ESODƆS 9
9
Dibuo Nɔɔnle: Babɔkɛɛ Sele Labuo Sifiɛ
1Ninfɛ di SAATE nwu latɔkɔ Mose alɛ, “Tɔɔkyɛ Farao nfũ faalaatɔkɔ nwɔ falɛ, ‘Nnya ɔlaa wɔ di SAATE, Hebri batii Yaa nwu kobuɛ ni alɛ, “Ta batii nii basifi baalaasumu mi.” 2Nse feesĩ ma ɔta osifi, feemufũ ma feesiɛsa, 3SAATE nwu kɔnɛɛ siene mata dibuo kplɛ kplɛ nwa di babɔkɛɛ sele lee suoto, mba ninkpe ni laafe ku mba ninkpe ni laayo, di bapɔnkɔ ku babɔkɛɛ ba nintuka ni atoo ku kapu bapɔnkɔ ku banankyue ku bafoso ku batie lee suoto. 4Kafɔɔ SAATE nwu makpee kasɛ di Israel batii babɔkɛɛ sele suoto ku Egipte batii bale kamɛ alɛ, babɔkɛɛ ba ninle ni Israel batii bale dilabakpi.’”
5SAATE nwu latɛ obe aabuɛ alɛ, “Kɔsɛɛ SAATE nwu mabla nle mmle di kasɔ nwu suoto.” 6Kaleesɛ SAATE nwu labla ninkpo. Egipte batii babɔkɛɛ sele bamuu lakpi, kafɔɔ babɔkɛɛ ba niale ni Israel batii bale kuonwii ditakpi. 7Farao lakpee batii nɔɔ baalaawolaa kamɛ baanya alɛ Israel batii babɔkɛɛ bia onwii ditakpi. Kafɔɔ otu nɔɔ lakple kuawɛ osie atatuna alɛ ɔɔta batii nwu nkpo nsifi.
Dibuo Kuɔnle: Adiesaa Ladie Batii Ku Babɔkɛɛ.
8Ninfɛ di SAATE nwu latɔkɔ Mose ku Aron alɛ, “Bibla akyikye kamɛ ntɔ nnɛɛ pɔ, di Mose ayɔ awii di kɔfɛɛfɔ kamɛ di Farao anu. 9Dibakple kɔtɛ muɛmuɛ di Egipte kasɔ kamuu suoto ninta adiesaa ndie di batii ku babɔkɛɛ suoto di kasɔ nwu kamuu suoto.”
10Nioso baabla akyikye kamɛ ntɔ ni baalaayila di Farao anu nɛ. Mose layɔ mi aawii kɔɔfɛɛfɔ kamɛ, ni diata adiesaa ladie di batii ku babɔkɛɛ suoto nɛ. 11Bafablatɛ lɛma ditafuo oyila di Mose anu ta adiesaa ya niadie ma ni di suoto ku Egipte batii bamuu suoto oso. 12Kafɔɔ SAATE nwu lawɛnsa Farao otu osie, atanu Mose ku Aron ɔlaa, fɛ mmle okle di SAATE nwu latɔkɔ ni Mose.
Dibuo Kuɛnsinle: Atubakanii Lakpa.
13Ninfɛ di SAATE nwu latɔkɔ Mose alɛ, “Taka ku kolesɛtũ faalaadiki fatɔkɔ Farao falɛ, ‘Nnya ɔlaa wɔ di SAATE nwu, Hebri batii Yaa nwu kobuɛ ni alɛ: Ta batii nii basifi alɛ baalaasumu mi. 14Nse diele nkpo di obe wɔ mmle kamɛ, kamata dibuo nii nimu nwa fɔ di suoto ku banɔɔfotii lɛfɔ suoto ku batii lɛfɔ suoto, ni fabatofo falɛ otii kuonwii nsinnaa fɛ ami di kayi ka mmle kamɛ nɛ. 15Nse di obe wɔ mmle kamɛ kafuo kɔnɛɛ nii odiki ɔpɛ afɔ ku batii lɛfɔ ku dibuo le nimawɔɔsa ye ni kaayi ka mmle kamɛ. 16Kafɔɔ lediɛfɔ ta disi tikasaa le mmle oso, alɛ kadiki osie nii ntuofɔ mmle okle di leyooto nii kakyaka ni kayi kamuu. 17Kafɔɔ feekple fɛɛtaka fayɛ di batii nii suoto feesĩ falɛ flɔɔta ma basifi. 18Ta nkpo oso, kɔsɛɛ naakpa okle kamakyesee atubakanii ya ninkpe ni osie anayikpa ni diidii di Egipte kasɔ suoto diɛyɔ di obe wɔ beebudi nwu nii. 19Nioso kpee baalaakpaa babɔkɛɛ lɛfɔ ku lɛsaabiala le ninkpe fɔ ni di kofe bawako leyo, diekye atubakanii nwu nkpo makpa ankpete di otii biala ku babɔkɛɛ biala manankpaa bawako ni, beekple bakpe ni di afe, ni babakpi.’”
