lesifi kamaa, kamapɛ ɔlaa nta SAATE nwu, ni kɔsɛɛ basunsũ ɔlambu nwu madie di Farao ku banɔɔfotii nɔɔ ku batii nɔɔ nfũ. Farao lolaa fanyu falɛ faasinkyɔnkyɔ wo alɛ, faata batii nwu nkpo basifi balaata ole bata SAATE nwu nkpo.”
30Ninfɛ di Mose ladie di Farao nfũ aasifi aalaapɛ ɔlaa aata SAATE nwu nɛ. 31Ninfɛ di SAATE nwu labla di ɔlaa wɔ di Mose labuɛ ni suoto nɛ. Ni di basunsũ nwu ladie di Farao ku banɔɔfotii nɔɔ ku batii nɔɔ nfũ baasifi nɛ; bia sunsũ onwii ditabu. 32Di obe wɔ mmle kafɔɔ Farao lakple aawɛnsa otu nɔɔ osie aasĩ, atata batii nwu lasifi.
Currently Selected:
ESODƆS 8: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
