ESODƆS 37
37
Kanya Ninii Lɛlakaa Nwu Owola
1Ninfɛ di Besalel layɔ akesia kowoso aawola kanya ninii lɛlakaa nwu nkpo nɛ. Lɛkaana labla nkpaa ntiɛ anɛɛkpa anaasĩ. Lɛblɛfɛ labla nkpaa nnyɔ anɛɛkpa atiɛ, lɛtaka kafɔɔ labla nkpaa nnyɔ anɛɛkpa atiɛ. 2Ninfɛ aayɔ koto sɛɛle nwaa aatĩi kamɛ ku kayi nɛ. Ni aaloso koto sɛɛle aatika di katĩita nwu atokosi aakyisa nɛ. 3Ni aabla koto sɛɛle nkɔnii nna aakaasa di nkpaa nna nwu kasekɔ nɛ. Nkɔnii nnyɔ lawɛ di kakyɛ kanwii, ni di nkɔnii nnyɔ kafɔɔ lawɛ di kakyɛ nyɔɔfa nɛ. 4Ni aayɔ akesia kowoso aawola sewoso kyɔlɔlɔɔ, aayɔ koto sɛɛle aatĩi sĩ nɛ. 5Ni aayɔ sewoso kyɔlɔlɔɔ nwu nkpo aatũ di nkɔnii nwu nkpo kamɛ di lɛlakaa nwu suoto di kakyɛ biala mmle baatɔɔkɛnkɛ nini nɛ. 6Ni aayɔ koto sɛɛle nwaa aabla lɛlakaa nwu katĩita nɛ. Lɛkaana labla nkpaa nnyɔ ku anɛɛkpa anaasĩ, lɛblɛfɛ kafɔɔ labla nkpaa nnyɔ ku anɛɛkpa atiɛ. 7Ni aayɔ koto sɛɛle aabla bakerubim banyɔ aatika di katĩita nwu suoto disi le ku disi le nɛ. 8Ni aabla babɔkɛɛ nwu bɔɔlɛɛ ni kerubim nwu diisi le ku disi le nɛ. Kafɔɔ koto sɛɛle ko aayɔ aabla ni bakerubim nwu nkpo banyɔ lakya di katĩita nwu suoto. 9Bakerubim nwu nkpo lamunikĩisa anu baakyɔɔ bawo, baatakatɛsa afoko lɛma baakyɔɔ osi, kunyii lɛma latĩi katĩta nwu nkpo, anu lɛma kafɔɔ latoonyu katĩita nwu nkpo.
Besalel Labla Bloblo Klekle Opunu
10Baayɔ akesia kowoso baawola opunu, lɛkaana labla nkpaa ntiɛ, lɛblɛfɛ kafɔɔ labla kɔpaa kunwii anɛɛkpa akuɔ, lɛtaka ninwu kafɔɔ labla nkpaa nnyɔ ku anɛɛkpa atiɛ. 11Baayɔ koto sɛɛle nwaa batii nwu, baaloso koto sɛɛle baakpee nwu baakyisa. 12Baatika nwu atokosi lɛblɛfɛ diabla anɛɛkpa atiɛ, baaloso koto sɛɛle baatika di atokosi nwu. 13Baabla koto sɛɛle nkɔnii nna baakaasa di nfũ di opunu nwu nkpaa nkpe ni. 14Nkɔnii nwu nkpo lakaako opunu nwu nkpo atokosi diamufũ sewoso se babayɔ mankpee mantɔɔkɛnkɛ nwu ni. 15Baawola akesia sewoso kyɔlɔlɔɔ, baayɔ koto sɛɛle batĩi sĩ, babayɔ mankpee mantɔɔkɛnkɛ ni opunu nwu. 16Baayɔ koto sɛɛle nwaa baabla akpɛnsaa ya babatɔɔblako ni ɔkpɛ di opunu nwu suoto-babɛɛsitɛnklɛ ku akaku ku sipũ ku kukuukui babatɔɔnyɛɛnɛ ni asaaɔta nta kaamɛ.
Baabla Kandiɛ Ditikasaa Nwu
17Baayɔ koto sɛɛle nwaa leboo baawola kandiɛ ditikasaa nwu badiki kaamɛ, kalɔ nɔɔ ku ntɛɛ kawesee nwu. Nnɔnyi akpetesaa ku atoto ku atoto ya nikofukuti ni ku sekpeele, baawola nya baadiki di koto sɛɛle leboo nwu kamɛ. 18Ɛkpaalɛ ekuɔ niakaa di kandiɛ ditikasaa kawesee nwu suoto. Ɛkpaalɛ etiɛ di kakyɛ kanwii, ɛkpaalɛ etiɛ kafɔɔ di kakyɛ nyɔɔfa. 19Ɛkpaalɛ ekuɔ nwu nkpo lawɛ kandiɛ ditikasaa labla ni epũ ɛna, baabla nya ni fɛ almond kowoso atoto ku atoto ya nikofukuti nii kakyɛ ka ku kakyɛ ka. 20Di kandiɛ ditikasaa nwu suoto yi, baabla epũ ɛna ninte ni fɛ almond kowoso atoto ku atoto ya nikofukiti nii. 21Di kandiɛ ditikasaa kowesee nwu suoto kakyɛka ku kakyɛka kalɔ yi, almond kowoso letoto lakaa di dibiala suoto. 22Atoto nwu nkpo ku kowesee nwu ku ntɛɛ kawesee nwu, baawola nya baadiki di koto sɛɛle nwaa leboo ninwii kamɛ. 23Baayɔ koto sɛɛle nwaa baabla bakandiɛ bakuɛnsĩ ku bakandiɛ sikũ dibudisaa ku babɛɛsi bɛnkɛɛ. 24Baayɔ koto sɛɛle nwaa ko di onutũ ni kũ lewo ni bakiloo afosi atiɛ bakiloo banɔɔ baabla kandiɛ ditikasaa nwu ku asaa bule ninya.
Besalel Latofo Oleɔta Akyikye Ya Baafiɛ Ni Olufii
25Ni baayɔ akesia kowoso baabla olufui oleɔta akyikye nɛ. Asi nwu ana lakyɛkyɛ, lɛkaana labla kɔkpaa kunwii anɛɛkpa akuɔ. Lɛblɛfɛ kafɔɔ kɔkpaa kunwii anɛɛkpa akuɔ. Lɛtaka kafɔɔ labla nkpaa ntiɛ. Akyɛɛ layila di asi nwu ana, baawola nya badiki di kowoso kunwii suoto. 26Baayɔ koto sɛɛle nwaa batĩi nya osi ku sɛlɔɔkɔ bakyisa ku akyɛɛ nwu. Baabla koto sɛɛle batika di atokosi bakyisa. 27Baabla nkɔnii nnyɔ nnyɔ baakaasa di oleɔta akyikye nwu kakyɛka ku kakyɛka di koto sɛɛle nwu baatika ni atokosi kalɔ, babayɔ sewoso mankpee mantootuka ni nii. 28Baayɔ akesia kowoso bawola sewoso nwu, baayɔ koto sɛɛle baatĩi sĩ.
29Baabla kafɔɔ ɔfɔɔ ɔpɛ nnɔnyi klekle nwu ku olufui nwaa kɔnɔkɔnɔ, di nnɔnyi kɔnɔkɔnɔ bablatɛ lakpɔtɔɔsa nii.
Currently Selected:
ESODƆS 37: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