20Nioso Farao banɔɔfotii ba niayɛkɛ ni SAATE nwu ɔlaa lapɛsɛwa baalaakpaa balanle lɛma ku babɔkɛɛ lɛma baawako leyo. 21Kafɔɔ mba niasĩ ni SAATE nwu ɔlaa ladiɛ balanle lɛma ku babɔkɛɛ lɛma di afe.
22Ninfɛ di SAATE nwu latɔkɔ Mose alɛ, “Takatɛsa kɔnɛɛ lɛfɔ fakyɔɔ osi di atubakanii akpa ayii Egipte kasɔ suoto di batii ku babɔkɛɛ ku lɛsaa biala le ninkpe ni di Egipte afe suoto.” 23Di obe wɔ di Mose latakatɛsa ɔkyɛnwoso nɔɔ aakyɔɔ ni osi yi, ni di SAATE nwu lakyesee kanto dikpududuu ku atubakanii nɛ. Ni di ɔplalaa lamunaa kuawa kasɔ suoto nɛ. Nioso SAATE nwu lata atubakanii lakpa aakpete di Egipte kasɔ nwu suoto. 24Atubakanii lakpa ni di ɔplalaa kafɔɔ lamunaa kuatoofe katoo ku kala nɛ. Diale atubakanii afɛɛfɔ ya niakpɛ ni kaasɔ nwu kamuu suoto, diidii anadikpɛ ni di Egipte lakple ni kale. 25Di Egipte kasɔ nwu kamuu suoto, atubakani lalalaasa lɛsaa biala di afe, batii ku babɔkɛɛ bamuu; aakpa aalalaasa lɛsaa biala niayila ni kaasɔ suoto bia awoso, laakpa nwu. 26Lɛba le lete di atubakanii nwu nkpo ditalalaasa ni niale Gosen kasɔ, nfũ di Israel batii lasiɛ nii.
27Ninfɛ di Farao lakpee baalɛɛ Mose ku Aron baatɔɔ nɛ. Ni aabuɛ aatɔkɔ ma alɛ, “Di obe wɔ mmle kamɛ lefũ lekpee nlɛ ntɔɔbla okpile. SAATE nwu ole nkpe, munko batii nii ole nnaa. 28Ditootuudi wo nfɛ, pɛ ɔlaa fata SAATE nwu aadiɛ kanto dikpududuu ku atubakanii nwu ɔkpa okpete wo. Nfɛ kamata ye minsifi, bilɔbasinsiɛ ninfũ.”
29Ninfɛ di Mose latɔkɔ nwɔ alɛ, “Obe be ledie di okpoo nwu lesifi, kamakplesa nnɛɛ katoo mpɛ ɔlaa nta SAATE nwu, ni kanto dikpududuu nwu madiɛ, atubakani nwu kafɔɔ madiɛ ɔkpa. Ni fabatofo falɛ SAATE nwu nimba kasɔ nɛ. 30Kafɔɔ n-ye nlɛ, bia nua minko banɔɔfotii lɛfɔ bilɔɔyɛkɛ SAATE, Yaa nwu.”
31Seleteku ku kamɔɔ lalalaa, diekye kamɔɔ lasɛɛ, seleteku kafɔɔ lalakpee atoto. 32Kafɔɔ akpaa ku atita ditalalaa, diekye nnya aakpi kamaa.
33Nioso Mose lakyɛ di Farao nfũ aasifi aadie di okpoo nwu. Ni aakplesa nnɛɛ nɔɔ katoo aapɛ ɔlaa aata SAATE nwu nɛ. Ni di kanto dikpududuu nwu ku atubakanii kafɔɔ ɔkpa ladiɛ nɛ. Kanto kafɔɔ ladiɛ ɔnɔɔ okpete kaasɔ. 34Obe wɔ di Farao lanya alɛ kanto ku atubakanii ku kanto dikpududuu ladiɛ nii, ni aakple aabla okpile nɛ. Nnwɔɔ ku banɔɔfotii nɔɔ lakple baawɛnsa situ lɛma osie. 35Nioso Farao otu lakple kuawɛ osie, nioso atata Israel batii lasifi, fɛ mmle okle di SAATE nwu labuɛ aafenko ni di Mose suoto.
Currently Selected:
ESODƆS 9: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
